«قايرات» - «رەال مادريد»: جانكۇيەرلەر ستاديون اۋماعىنا قاي ۋاقىتتا كىرە الادى

استانا. KAZINFORM - الماتىلىق «قايرات» كومانداسى UEFA چەمپيوندار ليگاسى نەگىزگى كەزەڭى 2-تۋرىنداعى يسپانيانىڭ «رەال مادريدپەن» كەزدەسۋىنە ستاديون اۋماعىنا قاي ۋاقىتتان باستاپ كىرە الاتىنىن جاريالادى.

بۇل جونىندە كوماندانىڭ الەۋمەتتىك پاراقشاسىندا ءمالىم ەتتى.

- ستاديون اۋماعىنا جانكۇيەرلەر 17:45 تەن باستاپ كىرە الادى. ءدال وسى ۋاقىتتا ويىن الدىنداعى باعدارلاما باستالادى. جانكۇيەرلەردى UEFA مەن كلۋب سەرىكتەستەرىنىڭ ينتەراكتيۆ ايماقتارى، كوڭىلدى بارابانشىلار شوۋى، جانكۇيەرلەرگە ارنالعان تەگىن اكۆاگريم، فۋدكورتتاعى ءدامدى تاعامدار مەن سۋسىندار، تريبۋنادا كلۋب جالاۋلارىن تاراتۋ جاعدايى كۇتەدى. كورەرمەندەردەن ماتچ باستالعانعا دەيىن 3-4 ساعات بۇرىن كەلۋدى سۇرايمىز. بۇل - ستاديونعا كىرەبەرىستەگى تەكسەرىس پەن باقىلاۋدان وتۋگە، كەزەك پەن ىڭعايسىزدىقتىڭ الدىن الۋعا كومەكتەسەدى، - دەپ جازىلعان حابارلامادا.

كەزدەسۋ 30-قىركۇيەك كۇنى ساعات 21:45 تە الماتىداعى ورتالىق ستاديوندا باستالىپ، «Qazaqstan» جانە «Qazsport» تەلەارناسىنان تىكەلەي ەفيردە كورسەتىلەدى.

باس تورەشى مىندەتى يتاليالىق ماركو گۋيداعا جۇكتەلىپ وتىر. وعان دجوردجيو پەرەتتي مەن دجۋزەپپە پەرروتتي كومەكتەسەدى. ءتورتىنشى تورەشى دە سول ەلدىڭ وكىلى سيمونە سوتستسا.

قازىرگە دەيىن الماتىلىق كلۋب ءبىرىنشى تۋردا پورتۋگاليانىڭ «سپورتينگ» (ليسسابون) كومانداسىنا 1:4 ەسەبىمەن ەسە جىبەردى.

ەندى ولار بەدەلدى تۋرنيردە «رەال مادريد» (يسپانيا)، «ينتەر» (يتاليا)، «ارسەنال» (انگليا)، «بريۋگگە» (بەلگيا)، «وليمپياكوس» (گرەكيا)، «پافوس» (كيپر)، «كوپەنگاگەن» (دانيا) كلۋبتارىمەن وينايدى.