قازالىداعى 164 جىلدىق تاريحى بار عيمارات تۋرالى نە بىلەمىز
قىزىلوردا. KAZINFORM - قىزىلوردا وبلىسىنىڭ قازالى اۋدانىنداعى 16-مەكتەپ- ليتسەي عيماراتى 164 جىل بۇرىن سالىنعان.

تاريحي دەرەكتەرگە سۇيەنسەك، مەكتەپتىڭ العاشقى عيماراتى قوعامدىق باستاما نەگىزىندە 1860 -جىلى بوي كوتەرگەن. پاتشالىق رەسەي وفيتسەرى ا. الەكسەيەۆ پەن ءدىندار ن. ەفگرادوۆ ونى 2 سىنىپتىق ورىس مەكتەبى ەتىپ اشقان. ۋەزد باستىعى گلوبوۆتىڭ تۇركىستان گەنەرال- گۋبەرناتورىنا جازعان حاتىندا مەكتەپتە وقۋ، گرامماتيكا، اريفمەتيكا جانە دىنگە تابىنۋ پاندەرى وقىتىلعانى تۋرالى جازىلعان. مەكتەپ 1872 -جىلى قالالىق ۋچيليشەگە، 1878 -جىلى 2 سىنىپتىق قولونەر ۋچيليشەسىنە اينالعان.


- ال جاڭا عيماراتى 1912 -جىلى كۇيدىرىلگەن كىرپىشتەن تۇرعىزىلعان. قۇرىلىسقا كەلىمسەك وزبەك شەبەرلەرى جۇمىلدىرىلعان. وعان ۋەزد تۇرعىندارى سالىق جيناپ، قارجى قۇيعان. بريگاداعا سول كەزدەگى تۇركىستان ا س س ر ۇلتتىق ىستەر جونىندەگى كوميتەت باستىعىنىڭ ورىنباسارى سۇلتانقوجا قوسىمقوجايەۆ باسشىلىق جاساعان. 1984 -جىلى تاريحي عيماراتتى «كازپروەكترەستاۆراتسيا» ينستيتۋتى ەسەپكە الىپ، قۇجاتتارىن دايىنداعان، - دەدى قازالى قالاسىنداعى ع. مۇراتبايەۆ مەموريالدىق مۋزەيىنىڭ مەڭگەرۋشىسى روزا اسانوۆا.
مەكتەپ ورىس- تۇزەم ۋچيليشەسى دەپ اتالدى. 1938 -جىلى ءبىلىم وشاعىنا ورىس جازۋشىسى ماكسيم گوركيدىڭ ەسىمى بەرىلدى.
تاريحي مەكتەپتە 1914-1917 -جىلدارى شىعىس قازاقستان مەن ورتا ازيا جاستارىنىڭ جالىندى جەتەكشىسى، كوممۋنيستىك جاستار ينتەرناتسيونالى شىعىس ءبولىمىنىڭ مەڭگەرۋشىسى، «جاس الاش» گازەتىنىڭ تۇڭعىش رەداكتورى عاني مۇراتبايەۆ وقىعان. ول وتىرعان پارتا مەموريالدىق مۋزەيدە ساقتاۋلى تۇر. قازاق بەينەلەۋ ونەرىنىڭ نەگىزىن قالاۋشى سەردالى بەكشورين ۇلى ۇسەندى وسىندا وقىتقان. ودان بولەك، مۇندا ورىنبور كازاك- ورىس اسكەرلەرىنىڭ اتامانى ا. دۋتوۆ، كەڭەس وداعىنىڭ باتىرى گ. شلياپين، گەنەرال ل. روحلين، ك س ر و حالىق ءارتىسى، ق ر حالىق قاھارمانى ر. باعلانوۆالار ءبىلىم العان.

- مەكتەبىمىزدى ءار جىلدارى الەكسەي كيم، سەمەن ياگانوۆ، مارقات داۋقارايەۆ، ۆالەريي شين، ليۋدميلا ەنگەل جانە تاعى باسقالار باسقاردى. تۇلەكتەرىمىزدىڭ اراسىندا اۋعان سوعىسىنىڭ ارداگەرى، گەنەرال- مايور ءالىمجان ەرنيازوۆ، قىزدار اراسىنداعى بوكستان لوندون وليمپياداسىنىڭ قولا جۇلدەگەرى مارينا ۆولنوۆا، دزيۋدو كۇرەسىنەن ازيا چەمپيونى ابىلايحان جۇبانازار سەكىلدى ماقتانىشتارىمىز بار، - دەدى № 16 مەكتەپ- ليتسەي ديرەكتورىنىڭ مىندەتىن ۋاقىتشا اتقارۋشى عاليا احمەتوۆا.

2012 -جىلى جەلتوقسان ايىندا بۇل اۋماقتا تيپتىك جوبادا سالىنعان 300 ورىندىق جاڭا مەكتەپ عيماراتى پايدالانۋعا بەرىلدى. ال جەرگىلىكتى ماڭىزى بار ەسكى عيماراتتا قالالىق كىتاپحانا مەن مۋزىكا مەكتەبى ورنالاسقان.
بيىل قىزىلوردا قالاسىنىڭ قازاق ا ك س ر-ىنىڭ استاناسى اتانعانىنا تۇپ-تۋرا 100 جىل تولدى.
ايتا كەتەلىك قىزىلوردا استانا بولعان كەزدەگى عيماراتتار تۋرالى جازعان ەدىك.
اۆتور
نازەركە سانيازوۆا