قاسىم-جومارت توقايەۆ ساحا رەسپۋبليكاسىنىڭ باسشىسى ايسەن نيكولايەۆتى قابىلدادى
استانا. KAZINFORM - پرەزيدەنت قاسىم- جومارت توقايەۆ ساحا رەسپۋبليكاسىنىڭ (ياكۋتيا) باسشىسى ايسەن نيكولايەۆتى قابىلدادى، دەپ حابارلايدى اق وردانىڭ باسپا ءسوز قىزمەتى.
V دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا قاتىسۋ ءۇشىن استاناعا ارنايى كەلگەن ايسەن نيكولايەۆپەن كەزدەسۋدە ءوڭىرارالىق ىقپالداستىقتى نىعايتۋ جانە ەكىجاقتى بايلانىستاردى كەڭەيتۋ ماسەلەلەرى تالقىلاندى.
قاسىم-جومارت توقايەۆ وڭىرلەر اراسىنداعى ىنتىماقتاستىقتى جان-جاقتى دامىتۋ قازاقستان مەن رەسەي اراسىنداعى ستراتەگيالىق سەرىكتەستىك جانە وداقتاستىق قاتىناستاردىڭ اجىراماس بولىگى سانالاتىنىن اتاپ ءوتتى.
مەملەكەت باسشىسى ساحا رەسپۋبليكاسىمەن ونەركاسىپ، ساۋدا، IT- سەكتور، اۋىل شارۋاشىلىعى جانە كەن يگەرۋ يندۋسترياسى سەكىلدى ءتۇرلى سالالاردا ىنتىماقتاستىقتى كۇشەيتۋگە ايتارلىقتاي مۇمكىندىك بار ەكەنىنە نازار اۋداردى.
ءوز كەزەگىندە ايسەن نيكولايەۆ كورسەتىلگەن سىي-قۇرمەت ءۇشىن العىس ايتىپ، ياكۋتيا مەن قازاقستان اراسىنداعى بايلانىستاردى كەڭەيتۋدىڭ ماڭىزدىلىعىنا توقتالدى. سونداي-اق ول باسىم باعىتتاردا بىرلەسە جۇمىس اتقارۋعا دايىن ەكەنىن جەتكىزىپ، الداعى ۋاقىتتا ەكى جاقتى بايلانىستاردىڭ نىعايا تۇسەتىنىنە سەنىم ءبىلدىردى.
