قايرات قۇدايبەرگەن مەن «ديكي ارمان»، رۋسلان ىسقاقوۆقا سوت ۇكىمى شىقتى

الماتى. KAZINFORM - الماتىدا قاڭتار وقيعاسىنا قاتىستى ايىپتالۋشىلارعا سوت ۇكىمى شىقتى.

سوتتا قايرات قۇدايبەرگەننىڭ دە ءىسى قارالادى. الماتى ءماسليحاتىنىڭ بۇرىنعى دەپۋتاتى سوت ۇكىمىمەن 8 جىلعا باس بوستاندىعىنان ايىرىلدى.

ال ۇ ق ك بەسىنشى دەپارتامەنتىنىڭ بۇرىنعى باسشىسى رۋسلان ىسقاقوۆ 15 جىلعا 6 ايعا باس بوستاندىعىنان ايىرىلدى جانە مەملەكەتتىك ناگرادالاردان ايىرىلدى.

قىلمىس الەمىنىڭ سەركەسى «ديكي ارمان» لاقاپ اتىمەن تانىمال ارمان جۇماگەلديەۆكە قاتىستى سوت ۇكىمى شىقتى.

سوت ارمان جۇماگەلديەۆتى 20 جىلعا باس بوستاندىعىنان ايىرۋ تۋرالى شەشىم قابىلدادى.

سونداي-اق ارمان جۇماگەلديەۆكە ءتۇرلى ۇيىمدارعا مۇشە بولۋعا، ءىس-شارالار ۇيىمداستىرۋعا جانە بۇقارالىق اقپارات قۇرالدارى، الەۋمەتتىك جەلىلەردە جازبا جاريالاۋعا تىيىم سالىندى.

ەسكە سالايىق، 2022 -جىلى الماتىدا پوليتسەيلەر قىلمىس الەمىنىڭ بەدەلدىسى ارمان جۇماگەلديەۆتى ۇستاعان بولاتىن.

كەيىن ق ر باس پروكۋراتۋراسى «ديكي ارمان» توبى 24 بەيبىت تۇرعىندى ۇرلاپ، كۇشتەپ ۇستاعانىن ايتتى.

2023 -جىلى قىركۇيەك ايىندا الماتى ماڭىنداعى №72-تۇزەۋ مەكەمەسىنىڭ تەرگەۋ يزولياتورىندا ءماسليحاتتىڭ ەكس-دەپۋتاتى قايرات قۇدايبەرگەن مەن ارمان جۇماگەلديەۆكە قاتىستى سوت پروتسەسى باستالدى.

ەسكە سالايىق، 2022 -جىلدىڭ ءساۋىر ايىندا كاسىپكەر، الماتى قالاسى ءماسليحاتىنىڭ دەپۋتاتى قايرات قۇدايبەرگەن قاڭتار وقيعاسى كەزىندە جاپپاي تارتىپسىزدىكتەردى ۇيىمداستىرۋ مەن وعان قاتىستى دەگەن كۇدىكپەن ۇستالدى.

الدىن الا تەرگەۋ بويىنشا ق. ق. قۇدايبەرگەن ا. ب. جۇماگەلديەۆپەن («ديكي ارمان» دەپ اتالاتىن) بىرگە «قازاقستان» قوناق ۇيىندە ادام جيناۋدى ۇيىمداستىرىپ، جۇماگەلديەۆتىڭ اينالاسىنا بىرىگۋگە، ونى قولداۋعا جانە بيلىكتىڭ ءبىرىڭعاي تالاپتارىن ۇسىنۋعا شاقىرعانى، سونداي-اق 10 ادامنان «ۇياشىقتار» بويىنشا ءبولىپ جانە ولاردىڭ توپتارىنىڭ ەرەكشەلىكتەرىنىڭ بەلگىسى رەتىندە قولدارىنا اق تاڭعىشتاردى تاڭۋعا نۇسقاۋ بەرگەنى انىقتالدى.

سودان كەيىن قۇدايبەرگەن مەن جۇماگەلديەۆ جيناعان توپ الاڭعا شىعىپ، جۇماگەلديەۆ توڭىرەگىندەگى ميتينگىلەردى بىرىكتىرۋگە، الاڭدا جەدەل شتاب ۇيىمداستىرۋعا جانە بيلىك الدىندا ءبىرىڭعاي تالاپتار قويۋعا تىرىسقان.

2023 -جىلى قىركۇيەك ايىندا الماتى ماڭىنداعى № 72-تۇزەۋ مەكەمەسىنىڭ تەرگەۋ يزولياتورىندا ءماسليحاتتىڭ ەكس-دەپۋتاتى قايرات قۇدايبەرگەن مەن ارمان جۇماگەلديەۆكە قاتىستى سوت پروتسەسى باستالدى.