قازاق اندەرىنىڭ تاڭدامالى جيناعى - 6: قويشى ءانى - قۇربىم-اي
استانا. KAZINFORM - بۇل بەرىلگەن قازاق اندەرىنىڭ انتولوگياسىن (تاڭدامالى جيناق) اندەردىڭ اتى بويىنشا قازىرگى قالىپتاسقان الىپبيلىك رەتپەن توپتاستىرىلىپ وسىعان دەيىن سايتىمىزدا ءبىرىنشى جانە ەكىنشى... بەسىنشى بولىمدەرى بەرىلگەن بولاتىن. سول ۇردىسپەن جالعاسىن نازارلارىڭىزعا ۇسىنىپ وتىرمىز.
قايلايلىم
(1- ءتۇرى)
باسىندا قارا تاۋدىڭ قوس بارابان،
سول جەردەن داريا شالقىپ سۋ تاراعان.
قايىرماسى:
قايلاي-لىم،
قايليلايلىم-ءلايلىم.
اسەم قىز سۇلۋ جىگىت ءبارى سوندا،
ياپىرىم-اۋ نەگە كەلدىم سول ارادان.
قايىرماسى:
قايلاي-لىم،
قايليلايلىم،
ءلايلىم.
قايلايلىم
(2- تۇرى)
سەن دەگەندە، قالقاتاي، ويىم بولەك، قايلايلىم،
ون جاسىمنان ولەڭگە بولدىم زەرەك، قايلايلىم-اۋ.
تال شىبىقتاي بۇرالىپ سەن تۇرعاندا، قايلايلىم.
قيما بەلى وزگەنىڭ، كىمگە كەرەك، قايلايلىم-اۋ.
انە گۇل-گۇل تاماشا،
مىنە بۇلبۇل تاماشا.
كەلشى جايناپ، كەلشى سايراپ،
كەلشى، قۇربىم، وڭاشا-اۋ.
قايلىلىلايلىم
بەتىڭ ايداي، دومبىرام، موينىڭ قىلداي،
ءتۇرلى-ءتۇرلى بەتىڭە سالدىم شيماي-اي.
كۇي ساندىقتىڭ داۋىسىنداي تۇرلەندىرىپ،
دىبىسىڭدى شىعارشى بايعۇسىم-اي.
قايىرماسى:
قايلىلىلايلىم - قايلىلىلايلىم،
قايلىلىلايلىم - قايلىلىلايلىم-اي.
ەكى ىشەكتى دومبىرام، قاقپاعىڭ تال،
دىڭعىرلايتىن ىشىندە نە پالەڭ بار-اي.
اقىن دەيتىن اۋىلعا جاقىن قوندىق.
قۇيما قۇلاق بالالار ۇيرەنىپ ال-اي.
قايىرماسى.
قايران زامان
ءبىزدىڭ ەل ءجۇرۋشى ەدى تاۋدى جايلاپ،
كوكوراي شالعىنىنا بيە بايلاپ. ءاي، ۋاي.
جاستىقتىڭ جالىنداعان اسەرىندە
ءجۇرۋشى ەك سۇلۋلارمەن كۇلىپ-ويناپ. ءاي، ۋاي.
قايىرماسى:
قايران زامان،
سەكىلدى اساۋ قۇلىن
بايلانباعان، ءاي، ۋاي.
جىگىتى ءبىزدىڭ جاقتىڭ سىلقىم، سەرى،
توي-دۋمان، ويىن-ساۋىق جۇرگەن جەرى. ءاي، ۋاي.
اسىر ساپ قۇلىن-تايداي ويناقتاعان،
اركىمنىڭ وزىنە ىستىق تۋعان جەرى. ءاي، ۋاي.
قايىرماسى:
قايران زامان،
سەكىلدى اساۋ قۇلىن
بايلانباعان، ءاي، ۋاي.
قالاۋلىم-اي
بايلادىم-اي ءۇش كوتەرىپ ۇزىگىڭدى،
سوقتى ەكەن قانداي ۇستا دۇزىگىڭدى،
اي، قالاۋلىم-اي.
كەزدىكتەي-اي ۇستا سوققان تويتارمالاپ،
كورەدى قانداي ادام قىزىعىندى،
اي قالاۋلىم-اي.
ولەڭدى ايتۋشى ەدىك ءبىر كىسىدەي،
مىلتىقتىڭ سىرتى سۇلۋ دۇمبىسىندەي،
اي قالاۋلىم-اي.
ويناساڭ-اي بىزدەرمەن جاراسادى،
قۇنان مەن قارا جورعا جۇرىسىندەي،
اي، قالاۋلىم-اي.
قاليلا-اۋ
حات جازدىم قالام الىپ، شىراعىم-اي،
لەبىزىڭ تاۋدىڭ تازا بۇلاعىنداي.
قايىرماسى:
قاليلا-اۋ-قاليلا-اۋ قاليلا-اي.
كوزىمە كورىنەسىڭ جارق-جارق ەتىپ-اي،
كيىكتىڭ تاۋدا ويناعان لاعىنداي.
قايىرماسى.
ەي، قالقا، اق ديدارىڭ ايدان اپپاق-اي،
كورگەن جان كەتە المايدى اينالسوقتاپ.
قايىرماسى.
ارشىن توس، الما مويىن قاراعىم-اي،
جۇرەمىن ىلعي عانا سەنى ويلاپ.
قايىرماسى.
قاليلاۋ قالقاش
جىلقىمدى ايداپ سالدىم شيلى وزەككە،
جىعىلدىم اتىم تايىپ كوك تەزەككە.
قايىرماسى:
قاليلاۋ قالقاش،
قاليلاۋ-ءلايلىم-اي
كىسىنىڭ سىيلاسقانداي بالاسى ەدىك،
ولەڭ ايت ءتاۋىر-ءتاۋىر ءبىر كەزەككە.
قايىرماسى.
قالقا
بۇل ءاننىڭ كىم بىلەدى اتى قالقا،
قالقانى ساعىندىم عوي ايتا-ايتا.
قولعا الىپ دومبىرامدى شىرقاعاندا،
تىرناقتان دىم قالعان جوق تارتا-تارتا.
قالقانىڭ ساعىنعاندا سالعان ءانى،
ءۇزىلتىپ، ەلجىرەتىپ تولعاعانى،
سۇيگەنىن، سۇيىنگەنىن ەسىنە الىپ،
جاي تاپپاس، انگە سالسا كىمنىڭ جانى.
دومبىرام ەكى ىشەكتى قولعا الايىن،
تۇرلەنتىپ ون ەكى الۋان ءان سالايىن.
بالاسى جۇيرىك ايعىر اتقا ۇقسايدى
مەن نەعىپ بۇل ونەردەن قۇر قالايىن.
