قازاقستان بوكس فەدەراتسياسى ІВА قۇرامىنان شىعا ما؟ سەرىك ساپيەۆ جاۋاپ بەردى
استانا. KAZINFORM - بوكستان 2012-جىلعى وليمپيادا چەمپيونى سەرىك ساپيەۆ Baige.News-كە بەرگەن سۇحباتىندا 2028-جىلى وتەتىن وليمپيادا ويىندارىنداعى بوكستىڭ بولاشاعى جانە قازاقستان بوكس فەدەراتسياسىنىڭ حالىقارالىق بوكس قاۋىمداستىعىنىڭ (IBA) قۇرامىنان شىعۋى مۇمكىندىگىنە قاتىستى پىكىر ءبىلدىردى.
«قازىرگى ۋاقىتتا حالىقارالىق بوكس قاۋىمداستىعى مەن حالىقارالىق وليمپيادا كوميتەتى اراسىندا تۇسىنبەستىكتەر بار. ح و ك سوڭعى سەسسياسىندا ІВА- نى ح و ك قوزعالىسىنان شىعارىپ تاستادى. مىنە، وسىنداي جاعداي. ءبارى اۋادا قالقىپ تۇر. ەكى وليمپيادانى حالىقارالىق وليمپيادا كوميتەتى وتكىزدى. حالىقارالىق بوكس قاۋىمداستىعى - بولەك ۇيىم. ءوز قالپىندا جۇمىس ىستەپ جاتىر.
بوكستى (وليمپيادالىق قوزعالىستى) شىعارىپ تاستامايدى دەپ ويلايمىن. ونى قالاي شىعارۋعا بولادى؟ جۇدىرىقتاسۋ سپورتى ەجەلگى گرەكيادا وتكەن وليمپيادا ويىندارىندا دا بولعان. بوكستى وليمپيادا باعدارلاماسىنان شىعارۋ دەگەن باستامانى كىم ايتىپ ءجۇر؟ مەنىڭشە، ول ادامدى بۇكىل الەم تالقىلايتىن شىعار»، - دەدى بوكستان لوندون وليمپياداسىنىڭ چەمپيونى.
ساپيەۆ قازاقستان بوكس فەدەراتسياسىنىڭ بولاشاعى تۋرالى دا ويىن ايتتى. سەرىكتىڭ سوزىنشە، ول بۇل ماسەلەنى ۇ و ك باسشىسى گەننادي گولوۆكينمەن تالقىلاماعانىن العا تارتتى.
«بۇل ماسەلەنى گەننادي گولوۆكينمەن تالقىلاعان جوقپىز. سەناري، جوسپار قۇرعان جوقپىز. ازىرگە فەدەراتسيامىز جاڭادان قۇرىلعان World Boxing-كە اۋىسادى دەپ ايتۋ قيىن. سەبەبى ولار (قازاقستان بوكس فەدەراتسياسى) ازيا كونفەدەراتسياسىنىڭ مۇشەسى. مەنىڭشە، ءبارى ازيا كونفەدەراتسياسىنىڭ باعىتىنا بايلانىستى بولاتىن شىعار. سول كەزدە ءبىزدىڭ فەدەراتسيانىڭ پىكىرى دە وزگەرەر. ال ءدال قازىر ءبىز ازيا كونفەدەراتسياسىندامىز جانە حالىقارالىق بوكس قاۋىمداستىعىنىڭ مۇشەسىمىز. نە بولاتىنىن ۋاقىت كورسەتەدى، - دەپ قوستى سەرىك ساپيەۆ.
