قاسىم- جومارت توقايەۆ وزبەك باسشىسىنىڭ قازاقستانعا ساپارىن جوعارى باعالادى
استانا. KAZINFORM - وزبەكستان باسشىسىنىڭ بۇل ساپارى ەكى ەلدىڭ ىنتىماقتاستىعىن نىعايتۋ جولىنداعى ماڭىزدى قادام.
بۇل تۋرالى اقوردادا وزبەكستان پرەزيدەنتى شاۆكات ميرزيەيەۆپەن كەلىسسوزدەردەن كەيىنگى باق وكىلدەرىنە ارنالعان بريفينگتە مەملەكەت باسشىسى قاسىم-جومارت توقايەۆ ايتتى.
«ەڭ الدىمەن مەنىڭ شاقىرۋىمدى قابىل الىپ، ەلىمىزگە مەملەكەتتىك ساپارمەن كەلگەنى ءۇشىن شاۆكات ميرومونوۆيچ ميرزيەيەۆكە شىنايى ريزاشىلىعىمدى بىلدىرەمىن. مۇنى وزبەكستان باسشىسىنىڭ قازاق جۇرتىنا زور قۇرمەتىنىڭ بەلگىسى دەپ سانايمىن. سونداي-اق بۇل ساپارىڭىزدى ەكى ەلدىڭ ىنتىماقتاستىعىن نىعايتۋ جولىنداعى ماڭىزدى قادام رەتىندە باعالايمىن. ءبىز الدىڭعى جىلى وداقتاستىق قاتىناستار تۋرالى تاريحي شارتقا قول قويدىق. بۇل -ءسىزدىڭ سودان بەرگى قازاقستانعا جاساعان العاشقى مەملەكەتتىك ساپارىڭىز. سوندىقتان مەن وسى ساپارعا ايرىقشا ءمان بەرىپ وتىرمىن. ونىڭ ەكى ەل ءۇشىن دە ماڭىزى وتە زور. قازاقستان مەن وزبەكستان ەجەلدەن ىرگەسى بولىنبەگەن اعايىن ەلدەر. باۋرىلاستىعىمىزدىڭ تامىرى تەرەڭدە جاتىر. ءبىر- بىرىمىزگە ءاردايىم قولداۋ كورسەتەمىز. ماقسات-مۇراتىمىز دا ورتاق. قارىم-قاتىناسىمىز سوڭعى جىلدارى قارقىندى دامىپ كەلەدى. ءبىز ستراتەگيالىق سەرىكتەستىاكتى نىعايتا تۇسۋگە باسا نازار اۋدارامىز. بۇل ەكى جاقتىڭ دا مۇددەسىنە ساي كەلەدى. وسى ساپار ءوزارا ىقپالداستىقتى جاڭا دەڭگەيگە كوتەرەدى دەپ سەنەمىن»، - دەدى مەملەكەت باسشىسى.
پرەزيدەنت بۇگىن ءوزارا قولداۋ جانە سەنىم رۋحىندا ناتيجەلى كەزىسسوزدەر جۇرگىزىلگەنىن باسا ايتتى.
«قارىم-قاتىناسىمىزدى جانداندىرۋعا مۇددەلى ەكەنىمىزدى تاعى دا اتاپ وتتىك. سونداي- اق ستراتەگيالىق ارىپتەستىكتى جانە وداقتاستىقتى دامىتۋ باعدارلاماسىن قابىلدادىق. بۇل قۇجات الداعى 10 جىلعا ارنالعان. باستى ماقسات -دوستىعىمىزدى ارتتىرىپ، سان ءتۇرلى سالاداعى ءتيىمدى بايلانىستى دامىتۋعا تىڭ سەرپىن بەرۋ»، - دەدى قاسىم-جومارت توقايەۆ.