قالقا بالا
اينالايىن قاراعىم، قارا قاسىم،
قوس يىقتا بۇرالعان قولاڭ شاشىڭ-اي.
وزىڭمەنەن ءبىر بولسام بۇل ومىردە،
بولادى عوي باقىتتى مەنىڭ باسىم-اي.
قايىرماسى:
قالقا بالا،
قالقا بالا
قالقا بالا دەگەندە
شالقالاما-اي.
اينالايىن ەلىمنىڭ قاباعىنان،
ءدام تارتتىرعان قاستەرلى تاباعىنان-اي.
القالاسا، اسقاقتاي كۇي توگىلەر،
كەۋدەمدەگى جىر قوبىز شاناعىنان-اي.
قايىرماسى:
ءان قالاعان،
القالاعان،
قارقارادان قىزىعىم
تارقاماعان.
قالقام-اۋ
باسى قىمبات بازاردا الاشانىڭ، قالقام-اۋ، قالقام-اۋ.
قىزى سۇلۋ تومەنگى قاراشانىڭ احاۋ-احاۋ.
ءان داۋىسىن ساعىنىپ جۇرگەنىمدە، قالقام-اۋ، قالقام-اۋ،
داۋسى قايدان شىعادى قۇداشانىڭ احاۋ-احاۋ.
قايىرماسى:
اي قاراڭعى، كۇن بۇلت،
كەلدىم جەتىپ قاسىڭا.
جەتىپ كەلدىم قاسىڭا،
قىزدار-اۋ، قىزدار-اي.
قالقاتايدىڭ داۋىسى-اي
نەتەر دەيمىن ەندەشە، نەتەر دەيمىن، ايحا-اي،
ولەڭ ايتىپ كوڭلىڭدى كوتەر دەيمىن، الەۋلىم-اي.
ولەڭ ايتىپ كوڭلىڭدى كوتەرمەسەڭ، ايحا-اي،
ويناعانىڭ، كۇلگەنىڭ بەكەر دەيمىن، الەۋلىم-اي.
قايىرماسى:
ارعىماقتىڭ دابىسى-اي،
سايگۇلىكتىڭ شابىسى-اي.
قۇلاعىمنان كەتپەيدى-اي،
قالقاتايدىڭ اي، داۋىسى-اي.
تاۋىپ الدىم اققۋدىڭ جۇمىرتقاسىن، ايحا-اي،
بىزدەن سالەم ايتا بار ۇمىتپاسىن، الەۋلىم-اي.
بىزدەر ايتپاي ولەڭدى كىم ايتادى، ايحا-اي،
سىزدەر مەنەن بىزدەر بوپ جولىققاسىن، الەۋلىم-اي.
قايىرماسى.
قالقاتايىم
باسى ەدى ولەڭىمنىڭ-ەي ايىم-قايىم-ەي،
بىتەدى سازداۋ جەرگە-اۋ تال مەن قايىڭ-ەي
كوپ ايدىڭ كورمەگەلى-ەي ءجۇزى بولدى-ەي،
ءجۇرمىسىڭ امان-ەسەن-اي، قالقاتايىم-اي.
قايىرماسى:
احاي ايىم، قاۋلىلىلايىم،
كەز بولسا وسىندايدا-اي،
قالقاتايىم-اي.
قالقاتاي سەن دەگەندە-ەي نەدەن جازدىم-ەي،
ساباعىن سارىمساقتىڭ-اي بەلدەن قازدىم-اي.
كەتكەندە اۋلىڭ الىس-ەي قيماس قالقام-ەي،
ەسكە الىپ بىرنەشە رەت-اي حاتتار جازدىم-اي.
قايىرماسى.
قالى-كۇلىك-اي
ويىما تۇسپەي وتىر، احاۋ، ولەڭ دەگەن،
قۇلاعىم ولەڭ دەسە ەلەڭدەگەن، احاۋ، يگاگاي.
و، ءتوبا، جەتپىس جاسىڭ، احاۋ، قيىن ەكەن،
بۇرىنعى اۋەنىم جوق دەگەنمەنەن، احاۋ، يگاگاي.
قايىرماسى:
وۋ، كەلد(ى)-اۋ، زامان،
قالدى-اۋ قۇلان،
قالى-كۇلىك-اي.
قاماجاي
باسىندا قاماجايدىڭ ءبىر تال ۇكى،
ايرىلىپ قاماجايدان بولدىم كۇلكى.
ايرىلىپ قاماجايدان وتىرعاندا،
كەلەدى قاي جەرىمنەن ويىن-كۇلكى.
قايىرماسى:
احاۋ حايليلايىم، ليليلايىم،
قاماجاي، قالدىڭ كەيىن، ساۋلەتايىم.
قولىندا قاماجايدىڭ التىن جۇزىك،
قاماجاي وتىر ما ەكەن كوزىن ءسۇزىپ.
كورمەسە جارتى ساعات تۇرالماۋشى ەد،
اپىرماي كەتتى مە ەكەن كۇدەر ءۇزىپ.
قايىرماسى.
ەرتىستىڭ جاعالاۋىن جاعالايمىن،
مۇز بولسا كوك بەستىنى تاعالايمىن.
ءۇش توپتان تاڭداپ العان قاماجايىم،
ءوزىڭدى توقسان قىزعا باعالايمىن.
قايىرماسى.
مال جاقسى جىلقى دەگەن باعىپ جۇرسە،
موينىنا ۇكى-تۇمار تاعىپ جۇرسە.
ىشىنەن ءبىر جورعانى تاڭداپ ءمىنىپ،
اۋلىنا قاماجايدىن بارىپ جۇرسە.
قايىرماسى.
قاناتتالدى
اڭدەردىڭ ۇلى اتاسى «قاناتتالدى»،
ارقادا اڭىراتىپ ساتجان سالدى.
تالدىرىپ، تامىلجىتىپ شىرقاعاندا،
ءۇزىلتىپ، ەستىگەندە جۇرت تاڭقالدى.
گۇل باقشا كوڭىلدى ءبىر اسەم ءاندى،
تىلەيتىن بۇلبۇل ەدىم سايراعاندى،
ءان شىرقاپ بوي جازا الماي، شالقىتا الماي،
قالىقتاپ قايران دۇنيە، قانات تالدى.
ءانىم ەد ءسۇيىپ سالعان «قاناتتالدى»،
بۇل ءانىم بالقىتۋشى ەد تىڭداعاندى.
ومىردەن ءوز ەركىمە ورىن تاپپاي -
كەيىنگە «قاناتتالدى» ءانىم قالدى.
قاراعاي
بوز ىنگەندى، ەندەشە، بوز ىنگەندى،
سويلەيىن دەپ اۋزىما ءسوزىم كەلدى-اۋ.
قاراعاي،
شاۋىپ ءوتتىم ارالاي،
الدى-ارتىما قاراماي.
