قارجى مينيسترلىگى 2025-جىلى قانشا ادام دەكلاراتسيا تاپسىراتىنىن ايتتى

استانا. KAZINFORM – وتكەن جىلى 13 ميلليون ادام دەكلاراتسيا تاپسىرادى. بۇل تۋرالى قارجى مينيسترلىگىنىڭ مەملەكەتتىك كىرىستەر كوميتەتى ءتوراعاسىنىڭ ورىنباسارى قايرات مياتوۆ ايتتى.

«ءتورتىنشى كەزەڭدە، 2025-جىلعى 1- قاڭتاردان باستاپ ازاماتتاردىڭ قالعان 6,4 ميلليوننان استام ساناتىن قامتۋ جوسپارلانعان. مىسالى، جەكە قۇرىلىمداردىڭ قىزمەتكەرلەرى، زەينەتكەرلەر، ءۇي شارۋاسىنداعى ايەلدەر، ستۋدەنتتەر جانە باسقالارى. جالپىعا بىردەي دەكلاراتسيالاۋ جۇيەسىنە شامامەن 13 ميلليون ادام ەنەدى دەپ جوسپارلانعان»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ دەرەگىنشە، جالپىعا بىردەي دەكلاراتسيالاۋدىڭ ءبىرىنشى كەزەڭىندە 2021-جىلدىڭ 1- قاڭتارىنان باستاپ 580 مىڭعا جۋىق مەملەكەتتىك قىزمەتشى جانە ولارعا تەڭەستىرىلگەن ادامدار، سونداي-اق ولاردىڭ جۇبايلارى «كىرۋ» دەكلاراتسياسىن تاپسىردى. ەكىنشى كەزەڭدە، 2023-جىلدىڭ 1- قاڭتارىنان باستاپ دەكلاراتسيانى مەملەكەتتىك مەكەمەلەر مەن كۆازيمەملەكەتتىك سەكتوردىڭ شامامەن 2,1 ميلليون قىزمەتكەرى، سونداي-اق ولاردىڭ جۇبايلارى تابىس ەتتى.

«ءۇشىنشى كەزەڭدە، 2024-جىلدىڭ 1- قاڭتارىنان باستاپ دەكلاراتسيانى شامامەن 3,9 ميلليون جەكە تۇلعالار تاپسىرادى. ولار زاڭدى تۇلعالاردىڭ باسشىلارى مەن قۇرىلتايشىلارى، دارا كاسىپكەرلەر، سونداي-اق ولاردىڭ جۇبايلارى. اكتيۆتەر مەن مىندەتتەمەلەر تۋرالى «كىرۋ» دەكلاراتسياسىن 2024-جىلعى 1- قاڭتارداعى جاعداي بويىنشا زاڭدى تۇلعالاردىڭ باسشىلارى، قۇرىلتايشىلارى، قاتىسۋشىلارى، دارا كاسىپكەرلەر، سونداي-اق ولاردىڭ جۇبايلارى، ونىڭ ىشىندە ارەكەتسىز جانە قىزمەتىن توقتاتقان كاسىپكەرلەردە ۇسىنادى. فيليالدار مەن وكىلدىكتەردىڭ باسشىلارى دەكلاراتسيانى ۇسىنۋعا مىندەتتى ەمەس. سونىمەن قاتار 2024-جىلى جەكە پراكتيكامەن اينالىساتىن ادامدار، اتاپ ايتقاندا نوتاريۋستار، ادۆوكاتتار، جەكە سوت ورىنداۋشىلارى جانە كاسىبي مەدياتورلار «كىرۋ» دەكلاراتسياسىن ۇسىنبايدى»، - دەدى قايرات مياتوۆ.