قاراعاندىدا پوليتسيامەن ءبىر ساپتا قىزمەت ەتكەن بالا جۇرتتى ءسۇيسىندىردى
استانا. KAZINFORM - قاراعاندى وبلىسىندا جول قوزعالىسى قاۋىپسىزدىگىن ءتۇسىندىرۋ جۇمىستارىنا 8 جاستاعى نۇراسىل تولەگەنوۆ قاتىستى، دەپ حابارلايدى ق ر ءى ءى م باسپا ءسوز قىزمەتى.
قاراعاندى وبلىسىندا ەڭ جاس پوليتسەي جولداعى قاۋىپسىزدىككە ۇلەس قوسىپ جاتىر. جول ەرەجەلەرىن جەتىك مەڭگەرگەن بالاقاي الەۋمەتتىك جەلى قولدانۋشىلارى اراسىندا كەڭىنەن تانىمال. ول قاراعاندى - الماتى باعىتىنداعى رەسپۋبليكالىق ماڭىزى بار تاسجولدا پوليتسيا قىزمەتكەرلەرىمەن بىرگە جۇرگىزۋشىلەرگە ءتۇسىندىرۋ جۇمىستارىن جۇرگىزدى.
نۇراسىل لەيتەنانت شەنىن تاعىپ، ارنايى نىساندىق كيىم كيىپ، ءتارتىپ ساقشىلارىمەن يىق تىرەسە قىزمەت ەتتى. ول جۇرگىزۋشىلەرگە جول- كولىك وقيعالارىنىڭ الدىن الۋ ءۇشىن باستى ەرەجەلەردى ءتۇسىندىرىپ، جىلدامدىقتى اسىرماۋ، قارسى باعىتقا شىقپاۋ جانە جولدا دەمالىستى ەسكەرۋسىز قالدىرماۋ قاجەتتىگىن ەسكەرتتى.
پوليتسيا بولۋدى ارماندايتىن نۇراسىلدىڭ بۇل قىزىعۋشىلىعى بەكەر ەمەس - ونىڭ اكەسى دە پاترۋلدىك پوليتسيا باتالونىنىڭ قاتارىندا قىزمەت اتقارادى.
- قازىرگى تاڭدا جول قوزعالىسى قاۋىپسىزدىگى - كۇن تارتىبىندەگى ەڭ وزەكتى ماسەلەلەردىڭ ءبىرى. جاز مەزگىلىندە قاراعاندى - بالقاش باعىتى بويىنشا كولىك اعىنى كۇرت ارتادى. وسىعان بايلانىستى اتالعان جولدا پوليتسيا ناريادتارىنىڭ سانىن ارتتىردىق. بۇرىن بۇل باعىتتا 17 اۆتوپاترۋل جۇمىس ىستەسە، قازىر ولاردىڭ سانى 30 عا جەتكىزىلدى. ءار پاترۋل بەكەتىنىڭ اراقاشىقتىعى شامامەن 10 شاقىرىم. قوعامدىق قاۋىپسىزدىككە ءۇن قوسقان ەڭ جاس پوليتسەيدىڭ باستاماسى - بارشاعا ۇلگى. بۇل شارا تۇرعىندار اراسىندا قۇقىقتىق مادەنيەتتى ارتتىرۋعا باعىتتالعان ءىس-شارالاردىڭ ءبىر بولىگى رەتىندە ۇيىمداستىرىلدى، - دەدى پاترۋلدىك پوليتسيا باتالونىنىڭ كومانديرى مەدەت نۇرمۇحانوۆ.
ايتا كەتەيىك، 2025 -جىلدىڭ باسىنان بەرى قاراعاندى وبلىسىندا 34 جول-كولىك وقيعاسى تىركەلىپ، ونىڭ سالدارىنان 16 ادام كوز جۇمىپ، 51 ازامات ءتۇرلى دەنە جاراقاتىن العان. سونىمەن قاتار رەسپۋبليكالىق ماڭىزى بار تاسجولداردا 25 جۇرگىزۋشى ماس كۇيىندە كولىك تىزگىندەگەنى ءۇشىن ۇستالعان.
بۇعان دەيىن قاراعاندىدا كولىك كيىكتەردى قاعىپ كەتىپ، جولاۋشى زارداپ شەككەنىن جازعانبىز.
