قازاق جىگىتى لوندوندا مەر بولىپ سايلاندى
استانا. KAZINFORM - قازاقستان تۋماسى سانجار ابىشيەۆ لوندوننىڭ سەنت-دجەيمس اۋدانىنىڭ مەرى بولىپ سايلاندى.
بۇل تۋرالى الەۋمەتتىك جەلىدە كاسىپكەر قانات كوپبايەۆ جازدى.
«قازاق جىگىت لوندونداعى St. James اۋدانىنىڭ مەرى بولىپ سايلاندى. مەنىڭ ەسكى دوسىم، كاسىپكەر ازات ابىشيەۆتىڭ ۇلى سانجار نەبارى 33 جاستا. لوندونداعى اتاقتى Malvern كوللەدجىن، سوسىن ۋنيۆەرسيتەت ءبىتىرىپ، ەندى قالالىق Westminster City council اتقارۋشى ورگانىنا مۇشە بولىپ ەندى. كونسەرۆاتيۆتى پارتيا وكىلى رەتىندە باس باسەكەلەس لەيبوريستەردەن 350 داۋىسقا وزىپ شىقتى. قۇتتى بولسىن، سانجار ازات ۇلى، ۇلكەن ساياسي شىڭداردان كورىنە بەر!» - دەپ جازدى ول.
ايتا كەتەيىك، سەنت-دجەيمس اقسۇيەكتەر اۋدانى دەگەن اتاۋعا دا يە. ول - لوندوننىڭ قاق ورتاسىندا، جۇرەگىندە ورنالاسقان بەدەلدى اۋدان.
سانجار ابىشيەۆ تۋرالى نە بەلگىلى؟
اشىق دەرەككوز مالىمەتىنە سۇيەنسەك، ول Malvern كوللەدجى مەن ۋنيۆەرسيتەتتى ءتامامداعان. ءار جىلدارى ۇلى بريتانياداعى ءتۇرلى كومپانيادا ماركەتينگ مامانى بولىپ جۇمىس ىستەگەن. 2016-جىلدان بەرى ول ءىرى برەندتەرمەن جۇمىس ىستەيتىن ماركەتينگ اگەنتتىگىن دامىتىپ كەلەدى. سونىمەن قاتار، 2015-جىلى بىرنەشە الەۋمەتتىك جوبانى قولدايتىن جەكە قايىرىمدىلىق ۇيىمىن قۇرعان.
سانجار ابىشيەۆ ساياسي ارەنادا 2022-جىلدان بەرى كورىنە باستاعانى ايتىلادى.
