قاسىم-جومارت توقايەۆ فرانسياعا مەملەكەتتىك ساپارمەن بارادى
استانا. KAZINFORM - مەملەكەت باسشىسى قاسىم-جومارت توقايەۆ پرەزيدەنت ەممانيۋەل ماكروننىڭ شاقىرۋىمەن 4-5-قاراشا كۇندەرى فرانسيا رەسپۋبليكاسىنا مەملەكەتتىك ساپارمەن بارادى.
بۇل تۋرالى اقوردانىڭ باسپا ءسوز قىزمەتى حابارلادى.
باسپا ءسوز قىزمەتىنىڭ مالىمەتتەرىنە قاراعاندا، ساپار بارىسىندا ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىقتى ودان ءارى دامىتۋعا باعىتتالعان جوعارى دەڭگەيدەگى كەلىسسوزدەر وتەدى.
سونداي-اق قازاقستان پرەزيدەنتى فرانسيانىڭ ىسكەر توپتارىنىڭ ءبىرقاتار وكىلىمەن كەزدەسەدى.
ايتا كەتەيىك، بۇگىن مەملەكەت باسشىسى قاسىم-جومارت توقايەۆ شەتەلدىك ينۆەستورلار كەڭەسىنىڭ 36- پلەنارلىق وتىرىسىن وتكىزدى.
قاسىم-جومارت توقايەۆ حالىقارالىق مەنەدجمەنتتى دامىتۋ ينستيتۋتىنىڭ (IMD) مالىمەتىنە سۇيەنە وتىرىپ، ەلىمىز الەمدەگى باسەكەگە قابىلەتتى 35 مەملەكەتتىڭ قاتارىنا قوسىلعانىن ايتتى.