كىشكەنتايدان بىرگە وسكەن قۇربىم ەدىڭ،
قۇداي ايداپ تىلدەسەر كەزىڭ كەلدى-اۋ.
قاراعاي،
شاۋىپ ءوتتىم ارالاي،
الدى-ارتىما قاراماي.
بوز كەلتىرگەن، تاعى دا بوز كەلتىرگەن،
قيسىق-قيسىق اعاشتى تەز كەلتىرگەن.
قاراق-اي،
قاراعىمنىن، جامالى-اي،
جان كۇيدىرىپ بارادى-اي!
ءبىر كورسەم دەپ ساعىنىپ ءجۇرۋشى ەدىم،
اينالايىن قۇدايدان كوز كەلتىرگەن.
قاراعاي،
جەلىپ ءوتتىم ارالاي،
جان-جاعىما قاراماي.
قاراعىم
قيا جەرگە ورمەكتى قۇرۋشى ەدىم،
شارشاعاندا موينىمدى بۇرۋشى ەدىم.
قايىرماسى:
قاراعىم، قاردان اپپاق تاماعىڭ،
ىزدەسەم، قايدان تابامىن؟
قىزداي مۇڭدىق بار ما ەكەن جەر بەتىندە
شالقي ءتۇسىپ ەلىمدە ءجۇرۋشى ەدىم.
قايىرماسى:
قاراعىم، ارماندا بوپ بارامىن،
ساعىنسام، ەسكە الامىن.
ءوز ەلىمدە ءجۇرۋشى ەم بارقىت ءپىشىپ،
بىرەۋىنەن بىرەۋىن ارتىق پىشىپ.
قايىرماسى.
استىڭ الدىن بەرۋشى ەدى اكە-شەشەم،
ەندى قايتىپ جۇرەمىن سارقىت ءىشىپ.
قايىرماسى.
قاراجورعا
مىنگەنىم دايىم مەنىڭ قاراجورعا،
كەتەدى قانات ءبىتىپ قارا جولدا.
اۋىلى قالقاتايدىڭ قايدا كەتسە،
اداسپاي قاراجورعا بارادى ول دا...
جولىنان قاراجورعا جاڭىلمايدى،
قالقاتاي قالاي عانا تابىلمايدى.
ويلاعان ماقساتىما جەتە الماسام،
باسىمنان اۋىر تۇمان ارىلمايدى.
تاعدىردىڭ تالاي رەت سوقتى جەلى،
اسۋدان ارۋاق، قۇداي وتكىزەدى.
استىمدا امان بولسا قاراجورعا،
جەرىمە جەتەم دەگەن جەتكىزەدى.
قارا كەر جورعا
قولىمدا ءبىر قامشىم بار كۇمىستەنگەن،
كۇمىسىن بۇل شىركىننىڭ كىم ىستەگەن-اي.
تارىداي تال بويىندا ءبىر ءمىنىڭ جوق،
بولا ما سىزدەن ارتىق ءبىلىس دەگەن-اي.
قايىرماسى:
پا، شىركىن،
قارا كەر جورعا.
تيسە قولعا،
كەتەر ەم ساپار شەگىپ
الىس جولعا-اي!
كويلەكتىڭ بۇرمە سالدىم ادىبىنە،
ادامنىڭ كەز كەلمەگىن بادىگىنە-اۋ.
ادامنىڭ كەز كەلتىرسە بادىگىنە،
جەتپەيدى بەس تيىنداي قادىرىڭە-اۋ.
قايىرماسى.
قاراي كەرىم
قولاڭ شاشتى، قوي كوزدى، قيعاش قاسىڭ،
سەنى ويلاسام قينالار عازەز باسىم-اي.
نۇر سيپاتىڭ ەسىمە تۇسكەن سايىن،
تاماعىمنان وتپەيدى ىشكەن اسىم-اي.
قايىرماسى:
قاراي كەرىم،
قاقپان بەلىم.
كۇندە توي، كۇندە جيىن-اي،
جۇرگەن جەرىم-اي.
مىنگەن اتىم استىمدا قاراي كەرىم،
جەر وشاقتاي قازىلار باسقان جەرىڭ-اي.
نۇر سيپاتىڭ ەسىمە تۇسكەن سايىن،
مەن نەسىنە ايايىن اتتىڭ تەرىن-اي.
قايىرماسى.
قاراي كوز
جەر قايدا ەي، سوڭكىل كولدەي جايلاعانعا،
شىڭعىرتىپ-ەي جاس قۇلىنىن بايلاعانعا-اي.
كەلمەيدى ەي، جاتسام ۇيقىم، تۇرسام كۇلكىم،
قالقانى ەي، كەيىن قالعان ويلاعاندا-اي.
قايىرماسى:
قاراي كوز،
كەلسە-اي تەز.
جايدارى-اي، جايماشۋاق.
مىنەزىڭىز-اي.
قاراكوز
قاراكوز، اۋىلىڭ الىس، جەرىڭ شالعاي،
مەن ءجۇرمىن ديدارىڭا ءبىر قانا الماي.
وي تولقىپ، جۇرەك لەبى قۇيقىلجىدى-اۋ،
قوسىلار كۇن بولار ما، اقداريعا-اي.
قايىرماسى:
قاراكوز وتىر گۇل جايناپ،
قاتار بەلبەۋ ءبىر بايلاپ.
شىركىن، ەسكە تۇسكەندە،
كەتەدى ءىشىم زىر قايناپ.
احاۋ، قاراكوز، قالدىڭ كەيىن، مەن نە دەيىن،
قۇشاقتاپ ەندى كورسەم جىبەرمەيمىن.
قاراكوز ۇياداعى اق بالاپان،
ساعىنىپ قاراكوزدى ويعا باتام.
اۋىلىن قاراكوزدىڭ كورگەن بولساڭ،
بەرەيىن سۇيىنشىگە ات پەن شاپان.
قايىرماسى.
قاراكوز وتىر مولدىرەپ،
ەكى بەتى ۇلبىرەپ.
جىبەك شالى موينىندا،
توڭىرەگى جەلبىرەپ.
احاۋ قاراكوز، قالدىڭ كەيىن، مەن نە دەيىن،
قۇشاقتاپ ەندى كورسەم جىبەرمەيمىن.
قارا كوز عاشىق-اي
التايدىڭ ءبىر اسۋىن اسىپ كەلدىم،
جايقالتىپ جاپىراعىن باسىپ كەلدىم.
قايىرماسى:
قارا كوز عاشىق-اي،
باي - التاي اسۋ-اي.
تولىقسىپ قارا كوزىم قۇشاعىمدا،
ارنامنان قوبدا وزەندەي اسىپ كەلدىم.
قايىرماسى.
