قاراعاندى وبلىسىندا جابايى سابانشى فوتوتۇزاققا ءتۇسىپ قالدى
قاراعاندى. KAZINFORM - شەت جانە اقتوعاي اۋداندارىنىڭ تاستى تاۋلارىندا سيرەك كەزدەسەتىن جابايى سابانشى فوتوتۇزاققا ءتۇسىپ قالدى. بۇل تۋرالى قازاقستان بيوالۋانتۇرلىلىكتى ساقتاۋ قاۋىمداستىعى مالىمدەدى.
2023-جىلدىڭ كۇزىنەن باستاپ ايماقتا 19 فوتوتۇزاق ورناتىلعان، ءبىراق ءبىر جىل ىشىندە سابانشى تەك ەكەۋىندە عانا بايقالعان.
«سابانشىلاردىڭ تەك ەكى فوتوتۇزاقتا كورىنۋى تاڭعالارلىق ەمەس. سەبەبى تۇزاقتار وسى جابايى سابانشىنىڭ ورتالىق قازاقستاننىڭ ۇساق شوقىلارىنداعى تارالۋ شەكارالارىن انىقتاۋ ماقساتىندا ارنايى ورنالاستىرىلدى. كوپتەگەن فوتوتۇزاق ونىڭ تۇراقتى مەكەندەيتىن اۋماعىنان تىس ورنالاسقان. بۇل ايماق سابانشىعا قولايسىز بولۋى مۇمكىن، سەبەبى قىستا مۇندا قار مولشەرى وتە كوپ»، - دەپ ءتۇسىندىردى ا س ب ك عىلىمي قىزمەتكەرى يليا سمەليانسكي.
فوتوتۇزاق دەرەكتەرى ايماقتا تاعى ءبىر جىرتقىش - ورتالىق قازاقستاننىڭ ۇساق شوقىلارىن مەكەندەيتىن سىلەۋسىننىڭ بار ەكەنىن راستايدى. سونىمەن قاتار فوتوتۇزاقتارعا قىزىل كىتاپقا ەنگەن تاس سۋسار مەن قازاقستان ارقارى دا تۇسكەن. ارقار 19 تۇزاقتىڭ 17 سىندە بايقالعان.
كەلەسى جىلى سابانشى جانە باسقا سيرەك كەزدەسەتىن جانۋارلاردىڭ تارالۋىن ءارى قاراي باقىلاۋ ءۇشىن قاراعاندى وبلىسىنىڭ اۋماعىنا 27 فوتوتۇزاق ورناتىلدى.
الماتى وبلىسىندا ءىلبىس فوتوتۇزاققا تۇسكەنىن جازعان بولاتىنبىز.
