قاسىم-جومارت توقايەۆ سلوۆاكيا پرەمەر- ءمينيسترى روبەرت فيتسومەن كەلىسسوز جۇرگىزدى
استانا. KAZINFORM - اقوردا مەملەكەت باسشىسى قاسىم-جومارت توقايەۆتىڭ سلوۆاكيا پرەمەر- ءمينيسترى روبەرت فيتسومەن كەلىسسوز جۇرگىزگەنىن حابارلادى.
پرەزيدەنت قازاقستان مەن سلوۆاكيانى تىعىز ىقپالداستىق بايلانىستىراتىنىن ايتتى.
- ءبىز ءىرى جوبالاردى جۇزەگە اسىرىپ جاتىرمىز. دەگەنمەن ءتيىستى دەڭگەيدە زەردەلەپ جانە بولاشاقتا قولعا الاتىن جاڭا باعىتتار بار دەپ ويلايمىن. سوندىقتان ءسىزدىڭ بۇل ساپارىڭىزعا ەرەكشە ءمان بەرەمىز، سونداي-اق ەكى ەل اراسىنداعى ىنتىماقتاستىقتى دامىتۋعا ىقپال ەتەدى دەگەن سەنىمدەمىز. ءسىزدىڭ ەلىڭىزبەن قارىم-قاتىناستى جوعارى باعالايمىز جانە سلوۆاكيانى قازاقستاننىڭ ەۋروپا وداعىنداعى نەگىزگى سەرىكتەستەرىنىڭ ءبىرى سانايمىز. سول سەبەپتى، مەن پرەزيدەنت رەتىندە مەملەكەتتەرىمىز اراسىنداعى ىقپالداستىقتى ءتۇرلى سالادا كەڭەيتۋ ءۇشىن بار كۇش-جىگەرىمدى سالامىن، - دەدى مەملەكەت باسشىسى.
ال روبەرت فيتسو ەكى ەلدىڭ ساياسي ۇستانىمىندا الشاقتىق جوق ەكەنىن اتاپ ءوتتى.
- جوعارى مارتەبەلى پرەزيدەنت مىرزا، قوناقجايلىق تانىتقانىڭىز ءۇشىن زور ريزاشىلىعىمدى بىلدىرەمىن. ەلدەرىمىزدىڭ ساياسي ۇستانىمىندا الشاقتىق جوق ەكەنىن راستايمىن. سوندىقتان ءوزارا ءتيىمدى ەكونوميكالىق بايلانىس پەن دوستىققا باسا ءمان بەرۋىمىز كەرەك. بۇگىن ءبىز قوس تاراپقا دا قىزىقتى ءارى ماڭىزدى بىرنەشە جوبانى تالقىلايمىز. بۇل ساپارىمنىڭ قورىتىندىسى تابىستى بولاتىنىنا سەنىمدىمىن، - دەدى سلوۆاكيا پرەمەر- ءمينيسترى.
ايتا كەتەيىك، بۇعان دەيىن قاسىم-جومارت توقايەۆ سلوۆاكيا پرەمەر- ءمينيسترىن اقوردادا قارسى العان بولاتىن.
