قازاقستان التىن قورىن كوبەيتتى: ونىڭ قانداي تيىمدىلىگى بار؟
استانا. KAZINFORM - تاياۋدا World Gold Council ۇيىمى، ياعني دۇنيەجۇزىلىك التىن كەڭەسى كەيىنگى ايدا قازاقستاننىڭ التىن قورى 7,4 تونناعا ارتقانىن مالىمدەدى. وسىلايشا ەل رەزەرۆىندەگى التىننىڭ جالپى كولەمى 298 توننادان اسقان. التىن قورىن كوبەيتۋ نە ءۇشىن ماڭىزدى، قازاقستان ەكونوميكاسىنا قانداي پايدا تيگىزبەك؟ Kazinform اگەنتتىگىنىڭ اناليتيكالىق شولۋشىسى جاي-كۇيدى ءبىلدى.
دۇنيەجۇزىلىك التىن كەڭەسى الەمدىك رەيتينگتە حالىقارالىق ۆاليۋتا قورى مەن ەۋروپا ورتالىق بانكىن ەسەپكە الماعاندا قازاقستاننىڭ 18-ورىندا تۇرعانىن جازعان. ەلىمىز ۇلى بريتانيا مەن ليۆاننىڭ ورتاسىنا جايعاسقان ەكەن. ال ۇزدىك بەستىك وزگەرىسسىز قالدى: ا ق ش، گەرمانيا، يتاليا، فرانسيا جانە رەسەي. ءبىرىنشى ورىندا تۇرعان ا ق ش-تىڭ التىن قورى بيىل 8,13 مىڭ توننادان اسقان.
سونىمەن، ەلدىڭ التىن قورىنىڭ ارتۋىنان قانداي پايدا بار؟ قارجىگەر عيمران ابدراحمانوۆتىڭ ايتۋىنشا، التىن قورى مەملەكەتتىڭ ەكونوميكاسىندا قاۋىپسىزدىك تەتىگى سەكىلدى ءرول اتقارادى. ءتىپتى، ينفلياتسيانى تومەندەتۋگە دە قاتىسى بار.
- التىن قورىنىڭ ارتۋى، ەڭ الدىمەن ەلدىڭ تۇراقتىلىعى مەن قارجىلىق قاۋىپسىزدىگىن قامتاماسىز ەتۋ ءۇشىن جاسالادى. ول ينفلياتسيانى تومەندەتۋ مەن ەكونوميكالىق قاۋىپتەرگە قارسى «قاۋىپسىزدىك جاستىعى» ىسپەتتى دۇنيە، ياعني التىن ەكونوميكانىڭ قۇبىلمالى كەزەڭدەرىندە ەڭ سەنىمدى اكتيۆ بولىپ قالا بەرەدى.
ەۋرو مەن دوللار ۆاليۋتاسى تۇراقتى سانالعانىمەن، التىن بارلىق كەزەڭدە سەنىمدى جانە قاۋىپسىز قۇرال سانالادى. سەبەبى ەكونوميكانىڭ تسيكلدىك سيپاتى كەزىندە كومپانيا اكتسيالارى، ۆاليۋتالار جانە باسقا اكتيۆتەر قۇبىلىپ تۇرادى. ءتىپتى، ءوزىمىزدىڭ تەڭگەمىزدىڭ دە تۇراقسىز ەكەنىن كورىپ وتىرمىز. سول سەبەپتى، التىن رەزەرۆىن جۇيەلى تۇردە تولىقتىرىپ وتىرۋ - ەڭ دۇرىس ءارى ءتيىمدى قادام، - دەيدى ساراپشى.
قازىر Comex بيرجاسىندا التىننىڭ ترويا ۋنتسياسى 3,2-3,36 مىڭ دوللار ارالىعىندا ساۋدالانۋدا. ال ۇلتتىق بانك سايتىندا 1 گرام التىننىڭ باعاسى ءار كۇنى 54-56 مىڭ تەڭگەگە باعالانىپ ءجۇر.
ونەركاسىپ جانە قۇرىلىس مينيسترلىگى ەلىمىزدىڭ پايدالى قازبالارمەن قامتاماسىز ەتىلۋ مەرزىمىنە قاتىستى جاڭارتىلعان دەرەكتەردى جاريالادى. سوڭعى دەرەكتەرگە سايكەس، قازىرگى ءوندىرۋ كولەمىن ەسكەرسەك، ەلىمىزدەگى التىن قورى 30 جىلعا جەتەدى.
ماديار تولەۋوۆ