قارا كوز قۇرعىر گۇل جاينار
ءاي، قاراعىم، اينالايىن قيعاش قاسىڭ،
قيما بەل، جازىق ماڭداي، سۇمبىل شاشىڭ.
ءاي، ەسىمنەن جاتسام-تۇرسام ءبىر شىقپايسىڭ،
وتەدى-اۋ سەنى ويلاسام جارىم جاسىم-اي.
قايىرماسى:
قارا كوز قۇرعىر گۇل جاينار،
كامەل بەلبەۋ ءبىر بايلار.
قارا كوز ەسكە تۇسكەندە.
ەت جۇرەگىم زىر قاينار.
اي، قاراعىم، اينالايىن قارانعانىڭ،
ديدارىڭ اسىل تاستان جارالعانىڭ.
اي، تولىقسىپ تۋعان ايداي نۇرىن شاشىپ،
تۇرلەنىپ توتى قۇستاي تارانعانىڭ.
قايىرماسى.
قارا كوزىم
اۋلىم كوشىپ بارادى بەلدەن اسىپ،
بەلدەن اسقان بۇلتپەنەن ارالاسىپ-اي.
الىس اۋلىڭ كەتكەندە، ءاي قاراعىم،
اق قاعازبەن جۇرەلىك، امانداسىپ-اي.
قايىرماسى:
قارا كوزىم
بار ما ەسىڭدە كەشەگى
ايتقان ءسوزىم-اي.
اۋلىم كوشىپ بارادى لاي كولگە،
شاعي بەشپەنت جاراسار قىناي بەلگە-اي.
اۋلىڭ الىس كەتكەندە قارا كوزىم،
كوز جاسىڭدى كول قىلىپ جىلاي كورمە-اي.
قايىرماسى.
قارعا
قارعام-اۋ، سەن قالايسىڭ مەن دەگەندە،
قۇريدى ىنتىزارىم سەن دەگەندە.
ارشىن ءتوس، الما مويىن، بەۋ قاراعىم،
بال تاتىر سىلەكەيىڭ شولدەگەندە.
قارعام-اۋ، ريزامىن سەرتكە جەتسەڭ،
جەرلەردەن قيىن-قىستاۋ امان وتسەڭ.
بىرگە وسكەن كىشكەنتايدان، قارعاتايىم.
ءوزىڭ ءبىل، عاشىعىڭدى زار ەڭىرەتسەڭ!
قارا قيعاي
تەرىپ جەگەن-اي نەسىبىن-اي ءبىز ءبىر قارعا-اي،
جاراتىلعان-اي ءناسىپسىز ادام بارما-اي؟
دۇنيەنىڭ-اي تۇبىنە-اي جەتكەنىڭشە-اي،
بىلاي بۇرا-اي تارتقانشا سىنادى اربا-اي.
قايىرماسى:
قارا ءبيداي-اي،
قايدا جۇرسەڭ-اي،
امان ءجۇر، قارا قيعاي-اي...
قارا كەردىڭ-اي موينىندا-اي قايىس شىلبىر-اي،
تالعا قونىپ-اي سايرايدى پەينا بۇلبۇل-اي.
سەن وتاردا-اي بولعاندا-اي، مەن سالىقتى-اي ،
اشىپ-جاۋىپ-اي الا الماي بولدىم دىلگىر-اي.
قايىرماسى:
قالقا بالا-اي،
جاڭا ۇيرەتكەن-اي بۇركىتتەي
شالقالاما
قاراتورعاي
(1- ءتۇرى)
قاراعىم، اينالايىن، قارا قاسىم،
جىبەكتەي قارا ماقپال قارا شاشىڭ، ەركەم-اي.
ەلىكتىڭ لاعىنداي ەگىلەمىن،
مولدىرەپ، سەنى ويلاسام، كوزدەن جاسىم، ەركەم-اي.
قايىرماسى:
قاراتورعاي، قاراعىم-اي،
مولدىرەپ، سەنى ويلاسام، كوزدەن جاسىم، ەركەم-اي.
قامىستىڭ ات بايلادىم ساباعىنا،
ادامنىڭ، دوس بولماعىن جامانىنا، ەركەم-اي.
ادامنىڭ دوس بولساڭىز جامانىنا،
دۇشپاننىڭ تاستاپ كەتەر تابانىنا، ەركەم-اي.
قايىرماسى:
قاراتورعاي، قاراعىم-اي،
دۇشپاننىڭ تاستاپ كەتەر تابانىنا، ەركەم-اي.
قاراتورعاي
(2- ءتۇرى)
قۇس بولساڭ جىبەكتەن باۋ تاعار ەدىم،
كۇمىستەن تۇعىرىڭدى جابار ەدىم.
موينىڭا سارى التىننان القا تاعىپ،
قولعا الىپ، سىلاپ-سيپاپ باعار ەدىم.
قايىرماسى:
سالايىن مەن انىمە
قاراتورعاي، قاراتورعاي.
بولعاندا قاسىڭ قارا، شاشىڭ سۇمبىل،
البىراپ ەكى بەتىڭ جانار گۇل-گۇل.
بەيىشتىڭ گۇل جامىلعان سارايىندا،
سايراعان توتى قۇستاي سەن ءبىر بۇلبۇل.
قايىرماسى.
قاراتورعاي
(3- تۇرى)
بولعاندا قاسىڭ قارا، شاشىڭ سۇمبىل-اي،
نۇر تارتىپ كوكتەمىندە اشىلار گۇل.
قولىمدى قايتسەم-داعى جەتكىزەمىن-اي،
سايراعان قاپاستاعى سەن ءبىر بۇلبۇل-اي.
قايىرماسى:
قاراتورعاي، اي، قاراتورعاي!
حاليلاي، حاليليلي
ليليلي، ليليلي، ليليجان!
قۇس بولساڭ جىبەكتەن باۋ تاعار ەدىم،
كۇمىسپەن تۇعىرىڭدى جابار ەدىم.
موينىڭا سارى التىننان القا تاعىپ،
قولعا الىپ سىلاپ-سيپاپ باعار ەدىم.
قايىرماسى.
قاريداش قالقا، ەل قايدا؟
اۋىلىم سوگەتىنىڭ جاعاسىندا،
قارايدى جاقسى ازامات شاماسىنا.
قاريداش قالقا،
ەل قايدا-اي؟
اراسى، جاقسى-جامان جەر مەن كوكتەي،
جاماننىڭ تالاسپايمىن باعاسىنا.
قاريداش قالقا،
ەل قايدا-اي؟
ازامات، مىنا ءسوزدىڭ ارتىن ويلا،
جىبەردىم سەنەن سالەم ناعاشىعا.
قاريداش قالقا،
ەل قايدا-اي؟
قارقارا
باسىڭدا كەرەگەنىڭ ويماق تۇرار،
جىگىتكە كەدەيشىلىك قوي باقتىرار، ۋگاي-اي.
