قازاقستاندا جىل باسىنان بەرى جول اپاتىنان قانشا بالا قازا تاپتى

بۇل تۋرالى ق ر ءى ءى م اكىمشىلىك پوليتسيا كوميتەتى ءتوراعاسىنىڭ ورىنباسارى قۇرالاي كارينا مالىمدەدى.

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ول جاڭا وقۋ جىلى قارساڭىندا بالالاردىڭ جولداعى قاۋىپسىزدىگىن قامتاماسىز ەتۋ شارالارىنا توقتالدى.

- وكىنىشكە قاراي، جىل باسىنان بەرى بالالاردىڭ قاتىسۋىمەن 5 مىڭنان استام جول-كولىك وقيعاسى تىركەلدى. سونىڭ سالدارىنان 137 بالا قازا تاۋىپ، 6 مىڭعا جۋىق بالا جاراقات الدى، - دەدى قۇرالاي كارينا.

ونىڭ ايتۋىنشا، وقۋ جىلى باستالعان كەزدە كوشەدە بالالار كوبەيىپ، مەكتەپ ماڭىنداعى كولىك قوزعالىسى ارتادى.

وسىعان بايلانىستى 15-30-تامىز ارالىعىندا رەسپۋبليكا بويىنشا «نازار اۋدارىڭىز، بالالار!» اكسياسى ءوتىپ جاتىر. ونىڭ نەگىزگى ماقساتى - قۇقىق بۇزۋشىلىقتار مەن ءتۇرلى وقيعالاردىڭ الدىن الۋ، بالالاردىڭ جولداعى قاۋىپسىزدىگىن قامتاماسىز ەتۋ.

قۇرالاي كارينا جۇرگىزۋشىلەردى مەكتەپتەر، جاياۋ جۇرگىنشىلەر وتكەلدەرى مەن بالالار كوپ جينالاتىن ورىنداردىڭ ماڭىندا بارىنشا ساق بولۋعا شاقىردى.

- بالا جولداعى جاعدايدى دۇرىس باعالاماۋى مۇمكىن. سوندىقتان جۇرگىزۋشى قاۋىپتى الدىن الا بولجاپ، جول-كولىك وقيعاسىنا جول بەرمەۋ ءۇشىن بارلىق شارانى قابىلداۋى كەرەك، - دەدى ول.

ايتا كەتەيىك، استانادا جول ەرەجەسىن بۇزعان 19 مىڭنان استام جاياۋ جۇرگىنشى جاۋاپقا تارتىلدى.