قازاقستان ازاماتىن وزبەك كەدەن قىزمەتكەرىنىڭ ۇرعانى راس پا - س ءى م جاۋابى
استانا. KAZINFORM - ەلىمىزدىڭ سىرتقى ىستەر مينيسترلىگى قازاقستان مەن وزبەكستان شەكاراسىنداعى «ناۆوي» وتكىزۋ پۋنكتىندە بولعان جاعدايعا قاتىستى تۇسىنىك بەردى.
ەسكە سالساق، وقيعا 5-شىلدە كۇنى ەكى ەل شەكاراسىنداعى باقىلاۋ-وتكىزۋ بەكەتتەرىنىڭ بىرىندە بولعان. الەۋمەتتىك جەلىدە تاراعان ۆيدەودا قازاقستاندىق ازامات پەن وزبەكستاندىق كەدەن قىزمەتكەرى اراسىندا جانجال تۋىنداپ، ارتى توبەلەسكە ۇلاسقانىن بايقاۋعا بولادى. سونداي-اق ۆيدەودا كەدەنشى قازاقستان ازاماتىن ۇرىپ جىبەرگەن.
بەينەجازبا جەلى قولدانۋشىلارى اراسىندا قىزۋ تالقىعا ءتۇستى. كوپتەگەن پىكىر قالدىرۋشى اتالعان جاعدايعا رەسمي تۇردە باعا بەرۋدى جانە كىنالىنى جاۋاپقا تارتۋدى تالاپ ەتتى. جەلى قولدانۋشىلاردىڭ پىكىرىنشە، شەكارادا بەيبىت ازاماتتارعا كۇش قولدانۋعا جول بەرىلمەۋ كەرەك.
- بار اقپاراتقا سايكەس، اتالعان وقيعاعا بايلانىستى قازاقستان مەن وزبەكستان شەكارا وكىلدەرى كەزدەسۋ وتكىزدى. كەزدەسۋ بارىسىندا وزبەك تاراپى بۇل ماسەلەنى ءادىل ءارى وبەكتيۆتى قاراستىراتىنىن حابارلاپ سەندىردى، - دەگەن جاۋاپ الدىق سىرتقى ىستەر مينيسترلىگىنەن اگەنتتىك جولداعان ساۋالعا.
وسى ورايدا س ءى م ماسەلەنىڭ ەرەكشەلىگىن ەسكەرە وتىرىپ، ءمان-جايدى انىقتاۋ ءۇشىن ۇلتتىق قاۋىپسىزدىك كوميتەتىنىڭ شەكارا قىزمەتىنە جۇگىنۋدى ۇسىنىپ وتىر.
تاياۋدا Kazinform ءتىلشىسى «كاپلانبەك - ناۆوي» وتكىزۋ بەكەتىن جاياۋ ءجۇرىپ ءوتىپ، مۇنداعى جاعدايدى كوزىمەن كورىپ قايتقان ەدى.
اۆتور
داۋلەت ىزتىلەۋ
