قاراعاندى وبلىسىندا جىلقى اۋرۋىنا قاتىستى زەرتتەۋ جۇرگىزىلەدى
استانا. KAZINFORM - اۋىل شارۋاشىلىعى مينيسترلىگى قاراعاندى وبلىسىندا جىلقىلاردىڭ اۋرۋىنا قاتىستى زەرتتەۋ جۇرگىزەدى.
2023 -جىلدىڭ مامىرىنان باستاپ بۇقار جىراۋ اۋدانىنىڭ ۇمىتكەر اۋىلىندا جىلقىلاردىڭ ەپيزووتيالىق ليمفونگويتى بويىنشا كارانتين ەنگىزىلگەن بولاتىن. وسى ۋاقىت ىشىندە رەسپۋبليكالىق بيۋدجەتتەن وتەماقى تولەي وتىرىپ، اتالعان ەلدى-مەكەندەگى 185 باس جىلقى جويىلدى. كارانتيندىك ءىس-شارالار جالعاسىن تاۋىپ وتىر.
«ب ا ق پەن الەۋمەتتىك جەلىلەردە 2024 -جىلدىڭ 15-قاڭتارىندا ە. بەكوۆتىڭ «ەرجان» ش ق-داعى 2 باس جىلقىدا ەپيزووتيالىق ليمفانگيتتىڭ كلينيكالىق بەلگىلەرى بايقالعانى تۋرالى اقپارات جاريالانعاندى. 16-قاڭتاردا 2 باس جىلقىدان سىناما الىنىپ، ق ر ا ش م ۆەتەريناريالىق باقىلاۋ جانە قاداعالاۋ كوميتەتىنە قاراستى «رەسپۋبليكالىق ۆەتەرينارلىق زەرتحانا» ش ج ق ر م ك قاراعاندى وبلىستىق فيليالىنا جەتكىزىلدى. زەرتحانانىڭ تالداۋ ناتيجەسى - تەرىس»، - دەلىنگەن ا ش م باسپا ءسوز قىزمەتى تاراتقان حابارلامادا.
سونىمەن قاتار، اعىمداعى جىلدىڭ 4-قاڭتارىندا ماماندار تورتكول اۋىلىنىڭ تۇرعىنى م. ءجۇمادىلدىڭ جىلقىلارىنان ەكى سىناما الدى. بۇعان دەيىن، 2023 -جىلعى 9-قازاندا وسى كىسىگە تيەسىلى 5 باس جىلقىدان سىناما الىنىپ، «رەسپۋبليكالىق ۆەتەرينارلىق زەرتحانا» ش ج ق ر م ك قاراعاندى وبلىستىق فيليالىنا جىبەرىلگەن بولاتىن. ول كەزدە دە تالداۋ ناتيجەسى «تەرىس» دەپ كورسەتىلىپتى.
ۇمىتكەر اۋىلدىق وكرۋگىندەگى ەپيزووتيالىق جاعدايدى ەسكەرە وتىرىپ، ۆەتەريناريالىق باقىلاۋ جانە قاداعالاۋ كوميتەتى ارنايى كوميسسيا قۇردى، ونىڭ قۇرامىنا كەلىسىم بويىنشا «ۆەتەريناريا جونىندەگى ۇلتتىق رەفەرەنتتىك ورتالىق» ش ج ق ر م ك، ق ر ا ش م ماماندارى جانە ق ر دەنساۋلىق ساقتاۋ مينيسترلىگىنىڭ «عىلىمي بيولوگيالىق قاۋىپسىزدىك پروبلەمالارىنىڭ زەرتتەۋ ينستيتۋتى» قىزمەتكەرلەرى ەنگىزىلدى.
«ارنايى كوميسسيا 2024 -جىلدىڭ 2-3-اقپانىندا مونيتورينگ جۇرگىزۋ ءۇشىن ۇمىتكەر اۋىلدىق وكرۋگىنە باردى. ولار ۇمىتكەر، تورتكول، ۇلگى اۋىلدارىنداعى ساۋ، جايىلىمدا جۇرگەن جانە اۋرۋ جىلقىلاردان بيولوگيالىق جانە پاتولوگيالىق ماتەريالدار سىنامالارىن الدى. سونداي-اق، ماماندار جەرگىلىكتى تۇرعىندارمەن كەزدەستى»، - دەپ جازادى اتالمىش ۆەدوموستۆونىڭ باسپا ءسوز قىزمەتى.
ايتا كەتەيىك، كوميسسيا ساپارى كەزىندە «ەرجان» شارۋا قوجالىعىنىڭ يەسى سىناما الۋ ءۇشىن جىلقىلارىن بەرمەگەن ەدى. سول سەبەپتى، 6-7-اقپاندا ۇلگى اۋىلىندا جىلقىلاردان قوسىمشا 11 سىناما جانە تورتكول اۋىلىنداعى، اتاپ ايتقاندا، «ەرجان» شارۋا قوجالىعىنداعى 2 جىلقىدان سىناما الدى.
الىنعان سىنامالار رەسپۋبليكالىق ۆەتەريناريالىق زەرتحانانىڭ قاراعاندى فيليالىنا جەتكىزىلىپ، بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنا جىبەرىلدى. زەرتتەۋ ناتيجەلەرى تۋرالى قوسىمشا حابارلانادى.
بۇدان بولەك، عىلىمي ينستيتۋتپەن بىرلەسىپ جىلقىلاردى ۆاكتسيناتسيالاۋ جانە كارانتين جاعدايىندا ەپيزووتيالىق ليمفانگيتكە قارسى يممۋنيتەتتىڭ شيەلەنىسۋىنە مونيتورينگتىك زەرتتەۋلەر جۇرگىزىلەتىن بولادى.