العانى ەر جىگىتتىڭ جاقسى بولسا،
بۇرالىپ تال شىبىقتاي ويناپ تۇرار، ۋگاي-اي.
قايىرماسى:
ۋگاي-اي،
ەل جايلاۋى قارقارا،
مەكەن بولعان قالقاما.
جارمەڭكەدەن ءان سالعان،
بار قىزىعىم، ۋگاي، جانىم، تارقاما.
جاراسقان جامالىنا قارقاراسى،
سۇلۋعا اركىمنىڭ-اق بار تالاسى، ۋگاي-اي.
جىگىتتەر سۇلۋلارعا تالاسپاڭىز،
بۇيىرسا جانى سۇلۋ جار تاباسىز، ۋگاي-اي.
قايىرماسى.
قارلىعاش
جەتەر ءتۇبى-اي، ماقساتقا، اۋ، تۋرا جۇرگەن، اي،
اينالمايدى-اي، دارياعا سۋ دا بىردەن، اي.
شاق بوپ جۇرەر-اي، اركىم ءوز، اۋ، شاماسىنا، اي
ءبىر اكە، ءبىر-اي، شەشەدەن تۋعانمەنەن، اي.
قايىرماسى:
قارلىعاشىم-اي،
قايدا جۇرسەڭ-اي
امان ءجۇر
قارىنداسىم-اي.
سۋ مولايار-اي، بىرتىندەپ، اۋ، اققان سايدا، اي،
قۇرالمايدى-اي، ارامنان تاپقان پايدا، اي.
بىلەك بىرگە-اي، بولعانمەن، اۋ، ساۋساق باسقا، اي،
ءبىر تۋساق تا-اي، بىرگە ءومىر سۇرمەك قايدا، اي.
قايىرماسى:
قارلىعاشىم-اي،
قايدا جۇرسەڭ-اي
امان ءجۇر
قارىنداسىم-اي.
قاۋليليلاي
(1- ءتۇرى)
تاڭ-تاڭ اتار، تاڭ اتار تاڭ جاعىنان،
شاڭ شىعادى قۇلاننىڭ، ويناعىنان، قاۋ-لىلى-لاي.
بەلگە سوققان جىلانداي ءۇش بۇرالىپ،
تۇرار ما ەدىم قالقانىڭ وڭ جاعىنان، قاۋ-لىلى-لاي.
قايىرماسى:
سامال سالقىن جەل سوقسا،
ۇيرەك ۇشىپ، قاز قونسا.
تاڭداپ العان پەريزات،
ساعىنعاندا كەز بولسا.
اينالايىن كوزىڭنەن كۇلىپ تۇرعان،
كورگەن سايىن كوڭىلدى بولىپ تۇرعان، قاۋ-لىلى-لاي.
سىمباتىڭا تاماشا كوڭىلىم تولدى.
كەزەڭ جەردە كەز بولىپ جولىقتىرعان، قاۋ-لىلى-لاي
قايىرماسى.
قاۋليليلاي
(2- ءتۇرى)
جىلقى ايدايمىن كوشكەندە-ەي جالباسپەنەن،
ورتان جىلىك بىتەدى جامباسپەنەن.
قايىرماسى:
قاۋلىلى-لاي،
قايران زامان.
وي دۇنيە-اي.
كورمەگەلى كوپ ايدىڭ-ەي ءجۇزى بولدى.
امان-ەسەن ءجۇرمىسىڭ مال باسپەنەن.
قايىرماسى.
قاۋليليلاي
(3- ءتۇرى)
جىلقىمدى ايداپ سالدىم تەرىسكەيگە،
مال شىركىن ايداماسا ورىستەي مە-اي.
قايىرماسى:
ورىستەي مە قاۋلىلى-لاي،
قاۋ-ليل-لي-لي-لاي-اۋ.
ورىستە مال ىشىندە ءان سالعاندا،
وسى ءانىم شىرقاپ سالعان كەلىسپەي مە-اي.
قايىرماسى.
قيسىڭقا قياسىڭقي
كيگەنىم اياعىما كەبىس ەدى،
قوس كۇرەڭ جىلقى ىشىندە تەبىسەدى.
كۇلداريعا.
تويدا ولەڭ مۇنان بۇرىن ايتقامىن جوق،
ولەڭدى نە دەپ ايتسام كەلىسەدى.
كۇلداريعا.
قيسىڭقا قياسىڭقي قيۋا-قيۋا،
قارلىعاش ماۋە اعاشقا سالار ۇيا.
كۇلداريعا.
قوبدا وزەن
كولدەنەڭ التاي تاۋى سۇلاپ جاتقان.
ساۋلەسىن كورگەن ادام ءبىر قۇمارتقان.
قىس بولسا اق سالدەسىن باسىنا وراپ،
جاپ-جاسىل جازدا ۇستىنە پۇلىس جاپقان.
اڭقىعان ءيسى جۇپار پۇلىسىنىڭ،
سياقتى جۇپار ءيىس مايىن شاشقان.
تاۋەشكى، بۇعى، مارال اڭدارى بار،
ۇكىسى، تۇلكىسىمەن ءۇرىپ جاتقان.
جايقالعان جاعاسىندا جاپىراعى،
ماسايراپ ءتۇرلى قۇستار كۇيگە تارتقان.
قۇلاققا ءۇنى ەستىلىپ قوڭىراۋداي،
بۇلاعى ساي-سايىنان سىلدىر قاققان.
قوجاسى بارلىق سۋدىڭ قاسيەتتى،
اراسان، اقسۋ كەلەر باتىس جاقتان.
تاراعان سول تاۋلاردان سانسىز بۇلاق،
ۇلاسىپ قوبدا وزەن بوپ قۇلاي اققان.
قوعالى-اي
بوزبەتكەيلى-اي ەندەشە، بوزبەتكەيلى، احاۋ،
بوزبەتكەيدەن-اي ەندەشە، مال كەتپەيدى-اي.
قوعالى-اي،
قوڭىر سالقىن-اي،
مالعا جاي.
ءشوبى جۇمساق-اي، شارۋا، ءشوبى شۇيگىن، احاۋ،
باعلانى مىڭعىرعان جەر جەتپەيدى-اي.
قوعالى-اي،
قوڭىر سالقىن-اي،
مالعا جاي.
ماۋسىم-مامىر-اي بولعاندا، ماۋسىم، مامىر، احاۋ،
مال قۇدىقتان سۋ ىشەر ابىر-سابىر-اي.
قوعالى-اي،
قوڭىر سالقىن-اي،
مالعا جاي.
سامال سوقسا قىزىلدان اق داۋىلمەن، احاۋ،
كۇن قىزادى جەر بۋساپ، جاسىل ادىر-اي.
