قازاق مادەنيەتىنىڭ كورنەكتى قايراتكەرى يۋري اراۆين ومىردەن وزدى

استانا. KAZINFORM - قازاق مادەنيەتىنىڭ كورنەكتى قايراتكەرى يۋري اراۆين ومىردەن وزدى. قارالى حاباردى مادەنيەت جانە اقپارات ءمينيسترى ايدا بالايەۆا جەتكىزدى.

- قازاق مادەنيەتىنىڭ كورنەكتى قايراتكەرى، «پاراسات» جانە «وتان» وردەندەرىنىڭ يەگەرى، قازاقستان كومپوزيتورلار وداعىنىڭ مۇشەسى، پروفەسسور يۋري پەتروۆيچ اراۆين ومىردەن وزدى. قايراتكەر تۇلعانىڭ وتباسى مەن تۋعان-تۋىستارىنا، شاكىرتتەرى مەن ارىپتەستەرىنە قايعىرا كوڭىل ايتامىن. يۋري پەتروۆيچتىڭ ەسىمى حالقىمىز ءۇشىن اسا قادىرلى. ول قازاقتىڭ حالىق مۋزىكاسىن كەڭىنەن ناسيحاتتاعان تانىمال تۇلعالاردىڭ ءبىرى ەدى. ۇلتتىق مادەنيەتكە بار جان-تانىمەن بەرىلگەن ازامات رەتىندە فولكلورلىق مۇرالاردى جيناقتاۋ ماقساتىندا كوپتەگەن عىلىمي-شىعارماشىلىق ەكسپەديتسيانىڭ باستاماشىسى بولدى. كوپتەگەن كونە مۋزىكالىق تۋىندىنى جاڭعىرتىپ، عىلىمي جۇيەگە ءتۇسىردى، - دەپ جازدى مينيستر Facebook پاراقشاسىندا.

ونىڭ اتاپ وتۋىنشە، يۋري اراۆين قازاق مۋزىكاسىنا، حالىق كومپوزيتورلارى مەن اقىندارىنىڭ مۇراسىنا ارنالعان ءبىرقاتار تەلەراديو باعدارلاماسىن جاسادى. قازاق فولكلورىنا شىن جۇرەگىمەن عاشىق، تالانتتى مۋزىكاتانۋشى رەتىندە حالقىمىزدىڭ ءداستۇرلى مۋزىكاسىنىڭ باي الەمىن تىڭدارمانعا جاڭا قىرىنان تانىتتى.

- يۋري پەتروۆيچ ءوز ءومىرىن ونەرگە، ۇلت مادەنيەتىنە ارناپ، تۇتاس ءبىر شىعارماشىلىق بۋىندى تاربيەلەگەن ۇلاعاتتى ۇستاز بولدى. قايراتكەردىڭ جارقىن بەينەسى، رۋحانياتىمىزعا سىڭىرگەن ولشەۋسىز ەڭبەگى حالىق جۇرەگىندە ماڭگى ساقتالادى دەپ سەنەمىن. مارقۇمنىڭ جاتقان جەرى جايلى، توپىراعى تورقا بولسىن، - دەدى ايدا بالايەۆا.