قاتتى ۇيالتادى. ەكس-دەپۋتات تاشكەنتتە ەمدەلگەن قازاق ايەلدەرىنىڭ ارەكەتىن سىنادى

قوعام
AstanaTV

استانا. قازاقپارات - وزبەكستانداعى شيپاجايعا دەمالۋعا بارعان بۇرىنعى سەنات دەپۋتاتى مۇرات باقتيار ۇلى قازاقتىڭ قىز-كەلىنشەكتەرىنىڭ اسحاناداعى ارەكەتىن سىنادى، دەپ حابارلايدى El.kz اقپارات اگەنتتىگى.

ەكس-دەپۋتاتتىڭ سوزىنە قاراعاندا، دەمالۋشىلاردىڭ باسىم بولىگى قازاقستاننان بارعان.

مۇنداعى دەمالۋشىلاردىڭ سەكسەن پايىزى قازاقستان ازاماتتارى. ولار ءۇشىن بارلىق جاعداي جاسالىنعان. قىزمەت كورسەتۋ مادەنيەتى تاڭعالدىرادى. مۇنتازداي تازالىق، ەمنىڭ كوپ تۇرلىلىگى، ءدامدى تاماقتىڭ مولشىلىعى تاڭداي قاقتىرادى. ءبىر اتتەگەنى، قانشا جەسەڭ دە جەتەتىن مول تاماقتى دەمالىپ جاتقان قازاقتىڭ كەلىن-كەپشىكتەرى ەلدەگى ادەتتەرىنە سالىپ، اس ءىشىپ بولا سالىپ پاكەتتەرىنە تولتىرا سالىپ جاتاتىنى ۇيالتادى، - دەپ جازدى ەكس-سەناتور.

مۇرات باقتيار ۇلىنىڭ ايتۋىنشا، ايەلدەردىڭ بۇل ارەكەتىنە اسحانا قىزمەتكەرلەرى دە كۇلگەن.

اسحانا قىزمەتكەرلەرى ولارعا اياۋشىلىقپەن قارايتىن سياقتى.

«قازاقستاندا اشتىق بولىپ جاتىر ما؟» دەپ مىسقىلداپ تۇرعاندارىن بىرنەشە رەت ەستىدىم. قاسىمىزدا ۇستەلدە وتىراتىن سالماعى جەتى پۇتتاي كەلەتىن ايەلگە «وزىڭىزبەن بىرگە تاماق الماي-اق قويساڭىزشى، ۇيات ەمەس پە؟» دەسەم، جۇرت الىپ جاتىر عوي، مەن دە الامىن» دەدى. نە دەرسىڭ، كورگەنى سول بولسا. شىركىن-اي، بويىندا ءبىر ارتىق ەتى جوق، بارعان جەرىنەن نەمەرەلەرىمە دەپ ەكى-ءۇش ءتۇيىر كامپيت الاتىن اجەلەرىمىز بەن شەشەلەرىمىزدىڭ، جەڭگەلەرىمىزدىڭ ءىزباسارلارى تىم ۇساقتالىپ كەتكەنى وكىنىشتى، - دەپ ويىن ءبىلدىردى ول.

ايتا كەتەيىك، مۇرات باقتيار ۇلى 2023 -جىلعا دەيىن سەنات دەپۋتاتى بولدى.

سوڭعى جاڭالىقتار