قازاق ءتىلدى It ستارتاپتارعا گرانت بەرىلەدى
استانا. KAZINFORM - سيفرلىق دامۋ مينيسترلىگىنىڭ Digital Bridge جوباسىنىڭ اياسىندا قازاق ءتىلدى It- ستارتاپتارعا گرانت بەرىلمەكشى. حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى ۆەدومستۆو باسشىلىعىمەن وسىنداي كەلىسىمگە كەلگەنىن ايتادى.
- بۇعان دەيىن سيفرلىق دامۋ مينيسترلىگىنىڭ قولداۋىمەن Digital Bridge دەگەن ۇلكەن ءىس- شارا ءوتتى. سول شارانىڭ ءبىر سەسسياسىن قازاق ءتىلى مەن جاساندى زەردە تاقىرىبىنا ارنادىق. ول كەزدەگى مينيستر باعدات مۋسين - «قازاق ءتىلى» قوعامى ورتالىق كەڭەسىنىڭ مۇشەسى. قازىر قىزمەتى اۋىسقانمەن ۋادەسى بار. مينيسترلىكتىڭ قازىرگى باسشىلىعى دا قارسى ەمەس. ءبىز بۇل جەردە دانەكەر بولىپ، مينيسترلىك ۇسىنىپ وتىرعان گرانتتاردىڭ ىشىنە ءبىر تاقىرىپ رەتىندە قازاقشا ستارتاپتاردى قوسقىمىز كەلەدى. گرانتتىق باعدارلاما بار، جاڭادان ويلاپ تابۋدىڭ قاجەتى جوق. تەك ەرەجەسىن ەنگىزىپ، قازاق ءتىلدى جوبالاردى بولەك بايقاۋدا سىناۋىمىز كەرەك. بىلتىر قىرىق شاقتى جوبانىڭ شارۋاسىمەن ءجۇرىپ، ۋاقىت بولە الماعان ەدىك. بيىل وسى ماسەلەگە قايتىپ كەلەمىز، - دەيدى راۋان كەنجەحان ۇلى.
سونداي-اق ول حالىقارالىق «قازاق ءتىلى» قوعامىنىڭ قولىندا قازاق ءتىلىن قۇرىلىس، كوممۋنالدىق شارۋاشىلىق، جەر قويناۋىن پايدالانۋ، ونەركاسىپ سياقتى سالالاردىڭ ءتىلى ەتۋگە لايىقتى جوباسى بار ادامدارعا قولداۋ كورسەتەتىن مۇمكىندىك بار ەكەنىن ايتادى.
- كورسەتىلەتىن قولداۋدىڭ كولەمى مەن مولشەرى ۇسىناتىن جوباسىنىڭ اۋقىمىنا بايلانىستى. بۇكىل شارۋانى ىسىرىپ قويىپ، تەك قانا وسىمەن اينالىسامىن دەسە، جوباسىنىڭ مەرزىمى مەن قۇنىن ناقتى ايتسا، جولىن بىرگە تابامىز. ويتكەنى دەمەۋشىلىك دەگەندە، ءوز قالتامىزدان سۋىرىپ الىپ بەرە سالمايمىز. قۇرىلىس سالاسىن قازاقشا سويلەتەمىن دەسە، قۇرىلىس كومپانيالارىنىڭ باسشىلارىمەن سويلەسەمىز. مينيستر دە ۋادەسىن بەردى. ءبىزدىڭ قىزمەتىمىز دانەكەرلىك جاساپ، كەپىل بولۋ دەپ سانايمىز. ساپاسىنا كۇش سالىپ، قاداعالاۋدى ءوز موينىمىزعا الامىز. قۇرىلىسقا عانا ەمەس، كەز كەلگەن سالاعا وسىنداي ۇستانىممەن قارايمىز، - دەدى قوعامنىڭ پرەزيدەنتى.