قوعالى-اي،
قوڭىر سالقىن-اي،
مالعا جاي.
قوعالى كول
قوينىنان قۇس ۇشىرعان قوعالى كول،
قوعاسىن سولقىلداتىپ سوعادى جەل.
ءتۇسىرىپ وتكەن كۇندى وزەگىڭە،
قوشتاسىپ قالقاتايمەن قالادى بەل...
قايىرماسى:
قوعالى كول،
سوعادى جەل.
قوشتاسىپ قالقاتايمەن
قالادى بەل...
كەلەتىن قوعالىعا قول ۇستاسىپ،
قوڭىر قاز، كەتكەنىڭ بە الىس قاشىپ.
قايراڭدا قالىپ قويار قايران كوڭىل،
قالعاندا شالالىقپەن شالىس باسىپ.
قايىرماسى.
سەنىمىن سەرگەلدەندە سەرىك بولار،
ەلەسىڭ ەكىندىدە ەرىكتى الار.
كەلتىرەر كولدىڭ كوركىن قۇسپەن بىرگە
كوركەم قىز كوپ كەشىكپەي كەلىپ قالار...
قايىرماسى.
قويشى ءانى
(ءانى مالىك شيپان ۇلى، ولەڭى بۇقارا تىشقانبايەۆ)
قويىم سەمىز بولسىن دەپ تاۋعا باقتىم،
تاۋدىڭ سانى كەلسىن دەپ سىرنايلاتتىم، ساۋلەتاي، ساۋلەتاي.
تاۋ باسىنان ەرتەمەن كەزدەسپەسە،
جاس جۇرەكتىڭ وبالىن ساعان ارتتىم، ساۋلەتاي، ساۋلەتاي.
قايىرماسى:
سىرناي داۋسى تاۋ سانى، شاي-شاي، شاي،
قۇلاعىمنان كەتەر مە.
سىرنايلاتقان ساۋلەتاي، ساۋلەتاي.
قاپ بۇركەندىم باسىما كۇن جاۋعاندا،
سەن كەلەر دەپ قاسىما ءتۇس اۋعاندا، ساۋلەتاي، ساۋلەتاي.
كەلشى، كەلشى، قالقاتاي، قامىقپايىن،
مەن سەندىكپىن دەيتۇعىن سەرتىڭ قايدا، ساۋلەتاي، ساۋلەتاي.
قايىرماسى.
قولاڭ شاش
ايىم دا سەن، قاراعىم، كۇنىم دە سەن، جانىم-اي،
قاسقا تىسىڭ اقسيار كۇلىمدەسەڭ، جانىم-اي.
قايىرماسى:
جاڭا سالعان ءانىم-اي،
قارا ماقپال قولاڭ شاش-اي.
اتتەڭ سەنىڭ ءسانىڭ-اي.
اي مەن كۇندەي جانىمدا سەن جۇرگەندە، جانىم-اي،
اۋىس باسىپ، اداسىپ سۇرىنبەس ەم، جانىم-اي.
قايىرماسى.
قوڭىر جاي
سالدىم سايران قوبدانىڭ احاۋ كۇنبەتىنە.
جازۋ جازدىم اق قاعاز ءبىر بەتىنە.
قايىرماسى:
قالالاقۋ لايلىم
قالالاقۋ لايلىم
قوڭىر جاي.
اقىندىقپەن ولەڭدى ءبىز ايتپايمىز،
كوپشىلىكتىڭ ايتامىز قۇرمەتىنە.
قايىرماسى.
قوڭىرجاي، گۇلجاي
جىگىت بول، جىگىت بولساڭ شىم جىبەكتەي،
ەي، قوڭىرجاي، گۇلجاي،
قاتتىلىق قادالادى تىكەنەكتەي.
اي-حاي.
اقىلىڭ اپلاتونداي بولسا داعى،
ەي، قوڭىرجاي، گۇلجاي،
وڭبايسىڭ ءوز حالقىڭا قىزمەت ەتپەي.
اي-حاي.
پاراپار جاقسى اتاقپەن جىگىت دەگەن،
ەي، قوڭىرجاي، گۇلجاي،
جىگىتكە ەل قارايدى ۇمىتپەنەن
اي-حاي.
جىگىتتى ەل ماقتاعان قىز جاقتايدى،
ەي، قوڭىرجاي، گۇلجاي،
جىگىتتەن قىز سۇيمەگەن كۇدىكتەنەم.
اي-حاي.
قوڭىر قاز، ۇيرەك
جاپالاق جالپىلدايدى جار باسىندا،
نەمەنە جوقتىڭ كۇنى بار قاسىڭدا-اي.
دوس بولىپ قاس قىلعاننان ساقتاعايسىڭ،
قاسقىر دا قاس قىلمايدى جولداسىنا-اي.
قايىرماسى:
قوڭىر قاز، ۇيرەك،
قاناتىن سۇيرەپ.
ءومىرىڭ وتە شىعار،
ءۇي دەپ بۇي دەپ-اي.
دۇنيە داستان،
اۋەل باستان.
اقىلدى دۇشپان جاقسى-اي،
جامان دوستان-اي.
قوس بالا
جەلىسىنە جەل جەتپەس كيىگىم-اي.
اي جۇزىنە قول جەتپەس بيىگىم-اي.
قايىرماسى:
قوس بالا تەڭگەلى-اي،
ءان سالايىق كەل بەرى-اي.
ءبىر جامانعا قور بولىپ كەتە مە دەپ،
قۋ ءىشىمنىڭ ورتەنىپ كۇيۋىن-اي.
قايىرماسى.
قوس كەلىنشەك
قىرانداي ەم قايرىلىپ ەي باۋلىماعان،
قانداي جاننىڭ كوڭىلى اۋدى ماعان.
قوس كەلىنشەك،
جانە اينالىپ، جاناي كەل.
ەگىز كيىك سەكىلدى ەي ەكەۋىم-اي
اينالايىن كوزىڭنەن جاۋدىراعان.
قوس كەلىنشەك،
جانە اينالىپ، جاناي كەل.
قوس كۇرەڭ
كوزىڭنەن اينالايىن، قاراعىم-اي،
قارايمىن ۇرسا ما دەپ قاباعىڭا-ياۋ.
قايىرماسى:
قوس كۇرەڭ قالقا،
كۇندە وينا وسىندايدا-اي.
ەلجىرەپ ءىشى-باۋىرىم بارا جاتىر-اي،
كورىنگەن ساعىمداي بوپ تاماعىڭا-ياۋ.
قايىرماسى.
قوس كۇرەڭ تەڭگەلى-اي
اياعىما كيگەنىم كەبىس ەدى.
جىلقى ىشىندە قوس كۇرەڭ تەبىسەدى.
