قازاقستان ءمۇفتيى قاعباعا كىردى

قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى مەككە قالاسىندا ورنالاسقان قاسيەتتى قاعباعا كىردى.

بۇل تۋرالى ق م د- نىڭ باسپا ءسوز حاتشىسى اعابەك قونارباي ۇلى ايتتى.

بۇعان دەيىن 2022-جىلى ساۋد ارابياسىنا ساپارىندا مەملەكەت باسشىسى قاسىم-جومارت توقايەۆ مەككەدە ۋمرا جاساپ، قاعباعا كىرگەن بولاتىن.

ال مەككەگە ساپارىندا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى ساۋد ارابياسى كورولدىگىنىڭ قاجىلىق جانە ۋمرا ءمينيسترى تاۋفيك يبن فاۋزان ار-رابيامەن كەزدەستى.

ەكىجاقتى كەزدەسۋدە وسى جىلعى ۇلكەن قاجىلىق ساپارىن ءتيىستى دەڭگەيدە ۇيىمداستىرۋ ماسەلەسى ءسوز بولدى. باس ءمۇفتي قاجىلىق ساپارى كەزىندە وتانداستارىمىزدىڭ قاۋىپسىزدىگىن قامتاماسىز ەتۋ، قىزمەت ساپاسىن ارتتىرۋ، تولەم جاساۋ جۇيەسىن وڭتايلاندىرۋ مەن باسقا دا ماسەلەلەرگە باسا نازار اۋداردى. سونىمەن قاتار قاجىلىق ۆيزاسىز، ياعني زاڭسىز جولمەن قۇجات راسىمدەپ، قاجىلىق ساپارىن ۇيىمداستىراتىن تۋريستىك فيرمالاردىڭ جۇمىسىنا قاتاڭ تۇردە شەكتەۋ قويۋ ماسەلەسى تالقىلاندى. تاراپتار بۇل ماسەلەگە ءوزارا ىقپالداستىق كەلىسىم نەگىزىندە ىقپال ەتۋگە كەلىستى.

اللاعا شۇكىر، ءبىزدىڭ ەلىمىزدە قاجىلىق پارىزىن ورىنداۋعا نيەت بىلدىرۋشىلەر سانى جىلدان-جىلعا ارتىپ كەلەدى. ءبىزدىڭ ماقسات - قاجىلىق ساپارىن جوعارى دەڭگەيدە ۇيىمداستىرۋ. قازاقستان قاجىلىق ميسسياسى وسى باعىتتا ناتيجەلى جۇمىس ىستەپ كەلەدى، - دەدى ناۋرىزباي قاجى تاعان ۇلى.

ءوز كەزەگىندە ساك قاجىلىق جانە ۇمرا ءمينيسترى تاۋفيك يبن فاۋزان ار-رابيا باس ءمۇفتي باستاعان دەلەگاتسيا مۇشەلەرىنە يگى تىلەگىن جەتكىزىپ، ءارقاشان ەكىجاقتى ىنتىماقتاستىقتى ارتتىرۋعا نيەت ءبىلدىردى.

رەسمي كەزدەسۋدەن كەيىن باس ءمۇفتي مەن قاجىلىق جانە ۇمرا ءمينيسترى 2024-جىلعى ۇلكەن قاجىلىق ساپارىن ۇيىمداستىرۋعا قاتىستى ەكىجاقتى كەلىسىم قۇجاتىنا قول قويدى.