«قايرات»-«پافوس»: 250 مىڭنان 30 مىڭعا دەيىنگى بيلەتتەر قالاي ساتىلىپ جاتىر
الماتى. KAZINFORM - الماتىنىڭ ورتالىق ستاديونىندا ەرتەڭ «قايرات» پەن «پافوس» كوماندالارى اراسىندا ماتچ وتەدى.
ۋ ە ف ا چەمپيوندار ليگاسىنىڭ اياسىندا وتەتىن ويىنعا بيلەتتەر ءبىر اپتا بۇرىن ساتىلىمعا شىقسا دا، جارتىسىنان ازى ساتىلدى. ىرىكتەۋ كەزەڭىندەگى «سەلتيك» پەن توپتىق كەزەڭدەگى «رەال مادريدكە» قارسى ويىندا بيلەتتەر ساناۋلى ساعاتتاردا ساتىلعان ەدى.
«رەال مادريد» كومانداسىمەن ويىندا بيلەتتەردىڭ باعاسى 250 مىڭنان 30 مىڭعا دەيىن بولدى. «پافوسقا» قارسى ماتچ الدىندا دا بيلەتتەر باعاسى وسى ارالىقتا قالعان. تەك 30 مىڭدىق جانە 75 مىڭدىق سەكتور مەن ورىندار سانى كوبەيگەن. ءبىراق مۇنداي باعا وتاندىق جانكۇيەرلەر اراسىندا نارازىلىق تۋدىردى. الەۋمەتتىك جەلىدە ادامدار كيپر كومانداسى كەلەتىن ويىن ءۇشىن بيلەت تىم قىمبات ەكەنىن جازىپ جاتىر. ءتىپتى، الماتىلىق كلۋبتىڭ بۇل ارەكەتىنە نارازىلىق ءبىلدىرۋ ءۇشىن اتالعان ويىنعا بايكوت جاريالاۋدى ۇسىنعاندار دا بولدى.
قازىر ورتالىق ستاديوننىڭ 11، 52، 42 جانە قوناق كوماندانىڭ جانكۇيەرلەرىنە ارنالعان سەكتورلاردا بيلەت جوق.
قالعان سەكتورلاردىڭ ەشقايسىسىندا بيلەتتەر تولىق ساتىلماعان. تەك ءار تۇستان 30 مىڭدىق ورىندار، ءبىرشاما 75 مىڭدىق ورىندار جانە ساناۋلى 150-250 مىڭدىق ورىندار بۇگىنگە دەيىن وتكەن.
بۇگىن ماتچ الدىنداعى باسپا ءسوز ءماسليحاتىندا «قايرات» ويىنشىسى ەركىن تاپالوۆ «بيلەتتەردىڭ ساتىلماۋىنا بايلانىستى بوس تريبۋنالار ويىنشىلارعا قالاي اسەر ەتەدى» دەگەن سۇراققا جاۋاپ بەردى.
- بۇل ءبىزدىڭ ويىنىمىزعا ەش اسەر ەتپەيدى. ءبىز قولداۋ قانداي بولسا دا، جەڭۋگە تىرىسامىز. چەمپيوندار ليگاسىندا جەڭىسكە جەتىپ، تاريح جاساعىمىز كەلەدى. بارىمىزدى سالامىز. ءبىزدى قولدايتىن ناعىز جانكۇيەرلەر كەلەدى دەپ ۇمىتتەنەمىز، - دەدى ول.
ەسكە سالايىق، «قايرات» فۋتبول كلۋبىنىڭ باس باپكەرى رافاەل ۋرازباحتين كوماندانىڭ دايىندىعى تۋرالى ايتتى.
