قازاق ءتىلىن جەتىك بىلەتىن شاڭحايلىق «قۇرالاي» - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
الەمدىك جىراۋلار حيۋادا ونەر كورسەتتى - ءوز ا
26- 28 -ءساۋىر ارالىعىندا حورەزمدە وتكەن IV حالىقارالىق جىراۋلار فەستيۆالىنە الەمنىڭ 40 تان استام ەلىنەن 200 گە جۋىق تانىمال جىراۋ قاتىستى. بۇل تۋرالى وسى اپتادا «ءوز ا» اقپارات اگەنتتىگى مالىمدەدى.
حابارلامادا ايتىلۋىنشا، فەستيۆال اياسىندا «ەكىنشى تۇركى الەمى مادەنيەتى فورۋمى» جانە «جاڭا وزبەكستانداعى جىراۋلىق ونەر: زاماناۋي زەرتتەۋلەر مەن بولاشاعى» اتتى حالىقارالىق عىلىمي- تاجىريبەلىك كونفەرەنتسيا ۇيىمداستىرىلعان.
فورۋم قورىتىندىسىندا جىراۋلىق ونەردىڭ بولاشاعىنا قاتىستى ماڭىزدى قارار قابىلداندى.
سونداي-اق اقپاراتتا فەستيۆالدىڭ قورتىندى ناتيجەلەرى جاريالانعان.
اتاپ ايتقاندا 3-ورىندى - يحاگۆاسۋرەن لحامراگچا (موڭعوليا)، ستەپانوۆا اكسينيا (رەسەي)، احمەدوۆ زيديللو (وزبەكستان) يەلەنسە، 2-ورىن ابدۋللايەۆ ۋسمونجون (وزبەكستان) مەن كۇنسۇلۋ تۇرىكپەنگە (قازاقستان) بۇيىردى. ال 1-ورىندى وزبەكستاندىق مۋياسسار جۋماتوۆا مەن تۇرىكمەنستاننىڭ ۇلتتىق جىراۋلار ءانسامبلى يەلەنگەن. گران- پري - ءازىربايجاننىڭ «عاشىقتار» توبىنا بۇيىرعان.
سونداي-اق وسى اپتادا «ءوز ا» اقپارات اگەنتتىگىندە «وزبەكستاندا 10 جىلدا شەتەلدىك ستۋدەنتتەر سانى 18 ەسە ارتتى» دەگەن تاقىرىپتاعى اقپارات جاريالاندى.
اتالعان ب ا ق-تىڭ دەرەگىنشە، 2024- 2025 وقۋ جىلىنىڭ باسىندا رەسپۋبليكاداعى جوعارى وقۋ ورىندارىندا ءبىلىم الىپ جاتقان شەتەلدىك ستۋدەنتتەردىڭ جالپى سانى 12,5 مىڭ ادامدى قۇرادى.
ۇلتتىق ستاتيستيكا كوميتەتىنىڭ مالىمەتىنشە، بۇل كورسەتكىش 10 جىل بۇرىنعى دەڭگەيمەن سالىستىرعاندا شامامەن 18 ەسەگە كوپ.
قازاق ءتىلىن جەتىك بىلەتىن ۆان جينشۋان - CNR
قازاق ءتىلىن بىلەتىن ۆان جينشۋان «كوپ ءتىل ءبىلۋ مەنىڭ ءومىر جولىمدى نۇرلاندىردى» دەيدى.
بۇل تۋرالى وسى اپتادا قىتايدىڭ «ورتالىق حالىق راديوسى» حابارلادى.
«سالەمەتسىزبە، مەنىڭ اتىم قۇرالاي، - دەپ امانداستى شاڭحاي شەتەل تىلدەر ۋنيۆەرسيتەتىندە قازاق ءتىلى ماماندىعىن وقىپ جۇرگەن ستۋدەنت ۆان جينشۋان.
قىتايلىق ب ا ق- تىڭ دەرەگىنشە، ونىڭ قازاق ءتىلىن ۇيرەنگەنىنە ءتورت جىل بولعان.
- ۆان جينشۋان قازاقشا ەركىن سويلەيدى، ءتىپتى ماقال-ماتەلدەردى ماعىناسىمەن ءتۇسىندىرىپ ايتقاندا ءبىزدى تاڭعالدىردى، تولىعىن ۆيدەودان كورىڭىزدەر، - دەپ جازادى «ورتالىق حالىق راديوسى».
قىتايدا نار مەن تۇيەنىڭ ارالاس ءناسىلدى بوتاسى دۇنيەگە كەلدى - «حالىق گازەتى»
قىتايدا نار مەن تۇيەنىڭ بۋدانداسقان بوتاسى دۇنيەگە كەلدى. بۇل شۇبات وندىرىسىندەگى تۇيىتكىلدى شەشۋگە سەپتىگىن تيگىزەدى، دەپ حابارلايدى «حالىق گازەتى» باسىلىمى.
