قۋاندىق بيشىمبايەۆ قاتاڭ رەجيمدەگى كولونياعا جونەلتىلدى
استانا. KAZINFORM - ەكس-شەنەۋنىك قۋاندىق بيشىمبايەۆ جازاسىن قاتاڭ رەجيمدەگى كولونيادا وتەيتىن بولدى.
ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنىڭ حابارلاۋىنشا، بۇرىنعى مينيستر قاماۋدا وتىراتىن مەكەمە سوت ۇكىمىنە سايكەس بەلگىلەنگەن.
«سوتتالۋشى (ق. بيشىمبايەۆ) سوت ۇكىمىنە سايكەس قاۋىپسىزدىگى بارىنشا جوعارى مەكەمەگە جولداندى. سونىمەن قاتار، قىلمىستىق اتقارۋ كودەكسىنىڭ 88-بابى بويىنشا سوتتالعاندار جازاسىن وتەۋ ورىندارىنا تىركەۋگە سايكەس جىبەرىلەدى»، - دەلىنگەن كوميتەتتىڭ باسپا ءسوز قىزمەتى تاراتقان اقپاراتتا.
سونداي-اق، كوميتەت قىلمىستىق اتقارۋ كودەكسىنىڭ 93-بابىنا سايكەس وزگە اقپارات جاريا ەتىلمەيتىنىن حابارلادى.
بۇعان دەيىن قىلمىستىق-اتقارۋ جۇيەسى كوميتەتىنىڭ باسشىسى قۋاندىق بيشىمبايەۆ تۇزەۋ مەكەمەسىنە وتكەننەن كەيىن قانداي جۇمىس ىستەