قاۋىپسىزدىك بەلدىگىن تاقپاعان 5 مىڭنان استام پاۆلودارلىق ايىپپۇل ارقالادى
پاۆلودار. KAZINFORM - ەرتىس-بايان وڭىرىندە جىل باسىنان قاۋىپسىزدىك بەلدىگىن ەلەمەگەن 5506 جۇرگىزۋشى اكىمشىلىك جاۋاپكەرشىلىككە تارتىلدى. پوليسەيلەر ءبىر جىل ىشىندە زاڭ بۇزۋشىلىق قايتالانسا، ايىپپۇل سانكتسيالارى ەكى ەسەگە ارتاتىنىن ەسكەرتىپ وتىر.
كولىكتە قاۋىپسىزدىك بەلدىگىن تاعۋ - جۇرگىزۋشى مەن جولاۋشىلاردىڭ ءومىرىن قورعاۋدىڭ ماڭىزدى ارەكەتتەرىنىڭ ءبىرى ەكەنىن ءاربىر اۆتوكولىك جۇرگىزۋشىسى بىلەدى. بەلدىك اۋىر جاراقاتتاردىڭ الدىن الۋعا كومەكتەسەدى جانە اپاتتار كەزىندە ءولىم قاۋپىن ازايتادى. سونىمەن قاتار، اپات كەزىندە نەمەسە قاتتى تەجەۋ جاعدايىندا بەكىتىلگەن قاۋىپسىزدىك بەلدىگى جۇرگىزۋشى مەن جولاۋشىلاردى ورنىندا ۇستاپ قالادى. بۇل كولىك قۇرالىنىڭ ىشكى ەلەمەنتتەرىمەن سوقتىعىسۋعا نەمەسە تەرەزەدەن شىعىپ كەتۋگە جول بەرمەيدى.
- وكىنىشكە قاراي، قاۋىپسىزدىك بەلدىگىن ءبارى بىردەي قولدانا بەرمەيدى. جۇرگىزۋشىلەر مەن جولاۋشىلار ونى تاقپاۋ ءۇشىن كوپتەگەن سەبەپتەردى ويلاپ تابادى. جىل باسىنان 5506 جۇرگىزۋشى اكىمشىلىك جاۋاپكەرشىلىككە تارتىلدى. ءبىر جىل ىشىندە بۇل ەرەجە قايتادان بۇزىلعان جاعدايدا ايىپپۇل سانكتسيالارى ەكى ەسەگە ارتادى، - دەپ حابارلادى وڭىرلىك پوليسيا دەپارتامەنتىنەن.
ءتارتىپ ساقشىلارى ءىس جۇزىندە اپاتتاردان زارداپ شەككەن ادامدار بۇل ەرەجەنى ەلەمەي، اۋىر جاراقات العان جاعدايلار از ەمەس ەكەنىن ايتادى. بۇل اسىرەسە بالالاردى كولىكتەردە تاسىمالدايتىن اۆتوكولىك جۇرگىزۋشىلەرىنە قاتىستى. جالپى قابىلدانعان نورمالار بار، ولاردى قاتاڭ ساقتاۋ كەرەك.
ەسكە سالا كەتەيىك، پاۆلوداردا موتوتسيكلشى ەلەكتر باعانىنا سوعىلىپ، مەرت بولدى.