اتالعان ب ا ق- تىڭ دەرەگىنە سۇيەنسەك,2025 -جىلدىڭ ساۋىرىندە ىشكى موڭعولدىڭ الاشان دەگەن جەرىندە قىتايداعى نار مەن قوس وركەشتى تۇيەنى بۋدانداستىرىلعان 5 وركەشتى بوتا ومىرگە كەلدى. بۇل تۇيە ءسۇتىنىڭ جوعارى ءونىمدى گەندەرىن زەرتتەۋدەگى ۇلكەن جەتىستىك بولدى.
«حالىق گازەتى» باسىلىمىنىڭ دەرەگىنشە، الاشانعا قاراستى الاتەن وڭىرىندەگى ونىمدىلىگى جوعارى ءسۇتتى تۇيە ءوسىرۋ بازاسىندا ون جىلعا جۋىق زەرتتەۋلەردەن كەيىن عالىمدار ەمبريونداردى تاسىمالداۋ تەحنولوگياسى ارقىلى نار گەندەرىن ەنگىزدى. قوس وركەشتى تۇيە سياقتى قورشاعان ورتاعا بەيىمدەلە الاتىن تۇلىكتەر مەن كۇنىنە كوپ ءسۇت بەرەتىن ناردىڭ ەرەكشەلىگىنە يە ارالاس تۇقىمدى تۇيە بوتاسىن ومىرگە اكەلدى. ناردىڭ ورتاشا تاۋلىكتىك ءسۇت ءوندىرىسى 15 ك گ(ليتر) قۇرايدى. ال قوس وركەشتى تۇيە تاۋلىگىنە نەبارى 2,5-3,5 ك گ ءسۇت بەرەدى. بۇل بۋدانداستىرۋدىڭ جەتىستىگى تۇيە ونەركاسىبىنە جاڭا سەرپىن بەردى.
- ەلدەگى قوس وركەشتى تۇيەنىڭ نەگىزگى وندىرىستىك ايماعى بولعان الاشاندا 68000 تۇيە بار. بۇل ءوڭىر رەسۋرستاردىڭ ارتىقشىلىقتارىنا سۇيەنە وتىرىپ، «عىلىمي زەرتتەۋلەر+اسىلداندىرۋ+وڭدەۋدىڭ» تۇتاس ونەركاسىپتىك تىزبەگىن قۇردى. زەرتتەۋ توبى ءبىر جىل ىشىندە 10 بوتانى، كەلەسى جىلى 40 بۋدانداسقان بوتانى ءوسىرۋدى جوسپارلاپ وتىر. عالىمدار قوس وركەشتى تۇيەنىڭ ءسۇت ءوندىرىسىن 3,5 ك گ- نان 7 ك گ- عا دەيىن ارتتىرۋدى جانە تۇيە ءسۇتىن كەڭ كولەمدە ءوندىرۋدى وڭتايلاندىرۋدى ماقسات ەتەدى، - دەپ جازادى قىتايلىق ب ا ق.
يران تراكتورى 25 ەلگە ەكسپورتتالادى - ParsToday
اۋىل شارۋاشىلىعى ءوندىرىستىڭ ماڭىزدى سالالارىنىڭ ءبىرى رەتىندە ەكونوميكالىق دامۋدا ماڭىزدى ءرول اتقارادى. سوندىقتان بۇل ماقساتتى جۇزەگە اسىرۋدا اۋىل شارۋاشىلىعىمەن بايلانىستى سالالار دا ەرەكشە ءرول اتقارادى. اۋىل شارۋاشىلىعى سالاسىنا قاتىستى سالانىڭ ءبىرى - وسى سالاداعى تەحنيكا، ونىڭ ىشىندە تراكتور شىعارۋ. اۋىلشارۋاشىلىق ماشينالارىن جاساۋ يراننىڭ نەگىزگى ونەركاسىپتەرىنىڭ ءبىرى سانالادى. ول وسى سالانىڭ، سونىڭ ىشىندە تراكتورلاردىڭ وندىرىسىندە ايتارلىقتاي جەتىستىكتەرگە جەتتى، دەپ جازدى ParsToday اقپارات اگەنتتىگى.
اتالعان اقپارات اگەنتتىگىنىڭ مالىمەتى بويىنشا، يراننىڭ تراكتور ءوندىرۋ ونەركاسىپ توبى يرانداعى ەڭ ءىرى اۋىلشارۋاشىلىق تەحنيكاسىن ءوندىرۋشى رەتىندە وسى ۋاقىتقا دەيىن ءوز ونىمدەرىن ازيا، ەۋروپا، افريكا جانە لاتىن امەريكاسىنىڭ 25 ەلىنە ەكسپورتتادى.