قايىرماسى:
ەي، قوس كۇرەڭ تەڭگەلى-اي،
ءان سالايىق كەل بەرى-اي.
شىتىرا كويلەك سىلقىلداق،
سال وزىمدەي بىلقىلداپ.
مۇنان بۇرىن ولەڭدى ايتقانىم جوق،
نە دەپ ايتسام ولەڭدى كەلىسەدى.
قايىرماسى.
قوس قالقا
(1- ءتۇرى)
قاراعىم، اينالايىن، اينام جاقسى،
تيگىزبە زالالىندى، پايداڭ جاقسى.
قايىرماسى:
ساۋلەم، قوس قالقا،
ۇكىلى كامشات بوركىڭ-اي،
قارا كوز قىز اق ماڭداي.
كەزدەسكەن جاقسىمەنەن جارتى ساعات،
بالقىعان قورعاسىنداي قايران جاقسى.
قايىرماسى:
ساۋلەم، قوس قالقا،
التىننان سىرعا، القا بەل،
ساعىندىم، جاستىق، قايتا كەل.
بولعاندا التىن - باسىڭ، قۇندىز - شاشىڭ،
يىلگەن اي سەكىلدى ەكى قاسىڭ.
قايىرماسى.
كەتپەسىن وسى سسوزىم قوشەمەتكە،
ەل-جۇرتقا ءازىز بولسىن سەنىڭ باسىڭ.
قايىرماسى.
قوس قالقا
(2- ءتۇرى)
تۇيە سۇلۋ كورىنەر تايلاعىمەن،
قازان سۇلۋ كورىنەر قايماعىمەن، ەي.
ەي، ءالدي اللا.
قوس قالقا اۋلىڭ قايدا-اۋ.
كورمەسەم دە ءوزىڭدى ەستۋشى ەدىم،
امانبىسىڭ كۇللى اۋىل ايماعىڭمەن.
ەي، ءالدي اللا،
قوس قالقا، اۋلىڭ قايدا-اي.
اسەم ءۇي كوپ قالادا اق تاقتايلى،
جاقسى ايعىردىڭ ءۇيىرىن ات جاقتايدى.
ەي، ءالدي اللا،
قوس قالقا، اۋلىڭ قايدا-اي.
مەن اتىڭدى كوپ ەستىپ، كوردىم قازىر،
سىرتىڭىزدان ءار-اركىم كوپ ماقتايدى.
ەي، ءالدي اللا،
قوس قالقا، اۋلىڭ قايدا-اي.
قوس قارا كوز
دايىم مەنىڭ مىنگەنىم كۇرەڭ اردا،
اردانداتىپ ءجۇرۋشى ەك اقشا قاردا.
قازداي قالقىپ ءجۇرۋشى ەك ايدىن كولدە،
كەشەگى قالقاتايدىڭ اۋىلى باردا.
قايىرماسى:
قوس قارا كوز ايداي،
ءوزىڭ دە ويلان احا-حاي.
ايتپاي بولماس ولەڭدى ۇيرەنگەن سوڭ،
قىلعان قايىرىڭ سەل بولار كۇڭىرەڭگەن سوڭ.
ارپا جەگەن اتتايىن اڭسايدى ەكەن،
ءوز قۇربىڭمەن ءبىر ءجۇرىپ، ۇيرەنگەن سوڭ.
قايىرماسى.
قۇلا جەكەي
دەگەندە قۇلا جەكەي، قۋانامىن،
كورگەندە ءبىراز قىزىق جۇبانامىن.
قۇدايدىڭ بەرگەنىنە شۇكىر ايتىپ،
تاعدىردىڭ سالعانىنا شىداعامىن.
قايىرماسى:
وۋ، زامانىم-اي،
وۋ، كەڭ دالام كەرىم،
اۋ، سامعاعان جەرىم.
دەگەندە قۇلا جەكەي، شاتتانامىن،
جاقسىنى بۇدان ارتىق تاپپاعامىن.
تاستاماس دەپ ويلايمىن جول ورتادا،
ماپەلەپ جاس بالاداي باپتاعانىم.
قايىرماسى.
قۇرباۋجاي
كورگەن جەردە-اق وزىڭە بولدىم عاشىك،
احا-حاي،
بىلدىرمەدىم الاشقا اۋزىمدى اشىپ،
قۇرباۋجاي.
بال-شەكەرگە مالىنعان التىن قاسىق،
احا-حاي،
ءسويتىپ قاشان جۇرەمىز ارالاسىپ،.
قۇرباۋجاي.
قايىرماسى:
ايىڭ جارىق، ءيتىڭ ساق
ەبىن تاۋىپ ويناساق.
كەۋدەشەڭدى قوس الما قۋىستاعان،
احا-حاي،
ءبىر شىعادى قۇماردان ۋىستاعان،
قۇرباۋجاي.
بەينەڭنەن مەن كوز الماي ءبىر كەلەمىن،
احا-حاي،
ءبىر قاراشى تىم بولسا دۇرىس ماعان.
قۇرباۋجاي.
قايىرماسى:
ايىڭ جارىق، يتىڭ ساق،
ەبىن تاۋىپ ويناساق.
قۇربىلاس سىرتىڭنان
قولىما قالام الىپ، وۋ، جازامىن حات،
بولسام دا ءوزىم ارزان، ءسوزىم قىمبات، قۇربىلاس سىرتىڭنان.
ءوزىڭدى كورمەگەلى، وۋ، كوپ كۇن بولدى،
ءجۇرسىن بە ەسەن-امان، ەكى اسىل زات، قۇربىلاس سىرتىڭنان.
قايىرماسى:
عاشىق ەدىم بىلتىردان،
تاماشاڭا تاڭ قالىپ،
تالاي قۇربىم ۇمتىلعان.
مىنگەنىم استىمداعى، وۋ، تورىشا اتىم،
مىنەدى بوس تارتپالاپ ورىس اتىن، قۇربىلاس سىرتىڭنان.
ءوزىڭدى كورىپ جۇرگەن، وۋ، كوپتەن بەرى،
بارادى سەندە كەتىپ قونىس اقىم، قۇربىلاس سىرتىڭنان.
قايىرماسى.
قۇربىم-اي
(1- ءتۇرى)
تويلاۋ بازار، توي بازار تويلاي كەلدىم،
التىن ساقا قولعا الىپ ويناي كەلدىم،
قۇربىم-اي،
تامىرىم جوق بۇل تويدا، تانىسىم جوق،
ايتىسام دەپ وزىڭمەن ويلاي كەلدىم،
قۇربىم-اي.
قايىرماسى:
اسەم كومەي بۇلبۇل-اي،
ءان ەركەسى ءدۇلدۇل-اي
كەر مارالداي كەرىلگەن،
الما مويىن قۇرعىر-اي.
