قارجاۋباي نۇرىموۆتىڭ ۇستىنەن قىلمىستىق ءىس قوزعالا ما - باس پروكۋراتۋرا جاۋابى
استانا. KAZINFORM - باس پروكۋروردىڭ ورىنباسارى اسەت شىنداليەۆ ءماجىلىستىڭ جالپى وتىرىسىنان كەيىن جۋرناليستەردىڭ سۇراعىنا بەرگەن جاۋابىندا شەرزات ىسىنە بايلانىستى سوتتىڭ قالاي وتكەنى تۋرالى پايىمىن ايتتى.
- شەرزات پولاتتىڭ سوتى بويىنشا ايتساق، ۇكىم ءالى كۇشىنە زاڭدى ەنگەن جوق. تاراپتاردىڭ بارىندە شاعىم تۇسىرەتىندەي مەرزىمى بار. ءبىراق پروتسەستىڭ ءوزىن كورگىسى كەلگەن قازاقستاندىقتاردىڭ بارىندە مۇمكىندىك بولدى دەپ ويلايمىن. پروتسەسس وتە ساپالى، اشىق، وبەكتيۆتى وتكىزىلدى دەپ ەسەپتەيمىن. ۇكىم شىعارىلعان كەزدە بۇكىل دالەل، كۋا ماتەريالدارى ەسكەرىلدى. مۇنداي اشىق پروتسەستەردىڭ ماقساتى سوت ءادىل ءوتىپ جاتقانىن، ەشكم ەشتەڭەنى بۇركەمەلەپ وتىرماعانىن كورسەتۋ ەدى، - دەدى ول.
سونداي-اق، ول كۇدىكتىلەردىڭ تۋىستارى ايتقان قارجاۋباي نۇرىموۆتى قىلمىستىق جاۋاپكەرشىلىككە تارتۋ تۋرالى تالاپتارعا پىكىر ءبىلدىردى.
- مەن كۇدىكتىلەردىڭ تۋىسقاندارىنىڭ نەمەسە وزگە بىرەۋلەردىڭ سوزىنە سۇيەنىپ قانا پىكىر ايتا المايمىن. قىلمىستىق ءىس قوزعاۋ ءۇشىن مالىمەت جەتكىلىكتى بولۋ كەرەك. ءىس قوزعاۋ تۋرالى شەشىمدى قىلمىستىق قۋدالاۋ ورگانى قابىلدايدى، - دەدى باس پروكۋروردىڭ ورىنباسارى.
ەسكە سالساق، 5- ماۋسىمدا جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 16 جاستاعى شەرزات پولاتتىڭ ولىمىنە قاتىستى قىلمىستىق ءىس بويىنشا ۇكىم جاريالانعان ەدى.
