قايرات بورانبايەۆ بۇرىنعى قىزمەتىنە قايتا سايلاندى
استانا. KAZINFORM - پاريج وليمپياداسى اياقتالعاننان كەيىن داستۇرگە ساي پاراليمپياداشىلار جۇلدەنى ساراپقا سالاتىنى بەلگىلى. ءدۇبىرلى دودا قارساڭىندا ۇلتتىق پاراليمپيادا كوميتەتىنىڭ پرەزيدەنتى بولىپ قايتا سايلانعان كاسىپكەر قايرات بورانبايەۆ جوسپارلارىمەن ءبولىستى.
«مەن پاراليمپيادا فەدەراتسيالارى وكىلدەرىنىڭ ءبىراۋىزدان شەشىمىمەن ۇلتتىق پاراليمپيادا كوميتەتىنىڭ پرەزيدەنتى بولىپ سايلاندىم. مەنى قولداعانداردىڭ بارىنە العىس ايتقىم كەلەدى. مەن ءۇشىن بۇل وتە ماڭىزدى قىزمەت. ءبىز قازاقستاندا پاراليمپيادالىق قوزعالىستى دامىتۋ جونىندەگى اۋقىمدى ستراتەگيامىزدى ىسكە اسىرۋ جولىندامىز. سوڭعى جىلدارى قول جەتكىزگەن جەتىستىكتەرمەن توقتاپ قالمايمىز. جوسپارىمىز كوپ»، - دەدى قايرات بورانبايەۆ ءوزىنىڭ الەۋمەتتىك پاراقشاسىندا.
ونىڭ ايتۋىنشا، بۇگىندە فرانسيا استاناسى پاريجدە جالاۋىن جەلبىرەتەتىن پاراليمپيادا ويىندارىنا قىزۋ دايىندىق ءجۇرىپ جاتىر. جىل سوڭىنا دەيىن استانادا جاڭا جاتتىعۋ ورتالىعىنىڭ قۇرىلىسى باستالماق. سونداي-اق «تارلان» ينكليۋزيۆتى مۇز ايدىنىن قايتا جاڭارتۋ جوسپارلانىپ وتىر. بۇدان بولەك پاراليمپياداشىلارعا ارنالعان زاماناۋي ترەناجەرلەر ساتىپ الىنباق.
«مەنىڭ ماقساتىم - پاراليمپيادالىق سپورتتىڭ ءتيىمدى جۇيەسىن قۇرۋ جانە قازاقستاننىڭ وڭىردەگى سپورتتىق كوشباسشىلىعىن نىعايتۋ. وسى جولدا مەنى قولدايتىنداردىڭ بارلىعىنا ريزامىن!»، - دەدى ول.
ەستەرىڭىزگە سالساق، قايرات بورانبايەۆ بۇل قىزمەتتى 2015 -جىلدىڭ ناۋرىز ايىنان بەرى اتقارىپ كەلەدى.
اۆتور
ورالحان قوجانوۆ
