قازاق ينجەنەرلەرى ازىرلەگەن كونتروللەر سەربيا مەن قىتاي زاۋىتتارىندا تيىمدىلىگىن دالەلدەدى
مينسك. KAZINFORM - قازاقستاندىق ەنەرگيا ۇنەمدەۋ تەحنولوگياسى مەتاللۋرگيا مەن ەنەرگەتيكاعا ارنالعان الەمدەگى ەڭ ۇزدىك-6 «جاسىل» جوبا قاتارىنا ەندى. بۇل تۋرالى ۇكىمەتتىڭ باسپا ءسوز قىزمەتى حابارلادى.
«يننوپروم. بەلارۋس» كورمەسىندە «جاسىل» ەنەرگەتيكا سالاسىنداعى جوعارى الەۋەتىمەن حالىقارالىق دەڭگەيدە تانىلعان قازاقستاندىق «electrologic» كونتروللەرى ۇسىنىلدى.
ازىرلەمە جاھاندىق ەكولوگيالىق قوردىڭ قىسقا تىزىمىنە ەنىپ، 600 الەمدىك ءوتىنىمنىڭ ىشىنەن ىرىكتەلگەن التى جوبانىڭ بىرىنە اينالدى جانە قازاقستانعا ەنگىزۋگە 5,8 ميلليون ەۋرو كولەمىندە گرانت تارتا الادى.
جوبا جەتەكشى الەمدىك وندىرۋشىلەردىڭ جىلدامدىعىنان اسىپ تۇسەتىن، تولىعىمەن وتاندىق ازىرلەمەگە نەگىزدەلگەن. تەحنولوگيا باستاپقىدا مەتاللۋرگيادا ەلەكتر دوعالى پەشتەردى باسقارۋ ءۇشىن قولدانىلعان. ونىڭ سەربيا مەن قىتايداعى زاۋىتتاردا ەنگىزىلۋى بالقىتۋ ۋاقىتىن ەكى ەسەگە قىسقارتۋعا مۇمكىندىك بەردى، بۇل ەلەكتر ەنەرگياسىن، شىعىن ماتەريالدارىن ايتارلىقتاي ۇنەمدەۋگە جانە ونىمدىلىكتىڭ ەكى ەسە وسۋىنە اكەلدى.
كەيىنىرەك ازىرلەۋشىلەر تەحنولوگيانى ەلەكتر جەلىلەرىندەگى شىعىنداردىڭ سەبەبى بولىپ سانالاتىن «تەرىس» رەاكتيۆتى ەنەرگيانى باسقارۋ ماسەلەسىن شەشۋگە بەيىمدەدى. ەندى كونتروللەردى كەز- كەلگەن ونەركاسىپتىك زاۋىتتاردا جانە كوممۋنالدىق سەكتوردا ەنەرگيا تيىمدىلىگىن ارتتىرۋ ءۇشىن پايدالانۋعا بولادى، بۇل ونى «جاسىل» ەكونوميكاعا كوشۋدىڭ ماڭىزدى قۇرالى ەتەدى.
- ءبىز «electrologic» كونتروللەرىن اپپاراتتىق جانە باعدارلامالىق تۇرعىدان ءوندىرىپ، ازىرلەۋشىلەرمىز. ولار مەتاللۋرگيا مەن ەنەرگەتيكادا قولدانىلادى. مەتاللۋرگيادا ءبىز مەتالدى بالقىتۋ ۋاقىتىن قىسقارتامىز، ەلەكترودتاردىڭ شىعىنىن ازايتامىز. ەنەرگەتيكادا - ەلەكتر ەنەرگياسىن ۇنەمدەۋگە مۇمكىندىك بەرەدى. ءبىزدىڭ رەتتەگىشتەر شەتەلدىك انالوگتارعا قاراعاندا تيىمدىرەك جۇمىس ىستەيدى. وسى رەتتەگىشتەردى ورناتقاننان كەيىن، مىسالى، سەربيادا ءبىز مەتالدى بالقىتۋدى 45 مينۋتتان 26 مينۋتقا دەيىن، قىتايدا 120 مينۋتتان 65 مينۋتقا دەيىن قىسقارتتىق. بۇل ونىمدىلىكتىڭ ءوسۋى جانە وزىندىك قۇننىڭ تومەندەۋىنىڭ ارتۋى، - دەپ اتاپ ءوتتى جوبا جەتەكشىسى جانات ءجۇسىپوۆ.
ايتا كەتەلىك قازاقستاندا وندىرىستىك جابدىقتى ينتەرنەت ارقىلى باسقارۋ جۇيەسى ازىرلەنگەن ەدى.
