قاسىم-جومارت توقايەۆ رەسەي پرەزيدەنتى ۆلاديمير پۋتينگە العىس ايتتى

استانا. KAZINFORM - پرەزيدەنت قاسىم-جومارت توقايەۆ حاتتا رەسەيگە جاساعان مەملەكەتتىك ساپارىنىڭ قورىتىندىسى بويىنشا ۆلاديمير پۋتينگە ريزاشىلىعىن ءبىلدىردى، دەپ حابارلايدى اقوردانىڭ باسپا ءسوز قىزمەتى.

- جىلى جۇزدەسۋ، ءوزارا سەنىم، تۇسىنىستىك پەن اشىقتىق سيپاتىندا وتكەن كەلىسسوزدەر ساپاردىڭ ءساتتى بولۋىنا سەپتىگىن تيگىزدى. قازاقستان حالقى مۇنى زور ىقىلاسپەن قابىلدادى.

قازاقستان مەن رەسەيدىڭ مەملەكەتارالىق قارىم-قاتىناسىن جان-جاقتى ستراتەگيالىق سەرىكتەستىك جانە وداقتاستىق دەڭگەيىنە جەتكىزۋ جونىندەگى دەكلاراتسيا ايرىقشا مانگە يە.

بۇل قۇجات ەلدەرىمىزدىڭ سان قىرلى ىنتىماقتاستىعىن ايتارلىقتاي نىعايتادى، - دەپ جازدى مەملەكەت باسشىسى.

ايتا كەتەيىك، مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتيننىڭ شاقىرۋىمەن ماسكەۋگە مەملەكەتتىك ساپارمەن باردى.

ساپار بارىسىندا قازاقستان مەن رەسەي پرەزيدەنتتەرى بەيرەسمي كەزدەسۋ وتكىزدى.

قاسىم-جومارت توقايەۆ پەن ۆلاديمير ءپۋتيننىڭ بەيرەسمي پىكىرالماسۋى كەشكى اس ۇستىندە جالعاستى.

پرەزيدەنت «بەلگىسىز جاۋىنگەر بەيىتى» ەسكەرتكىش مەموريالىنا گۇل شوعىن قويىپ، رەسەي فەدەرالدى جينالىسى فەدەراتسيا كەڭەسىنىڭ توراعاسىمەن كەزدەستى.

سونداي-اق كرەملدە قاسىم-جومارت توقايەۆتى رەسمي قارسى الۋ ءراسىمى ءوتتى.

سونىمەن قوسا قاسىم-جومارت توقايەۆ پەن ۆلاديمير پۋتين كەلىسسوزدەر قورىتىندىسى بويىنشا قازاقستان رەسپۋبليكاسى مەن رەسەي فەدەراتسياسىنىڭ مەملەكەتارالىق قارىم-قاتىناسىن جان-جاقتى ستراتەگيالىق سەرىكتەستىك جانە وداقتاستىق دەڭگەيىنە دەيىن جەتكىزۋ جونىندەگى دەكلاراتسياعا قول قويدى.

پرەزيدەنتتىڭ رەسەيگە مەملەكەتتىك ساپارى بارىسىندا 13 كەلىسىمگە قول قويىلدى.