قازاقستان يندونەزياعا ەت، ەت كونسەۆىلەرى مەن استىق ەكسپورتىنىڭ كولەمىن ارتتىرماق

وتىرىسقا ەكى ەلدىڭ مەملەكەتتىك ورگاندارىنىڭ، «اتامەكەن» ۇ ك پ-نىڭ، ديپلوماتيالىق ميسسيالار مەن بيزنەس وكىلدەرى قاتىستى. تاراپتار ساۋدا، ينۆەستيتسيا، كولىك-لوگيستيكا، ەنەرگەتيكا، سيفرلاندىرۋ، اۋىل شارۋاشىلىعى، ستاندارتتاۋ جانە تۋريزم ماسەلەلەرىن تالقىلادى.

- يندونەزيا - قازاقستاننىڭ وڭتۇستىك- شىعىس ازياداعى نەگىزگى ەكونوميكالىق سەرىكتەستەرىنىڭ ءبىرى. ءبىز ەكىجاقتى قاتىناستاردى جاڭا ساپالى دەڭگەيگە كوتەرۋگە مۇددەلىمىز. ەكى ەل اراسىندا ساۋدا- ەكونوميكالىق، مادەني جانە باسقا دا سالالاردى قامتيتىن 26 كەلىسىم بار، - دەدى سەرىك جۇمانعارين.

ۆيتسە- پرەمەر وتكەن جىلدىڭ جەلتوقسان ايىندا قول قويىلعان ە ا ە و مەن يندونەزيا اراسىنداعى ەركىن ساۋدا تۋرالى كەلىسىمنىڭ ماڭىزىن دا ەرەكشە اتاپ ءوتتى.

- بۇل - ە ا ە و مەن ا س ە ا ن-نىڭ ەڭ ءىرى ەكونوميكاسى اراسىنداعى ستراتەگيالىق كوپىر. ول ەكسپورت پەن ونەركاسىپتىك كووپەراتسيانى دامىتۋعا جاڭا مۇمكىندىك اشادى، - دەدى سەرىك جۇمانعارين.

قازاقستان ءوزارا جەتكىزىلەتىن تاۋارلار نومەنكلاتۋراسىن كەڭەيتۋدى جانە قولدانىستاعى ساۋدا باعىتتارىن جانداندىرۋدى ۇسىندى.

قازاقستان تاراپىنىڭ مالىمەتىنشە، 20 تاۋارلىق پوزيتسيا بويىنشا ەكسپورتتىق الەۋەت $60 ميلليوننان اسادى. پەرسپەكتيۆالى باعىتتاردىڭ قاتارىندا يندونەزيانىڭ بولات قۇيۋ جانە اۆتوموبيل ونەركاسىبىنە قازاقستاندىق فەرروقورىتپالاردى جەتكىزۋ، سونداي-اق استىق ەكسپورتىن ۇلعايتۋ اتالدى.

- بيىل يندونەزيانىڭ بيداي يمپورتىنا دەگەن سۇرانىسى 13 ميلليون تونناعا دەيىن ءوسۋى مۇمكىن. قازاقستان يندونەزيانىڭ ۇن ءوندىرۋ ونەركاسىبىنە جوعارى ساپالى، جەلىمتەگى جوعارى بيدايدى تۇراقتى تۇردە جەتكىزۋگە دايىن، - دەدى سەرىك جۇمانعارين.

تاراپتار حالال ونىمدەرى سالاسىنداعى ىنتىماقتاستىققا دا ەرەكشە نازار اۋداردى. قازاقستان يندونەزيا نارىعىنا سيىر ەتى، قوي ەتى جانە ەت كونسەرۆىلەرىن جەتكىزۋ كولەمىن ارتتىرۋعا دايىن ەكەنىن مالىمدەدى. ەكسپورتتىق الەۋەتتىڭ مىسالى رەتىندە سەرىك جۇمانعارين «قايىپ اتا» ج ش س جوباسىن تانىستىردى.

