قازاق كيىگى قىتايعا قالاي جەتكىزىلەدى - مينيستر جاۋابى
استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ قازاقستاننان قىتايعا كيىكتەر قانداي جولمەن جەتكىزىلەتىنى تۋرالى سۇراعان ەدىك.
- تاسىلدەر كوپ، National Geographic اڭداردى ءبىر جەردەن، ەكىنشى جەرگە قالاي كوشىرەتىنىن كورسەتەدى. ارينە، ءىرى اڭداردى ارنايى كونتەينەرمەن كوشىرەدى، مىسالى، سۋسيىر، ارىستان تاعى باسقا. كيىك ەندى ۇساق جانۋار بولعان سوڭ، قازىر عالىمدارمەن جەتكىزۋ ماسەلەسىن تالقىلاپ جاتىرمىز، - دەپ جاۋاپ بەردى ەرلان نىسانبايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.
وسىلايشا مينيستر ءدال قازىر كيىكتەردى جەتكىزۋ بويىنشا ناقتى ۇسىنىستىڭ جوقتىعىن ايتىپ وتىر.
- ارينە، كيىكتەردى ايداپ الىپ كەتە المايدى، قالاي بولعاندا دا كولىكپەن الىپ كەتەدى. ءارتۇرلى تاسىلدەرى بار، - دەپ تولىقتىردى ۆەدومستۆو باسشىسى.
ەسكە سالايىق، قازاقستان قىتايعا 1500 كيىك تارتۋ ەتەدى.
ايتا كەتسەك، عالىمدار قازاقستاندا كيىكتەردىڭ 20 پايىزى رەتتەۋگە جاتاتىنىن ايتىپ وتىر.
بۇعان دەيىن ەكولوگيا ءمينيسترى ەلىمىزدە قانشا كيىك اتىلۋى مۇمكىن دەگەن ساۋالعا جاۋاپ بەردى.
