قاراكولدە قىرىلعان اققۋ سانى 800 دەن استى
اقتاۋدا قاراكولدە قىرىلعان اققۋلاردىڭ سانى 828 گە جەتتى، دەپ حابارلايدى Kazinform.
بۇل اقپاراتتى ماڭعىستاۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باسشىسى عابباس دوساتوۆ راستادى. ونىڭ ايتۋىنشا قازىر وسىعان قاتىستى كەشەندى جۇمىستار جالعاسىپ جاتىر.
«21-جەلتوقساننان بەرى ءۇش اپتا ىشىندە قىرىلعان اققۋ سانى 828 دەن استى. وسىعان وبلىس اكىمى جانىنان ارنايى جۇمىس توبى قۇرىلدى. اتالعان توپ قۇستاردىڭ قىرىلۋىنا قاتىستى ءتيىستى جۇمىستاردى اتقارىپ، زەرتتەپ، زەردەلەيتىن بولادى»، - دەدى عابباس دوساتوۆ.
سونداي-اق اقتاۋداعى Rixos قوناق ءۇيىنىڭ جەراستى قۇبىرىنان قاراكول كولىنە اعىپ جاتقان اعىندى قالدىق سۋدىڭ سالدارىنان اققۋلاردىڭ قىرىلۋى مۇمكىن ەكەنىن كوپشىلىك ايتىپ، دابىل قاقتى. الەۋمەتتىك جەلىلەردە كەڭ تارالعان بەينەجازبادا Rixos قوناق ءۇيىنىڭ قالدىق سۋى قۇبىر ارقىلى قاراكول كولىنە توگىپ جاتقانى انىق بايقالادى. بۇعان قاتىستى ماڭعىستاۋ وبلىستىق ەكولوگيا دەپارتامەنتى اقپاراتتىڭ قانشالىققى راس ەكەنىن ەكولوگتاردىڭ ساراپتاماسى جانە ورنيتولوگتاردىڭ قورىتىندىسى بويىنشا انىقتايتىنىن اتاپ ءوتتى.
«ەكولوگيا دەپارتامەنتى Rixos قوناق ۇيىنە قاتىستى جوسپاردان تىس تەكسەرۋ تاعايىندادى. قاراكول سۋىن تالداۋ ناتيجەسى بويىنشا لاستاۋشى زاتتاردىڭ شەكتى رۇقسات ەتىلگەن كونسەنتراتسياسىنان اسىپ كەتكەنى انىقتالسا، قوناق ۇيگە ايىپپۇل سالىنۋى مۇمكىن. ءبىراق اكىمشىلىك ايىپپۇل كولەمى ازىرگە بەلگىسىز»، - دەدى دەپارتامەنتتىڭ باسپا ءسوز قىزمەتى.
ەكى جىل بۇرىن Rixos قوناق ءۇيىن قالدىق اعىندى سۋدى كاسپي تەڭىزىنە اعىزعانى ءۇشىن 76 ميلليون تەڭگە كولەمىندە ايىپپۇل سالىنعان بولاتىن. اتالعان قوناق ءۇي اقتاۋ قالاسىنان 20 شاقىرىم جەردە كاسپي تەڭىزىنىڭ جاعالاۋىندا ورنالاسقان.
ماڭعىستاۋداعى قاراكول كولى سۋلى-باتپاقتى القاپتاردىڭ ءبىرى بولعاندىقتان ەرەكشە قورعالاتىن تابيعي اۋماق قاتارىنا جاتادى. رەسپۋبليكالىق ماڭىزى بار قاراقيا-قاراكول مەملەكەتتىك زوولوگيالىق قورىعىنىڭ قۇرامىنا كىرەدى. مۇندا ەلىمىزدىڭ قىزىل كىتابىنا جانە حالىقارالىق تابيعات قورعاۋ وداعىنىڭ قىزىل كىتابىنا ەنگەن قۇستاردىڭ 20 دان استام ءتۇرى مەكەندەيدى. ولاردىڭ ىشىندە وتە سيرەك كەزدەسەتىن دالمات پەليكانى مەن اقباس ۇيرەگى بار.