- بۇگىندە ءبىز ورتالىق ازياداعى سيىر ەتىن جەتكىزۋشى جەتەكشى ەلدەردىڭ ءبىرىمىز. ەكى جىل بۇرىن اۆستراليالىق ارىپتەستەردىڭ تاجىريبەسىن زەرتتەپ، ونى قازاقستاندا ەنگىزدىك. ناتيجەسىندە ەلىمىزدە 50 مىڭ باس مالعا ارنالعان تولىق تسيكلدى ەڭ ءىرى كلاستەر قۇرىلدى، - دەدى ول.

يندونەزيا تاراپى ازىق-تۇلىك قاۋىپسىزدىگى، حالال يندۋسترياسى جانە ەنەرگەتيكا سالالارىنداعى ىنتىماقتاستىقتى كەڭەيتۋگە قىزىعۋشىلىق تانىتاتىنىن راستادى.

- ءبىز ينۆەستيتسيا، ەنەرگەتيكا، سيفرلىق ترانسفورماتسيا، تۋريزم، ستاندارتتاۋ، دەنساۋلىق ساقتاۋ سالالارى مەن بيزنەس قاۋىمداستىقتارى اراسىنداعى ءوزارا ءىس-قيمىل باعىتتارىندا ءبىرقاتار ەكىجاقتى باستامالار بويىنشا ىلگەرىلەۋ بارىن اتاپ وتكىمىز كەلەدى، - دەپ اتاپ ءوتتى يندونەزيانىڭ ەكونوميكالىق ىستەر جونىندەگى ۇيلەستىرۋشى ءمينيسترى ايرلانگگا حارتارتو.

سونداي-اق، ايرلانگگا حارتارتو يندونەزيا مەن ە ا ە و اراسىنداعى ەركىن ساۋدا تۋرالى كەلىسىمدى راتيفيكاتسيالاۋ پروتسەسىن جەدەلدەتۋدى قولداپ، يندونەزيا- ە ا ە و ىسكەرلىك كەڭەسىن قۇرۋدى ۇسىندى. ستاندارتتاۋ سالاسىندا تاراپتار قازاقستاننىڭ ستاندارتتاۋ جانە مەترولوگيا ينستيتۋتى مەن يندونەزيانىڭ ۇلتتىق ستاندارتتاۋ اگەنتتىگى اراسىنداعى مەموراندۋمدى ازىرلەۋ ماسەلەسىن ءسوز ەتتى.

ورتالىق جانە وڭتۇستىك- شىعىس ازيا اراسىنداعى كولىك بايلانىسىن دامىتۋعا دا ەرەكشە نازار اۋدارىلدى. تاراپتار مۋلتيمودالدى كولىك باعىتتارىن جانە ليانيۋنگان ءدالىزى ارقىلى كونتەينەرلىك تەمىرجول قاتىناسىنىڭ پيلوتتىق جوباسىن تالقىلادى. تۋريستىك قاتىناس تا ارتىپ كەلەدى.

قازاقستاننان يندونەزياعا بارعان تۋريستەر سانى 2023 -جىلعى 8,2 مىڭ ادامنان 2025 -جىلى 24,4 مىڭ ادامعا دەيىن ءوستى. وتىرىس قورىتىندىسىندا قازاقستان مەن يندونەزيانىڭ ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ ەكىنشى وتىرىسىنىڭ حاتتاماسىنا قول قويىلدى.

جيىندا قازاقستان دەلەگاتسياسىن پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين، يندونەزيا دەلەگاتسياسىن يندونەزيانىڭ ەكونوميكالىق ىستەر جونىندەگى ۇيلەستىرۋشى ءمينيسترى ايرلانگگا حارتارتو باسقاردى.

وسىعان دەيىن سانكت-پەتەربۋرگ قالاسىندا وتكەن جوعارى ەۋرازيالىق ەكونوميكالىق كەڭەس اياسىندا ەۋرازيالىق ەكونوميكالىق وداق پەن وعان مۇشە مەملەكەتتەر، سونداي-اق يندونەزيا رەسپۋبليكاسى اراسىندا ەركىن ساۋدا تۋرالى كەلىسىمگە قول قويىلعانى تۋرالى جازدىق.