قازاق سپورتشىلارىن اقپان ايىندا قانداي جارىستار كۇتىپ تۇر

استانا. KAZINFORM - قازاق سپورتشىلارىن اقپان ايىندا ءبىر قاتار ماڭىزدى دودالار كۇتىپ تۇر.

اتاپ ايتساق، اقپان ايىندا ۇلتتىق قۇراما سپورتشىلارى سپورتتىڭ 18 ءتۇرى بويىنشا 17 ليتسەنزيالىق جارىستا ونەر كورسەتەدى. دزيۋدو، سەمسەرلەسۋ، سپورتتىق گيمناستيكا، اۋىر اتلەتيكا جانە باتۋتتاعى گيمناستيكا بويىنشا سىنعا تۇسەتىن سپورتشىلار پاريج وليمپياداسىنىڭ جولداماسىن رەيتينگتىك ۇپاي بەرەتىن جارىستارعا قاتىسادى. سونىمەن بىرگە، سۋ سپورتى تۇرلەرى، بوكس، جەڭىل اتلەتيكا وكىلدەرى ءتورتجىلدىقتىڭ باستى جارىسىنا ىرىكتەۋ تۋرنيرلەرىندە باق سىنايدى.

قازىرگى تاڭدا قازاقستان ۇلتتىق قۇراماسىنىڭ قورجىنىندا پاريج وليمپياداسىنىڭ 19 ليتسەنزياسى (سپورتتىڭ 8 تۇرىنەن) بار (ساداق اتۋ – 4، ۆەلوشوسسە – 3، نىسانا كوزدەۋ – 5، قازىرگى بەسسايىس – 2، بوكس – 2، گرەك-ريم كۇرەسى – 1، ەركىن كۇرەس – 1، سپورتتىق گيمناستيكا - 1). وليمپيا ويىندارىنا دەيىن 69 ليتسەنزيالىق جارىس قالدى. ونىڭ ىشىندە 5 الەم چەمپيوناتى، 7 ازيا چەمپيوناتى جانە 57 رەيتينگتىك تۋرنير بار.

«بيىلعى جىلدىڭ باستى سپورتتىق وقيعاسى دەپ 26- شىلدە مەن 11- تامىز ارالىعىندا پاريجدە وتەتىن جازعى وليمپيا ويىندارىن ايتۋعا بولادى. ءار ءتورت جىلدا ءبىر رەت وتكىزىلەتىن وليمپياداعا الەمنىڭ 205 ەلىنەن 10 مىڭنان استام سپورتشى قاتىسادى دەپ جوسپارلانعان. پاريجدەگى دودادا 32 سپورت تۇرىنەن 329 مەدال جيىنتىعى ساراپقا سالىنادى. قازاقستان ۇلتتىق قۇراماسى وليمپياداعا سپورتتىڭ 20 تۇرىنەن قاتىسۋدى جوسپارلاپ وتىر. سوندىقتان قازىرگى تاڭدا باستى ماقسات - قىسقا مەرزىمدە مەيىلىنشە كوپ ليتسەنزيا الۋ. قۇراما كوشباسشىلارى ءار سپورت ءتۇرىنىڭ ەرەكشەلىگى، سپورتشىنىڭ قاجەتتىلىگى، مەديتسينالىق-بيولوگيالىق تۇرعىدا قامتاماسىز ەتىلگەنى، ونىڭ ىشىندە فيزيوتەراپيا، وڭالتۋ مەن جاراقاتتاردىڭ الدىن الۋ، پسيحولوگيالىق قولداۋ جانە جارىسقا دايىندىق كەزىندە كۇيزەلىستى جەڭۋ سياقتى جاعدايلار ەسكەرىلگەن جەكە جوسپار بويىنشا دايىندالادى»، - دەدى تۋريزم جانە سپورت ءمينيسترى ەرمەك مارجىقپايەۆ.

ايتا كەتەيىك، بۇگىن فرانتسيا استاناسى پاريجدە دزيۋدودان الەمدىك Grand Slam تۋرنيرىنىڭ جالاۋى جەلبىرەدى. استانا قالاسىندا كۇرەس تۇرلەرىنەن ەل بىرىنشىلىگى ءوتىپ جاتىر.

اۆتور كۇنسۇلتان وتارباي