قاراعاندى وبلىسىندا قولا داۋىرىنە جاتاتىن تۇرعىن ءۇي قالدىقتارى تابىلدى
قاراعاندى. KAZINFORM - بۇقار جىراۋ اۋدانىندا ە. ا. بوكەتوۆ اتىنداعى قاراعاندى ۋنيۆەرسيتەتىنىڭ ارحەولوگتەرى قولا داۋىرىنە جاتاتىن كونە تۇرعىن ءۇيدى انىقتادى. ەرەكشە تاريحي ولجا تورتكول اۋىلى ماڭىندا ورنالاسقان.
ارحەولوگيالىق نىسان - تاستان قالانعان قوس قابىرعالى، جارتىلاي جەرتولە ۇلگىسىندەگى قۇرىلىس.
قازبا جۇمىستارى بارىسىندا عالىمدار گەومەتريالىق ورنەكپەن اشەكەيلەنگەن قىش ىدىس سىنىقتارىن، جانۋارلاردىڭ سۇيەكتەرى مەن تاستان جاسالعان ەڭبەك قۇرالدارىن، شاقپاق تاستان جاسالعان جەبە ۇشىن جانە مەتالل پىشاق تاپقان.
ماماندار ارحەولوگيالىق بۇل نىساندى الاكول مادەنيەتىنە جاتقىزىپ وتىر. الدىن الا بولجام بويىنشا، تۇرعىن ءۇي ءبىزدىڭ داۋىرىمىزگە دەيىنگى XVII- XVII عاسىرلاردا تۇرعىزىلعان.
- الدا قىش بۇيىمدارىنا تەحنيكالىق جانە تەحنولوگيالىق ساراپتاما جۇرگىزىلىپ، راديوكومىرتەكتىك تالداۋ ءۇشىن ۇلگىلەر جىبەرىلەدى. بۇل زەرتتەۋ نىساننىڭ ناقتى ۋاقىت مەجەسىن انىقتاۋعا مۇمكىندىك بەرەدى. قولا ءداۋىرىنىڭ ەلدى مەكەندەرىن زەرتتەۋ ارقىلى ەجەلگى ورتالىق قازاقستان تۇرعىندارىنىڭ ءومىر سالتى مەن شارۋاشىلىق جۇيەسى جايلى ءبىلىمىمىز كەڭەيە تۇسەدى، - دەيدى سارىارقا ارحەولوگيالىق ينستيتۋتىنىڭ ديرەكتورى الەكسەي كۋكۋشكين.
ايتا كەتەيىك، بۇعان دەيىن ءدال وسى ۋنيۆەرسيتەتتىڭ ەكسپەديتسياسى نۇرا اۋدانىندا شامامەن مىڭ جىل بۇرىن جەرلەنگەن بالانىڭ قورىمىن تاپقان بولاتىن.
اۆتور
ايزادا اگيلبايەۆا
