«قازاق- وزبەك تاندەمى» تەرمينىنىڭ پايدا بولۋى بەكەر ەمەس - ساراپشى پرەزيدەنتتەردىڭ بەيرەسمي كەزدەسۋى جايلى

تاشكەنت. KAZINFORM - ساپار بارىسىندا «قازاق- وزبەك تاندەمى» دەگەن تەرميننىڭ پايدا بولۋى بەكەر ەمەس. بۇل ەكى مەملەكەتتىڭ جانە جالپى ورتالىق ازيا ەلدەرىنىڭ ءوزارا تاندەمدە بولۋىن ايعاقتايدى. پرەزيدەنت قاسىم-جومارت توقايەۆ پەن وزبەكستان باسشىسى شاۆكات ميرزيەيەۆ اراسىندا وتكەن بەيرەسمي كەزدەسۋگە قاتىستى وزبەكستاندىق بەلگىلى ساياساتتانۋشى فارحود توليپوۆ وسىنداي پىكىر ءبىلدىردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

«مەملەكەتتىك، رەسمي جانە جۇمىس ساپارلارىمەن قاتار، بەيرەسمي كەزدەسۋلەردىڭ ماڭىزى زور. بۇل تەك ەلدەر اراسىنداعى عانا ەمەس، سونىمەن بىرگە باسشىلاردىڭ اراسىنداعى دوستىقتىڭ دالەلى ىسپەتتى. اتالعان ساپار بارىسىندا «قازاق-وزبەك تاندەمى» دەگەن تەرميننىڭ پايدا بولۋى دا بەكەر ەمەس. بۇل ەكى مەملەكەتتىڭ جانە جالپى ورتالىق ازيا ەلدەرىنىڭ تاندەمدە بولۋىن ايعاقتايدى. وسىعان دەيىنگى قارىم-قاتىناستىڭ جۇيەلى ءارى ساپالى دامۋى ونى جوعارى دەڭگەيگە جەتكىزىپ وتىر»، - دەدى فارحود توليپوۆ.

ساراپشى بىرلەسە اتقارعان ناتيجەلى جۇمىستىڭ ارقاسىندا قازاقستان مەن وزبەكستان ستراتەگيالىق سەرىكتەس دەڭگەيىنە ءبىراز ۋاقىت بۇرىن شىعىپ ۇلگەرگەنىن اتاپ ءوتتى. بۇگىندە وداقتاستىق قارىم-قاتىناستىڭ ىرگەتاسىن بەكەمدەپ كەلەدى.

«بەيرەسمي ساپار بارىسىندا قازاقستان مەن وزبەكستان اراسىنداعى ستراتەگيالىق سەرىكتەستىك پەن وداقتاستىقتىڭ 2034 -جىلعا دەيىنگى باعدارلاماسى بەكىتىلدى. بۇل ەكى ەل قارىم-قاتىناستى جاڭا دەڭگەيگە شىعارىپ، ونىڭ الداعى ۋاقىتتا زور مۇمكىندىككە يە ەكەنىن كورىپ وتىر دەگەندى بىلدىرەدى. جالپى قازاقستان مەن وزبەكستان ورتالىق ازيانىڭ وزگە ەلدەرىنە ۇلگى سانالادى»، - دەپ وي ءبولىستى ساياساتتانۋشى.

فارحود توليپوۆتىڭ پايىمىنشا، الەمدە قالىپتاسقان كۇردەلى گەوساياسي جاعدايدا ەكى ەل اراسىنداعى بارلىق سالاداعى بايلانىستاردى نىعايتا ءتۇسۋ وتە ماڭىزدى. ويتكەنى، وزگە مەملەكەتتەردە بولىپ جاتقان جاعدايلاردىڭ تەرىس سالدارى ورتالىق ازيا ايماعىندا دا سەزىلۋى مۇمكىن. سوندىقتان ونىڭ الدىن الۋ، ءبىر-بىرىمەن كەلىسە وتىرىپ ارەكەت ەتۋ ورىندى.

«ورتالىق ازيا ەلدەرىنىڭ دامۋىندا ۇنەمى گەوساياسي تەندەنتسيالار بولىپ وتىرعانى بەلگىلى. ولار جالعاسا دا بەرەدى. وسىنداي كەزەڭدە قاسىم-جومارت توقايەۆ پەن شاۆكات ميرزيەيەۆ وداقتاستىقتى بەكەمدەپ، بولۋى مۇمكىن قاتەرلەرگە بىرگە قارسى تۇرۋ ءۇشىن تاندەمدە جۇمىس ىستەۋگە ۋاعدالاستى. بۇل رەتتە ەكى پرەزيدەنت قازاق-وزبەك بايلانىستارىن عانا ءسوز ەتكەن جوق. ولار ايماقتاعى ماڭىزدى ماسەلەلەر بويىنشا پىكىر الماستى. ورتالىق ازيا - ەرەكشە ايماق، وندا ەكى مەملەكەتتىڭ قارىم-قاتىناسىمەن ماسەلەلەردى شەشە سالۋ قيىن. مۇندا بارلىق ەلدىڭ قاتىسۋى ماڭىزدى»، - دەپ تۇيىندەدى ف. توليپوۆ.

ەسكە سالايىق، 5-ءساۋىر كۇنى قاسىم-جومارت توقايەۆ پەن وزبەكستان باسشىسى شاۆكات ميرزيەيەۆ حيۋا قالاسىندا بەيرەسمي كەزدەسۋ وتكىزدى.

ونىڭ بارىسىندا پرەزيدەنتتەر ءوزارا تاۋار اينالىمىن ۇلعايتۋ، ەنەرگەتيكا، كولىك، سۋ شارۋاشىلىعى، IT سالالارىنداعى ىنتىماقتاستىقتى دامىتۋ سياقتى ەكونوميكالىق ىقپالداستىقتىڭ سان الۋان ماسەلەسى جونىندە پىكىر الماستى.

اۆتور

ءاليحان اسقار