كەلتىرىلگەن دەرەكتەرگە سۇيەنسەك، يراننىڭ تراكتور ونىمدەرى ءارتۇرلى ەلدەرگە، سونىڭ ىشىندە گەرمانيا، فرانسيا، يتاليا، رەسەي، تۇركيا، يراك، اۋعانستان، ازەربايجان، ۆەنەسۋەلا جانە كەيبىر افريكا ەلدەرىنە ەكسپورتتالادى. كورشى ەلدەردە يران اۋىلشارۋاشىلىق تەحنيكاسىنا دەگەن نارىق قاجەتتىلىگىنىڭ ايتارلىقتاي بولىگىن وتەي الدى. مىسالى، يراك پەن اۋعانستاننىڭ تراكتورعا دەگەن قاجەتتىلىگىنىڭ 70-80 پايىزىن يران قامتاماسىز ەتەدى.
سونداي-اق وسى اپتادا ParsToday-دە «Times Asia رەيتينگىندە يراننىڭ 81 ۋنيۆەرسيتەتى» دەگەن تاقىرىپتاعى اقپاراتى جارىق كوردى.
81 ۋنيۆەرسيتەتىمەن يران Times Asian University Rankings رەيتينگىندە يسلام ەلدەرى اراسىندا تۇركيادان كەيىنگى ەكىنشى ورىندى يەلەنگەن.
يراندىق باسىلىمنىڭ دەرەگىنشە، Times Higher Education World University Rankings حالىقارالىق رەيتينگتىك جۇيەنىڭ ءبىرى بولىپ تابىلادى، ول 2013 -جىلى ازيا ۋنيۆەرسيتەتتەرىن حالىقارالىق رەيتينگتەرىمەن قاتار العاش رەت باعالادى.
ParsToday اقپارات اگەنتتىگىنىڭ Mehr اقپارات اگەنتتىگىنە سىلتەمە جاساپ حابارلاۋى بويىنشا، يسلام الەمى عىلىم جانە تەحنولوگيا دايەكسوز جانە مونيتورينگ ينستيتۋتىنىڭ (ISC) باسشىسى مۇحامماد ءماھدي الاۆيان مەحر مالىمدەگەن. ونىڭ ايتۋىنشا، 2025 -جىلى ازيا ۋنيۆەرسيتەتتەرىنىڭ رەيتينگى تۋرالى سوڭعى ەسەپتە يراننىڭ 81 ۋنيۆەرسيتەتى كىردى، ونىڭ ىشىندە يران يسلام رەسپۋبليكاسىنىڭ 4 ۋنيۆەرسيتەتى 100 ۇزدىك جوعارى وقۋ ورىندارىنىڭ قاتارىندا بولدى.
وسمانلى داۋىرىندە سالىنعان كارتينا لوندوندا 1,3 ميلليون دوللارعا ساتىلدى - TRT
19-عاسىردا ءومىر سۇرگەن وسمانلى سۋرەتشىسى وسمان حامدي بەيدىڭ جاقىندا تابىلعان كارتيناسى لوندوندا وتكەن اۋكسيوندا 1 ميلليون فۋنت ستەرلينگكە (1,3 ميلليون ا ق ش دوللارى) ساتىلىپ، كوللەكتسيونەرلەر مەن مەكەمەلەردىڭ ۇلكەن قىزىعۋشىلىعىن تۋدىردى.
1881 -جىلعى «كوفە دايىنداۋ» تۋىندىسى وسمانلى ونەرىنىڭ جاھاندىق ارەناداعى تاريحي ءساتىن بىلدىرەتىن ەڭ قۇندى تۋىندى رەتىندە ەرەكشەلەنەدى.
بۇل تۋرالى وسى اپتادا تۇركيا راديو تەليەۆيزيا پورتالى حابارلادى.
«TRT» - نىڭ دەرەگىنشە، 1881 -جىلى سالىنعان «كوفە دايىنداۋ» اتتى بۇل تۋىندى ەۋروپاداعى جەكە كوللەكتسيالاردا ءبىر عاسىردان استام ۋاقىت بويى ساقتالىپ، قايتا جارىققا شىقتى. تۋىندى سول كەزدەگى تانىمال فوتوگرافتار جان پاسكال سەبا مەن پوليكارپ جوايلە تۇسىرگەن اق- قارا فوتوسۋرەت ارقىلى بەلگىلى بولاتىن.
50 كارتينا لەزدە ساتىلعان اۋكتسيوندا «كوفە دايىنداۋ» تۋىندىسى جوعارى باعالاندى. كارتينانى سەيسەنبى كۇنى تەلەفون ارقىلى ءوتىنىم بەرگەن ءانونيمدى ساتىپ الۋشى العان.
ايتا كەتەيىك، تۋىندىنى العاش رەت شامامەن 1910 -جىلى گرۋزيالىق ونەر كوللەكتسيونەرى حانزادا سادىق ياديگاروۆ ساتىپ العان. ودان كەيىن كارتينا ونىڭ ۇلى ارچيلگە، كەيىن 1930 -جىلدارى ۆەناداعى ارچيلدىڭ تۋىسىنا وتكەن. كارتينا 2008 -جىلعا دەيىن مۇراگەرلىك جولمەن ساقتالىپ كەلگەن.
بەيسەن سۇلتان ۇلى