قۇربىم-اي
(2- ءتۇرى)
جىلقى ىشىندە جۇرەلىك دومبىرا الىپ،
ءبىر شەبەرگە تيەگىن جوندىرالىق،
قۇربىم-اي.
شىن كوڭىلىڭ، شىن پەيىلىڭ مەندە بولسا،
ەكى اۋىلدى ءبىر جەرگە قوندىرالىق،
قۇربىم-اي.
قايىرماسى:
سۋ اعادى ارىقتان،
قىز قارايدى جابىقتان.
سۇيەر ەدىم بەتىڭنەن،
ۇيالامىن حالىقتان.
ەسىك الدى بۇلدىرگەن،
قىز بەن جىگىت ءبىر جۇرگەن.
ەبىن تاۋىپ ويناسا،
قىز بەتىنەن سۇيدىرگەن.
قۇربىم-اي
(3- ءتۇرى)
قۇربى ءسانى كەلمەيدى ويناپ-كۇلمەي-ەي،
قىزدىڭ ءسانى كەلمەيدى بارشا كيمەي،
قۇربىم-اي.
الىستاعى ماحاببات ارمان بولار-ەي،
ەكى عاشىق سىرلاسىپ بىرگە جۇرمەي،
قۇربىم-اي.
جاس قارتايار، قارتايماس قۇربى كوڭىل-ەي،
قۇربىسىز كۇن نە كەرەك قۇرىسىن ءومىر،
قۇربىم-اي.
قيماس قۇربى تۋىستان بولار جاقسى-ەي،
قۇربىڭ كەلسە كوڭىلدەن اشىلار سىر،
قۇربىم-اي.
بۇل ومىردە نە تاتۋ، قۇربى تاتۋ-ەي،
ءبىر-بىرىنە ءازىلىن ەتەر تارتۋ،
قۇربىم-اي.
سىيلاسپايتىن پاندەمەن ءسوز بايلاسپا-ەي،
اسىل كۇلكىڭ اياعى بولار اشۋ،
قۇربىم-اي.
قۇربىم-اي
(4- ءتۇرى)
ءسان بولمايدى جۇيرىككە قامشىلاعان،
ءزام-ءزام ارتىق داريادان تامشىلاعان،
قۇربىم-اي.
وتىز ۇيرەك، قىرىق قاز السا داعى،
ءناسىلى ارتىق سۇڭقاردىڭ قارشىعادان،
قۇربىم-اي.
قايىرماسى:
ساياحاتتا ەلدەرى،
سامال سالقىن بەلدەرى.
ۇيرەك ۇشىپ، قاز قونعان،
داريا شالقار كولدەرى-اي.
سايرانداپ سال ايدايمىز،
شالقار كولدى جايلايمىز.
امان-ەسەن شىققان سوڭ،
ساۋىق قۇرىپ وينايمىز.
قۇربىم-اي
(5- ءتۇرى)
سەن ار جاقتا قالقاتاي-ەي،
مەن بەر جاقتا، قۇربىم-اي.
كەرى ارعىماق شۇلعيدى اي قۇربىم-اي،
باۋشارباقتا، قۇربىم-اي.
قۇنان اتان قولىمدا، ەي ءسۇيىنشىم بار، قۇربىم-اي
قالقاتايدىڭ اۋىلى اي، قۇربىم-اي، ءدال قاي جاقتا، قۇربىم-اي.
ءبىر بايتەرەك جاهاندا، ەي ەگىلەدى، قۇربىم-اي،
جاپىراعى جەل سوقسا اي، قۇربىم-اي، توگىلەدى، قۇربىم-اي.
اۋلىڭ الىس كەتكەندە، ەي قالقاتاي، قۇربىم-اي،
سىنباسا دا قابىرعام اي، قۇربىم-اي، سوگىلەدى، قۇربىم-اي.
قۇربىم-اي
(6- ءتۇرى)
ءبىر قامشىم بار قولىمدا التىنداعان،
ۇستاي الماي كەي ادام قالتىلداعان.
كىشكەنتايدان بىرگە وسكەن اتتەڭ قۇربىم،
اينالايىن كوزىڭنەن جالتىلداعان.
قايىرماسى:
قۇربىم-اي،
قۇر سوزىڭمەن ءجۇرمىن-اي،
وتەر داۋرەن ءبىر كۇنى-اي.
كۇن شىعادى اسپاننان التىن اراي،
قۇربىدا دا قۇربى بار تالاي-تالاي.
جاتسام ۇيقىم كەلمەيدى سەنى ويلاسام،
كوزىم تالدى جولىڭا قاراي-قاراي.
قايىرماسى.
قۇربىم-اي
(7- ءتۇرى)
مايدا قول جىگىت بولساڭ، ال جىبەكتى-اي،
جاراماس قاتتى قولى تىكەنەكتەي-اي،
قۇربىم-اي.
بوس بەلبەۋ، بوتا تىرسەك بوزبالا كوپ-اي،
بولمايدى جىگىت جارقىن سىننان وتپەي-اي،
قۇربىم-اي.
قايىرماسى:
سىپىرا قايىڭ، شوق تالداي،
وسى انگە سال توقتالماي.
كوڭىلىندەگى كىسىڭ بولسا،
شاقىرىپ قاسىڭا ال توقتالماي.
قاراويدىڭ قاڭباق ۇشار جەلىمەنەن-اي،
وزەننىڭ مۇز قاتادى سەلىمەنەن-اي،
قۇربىم-اي.
كارى مەن جاس ويناسا جاراسپايدى-اي،
اركىمدى السىن قۇداي تەڭىمەنەن-اي،
قۇربىم-اي.
قايىرماسى.
قۇربىشىم-اي
الما مويىن الا ۇيرەك ۇشار سايدان، وي-اۋ،
بوزتورعايدىڭ اجالى-اۋ كۇيكەنتايدان-اي.
ەكى بالا قۇربىشىم-اي.
ەسەن دە امان ءجۇرمىسىڭ-اي.
ولەڭ داۋسىن ساعىنىپ جۇرگەنىمدە، وي-اۋ،
الا ۇيرەك، الما مويىن اۋ كەلدىڭ قايدان.
ەكى بالا قۇربىشىم-اي
ەسەن دە امان ءجۇرمىسىڭ-اي.
جاندا امانات جۇرگەندە، مالدا امانات، وي-اۋ،
بىرەۋ قۇيرىق بولعاندا، بىرەۋ قانات.
ەكى دە بالا قۇربىشىم-اي،
ەسەن دە امان ءجۇرمىسىڭ-اي.
كورىسكەلى كورگەلى كەلدىك جاڭا، وي-اۋ،
امان-ەسەن ءجۇرسىڭ بە ساۋ-سالەمەت.
ەكى دە بالا قۇربىشىم اي،
ەسەن دە امان ءجۇرمىسىڭ-اي.
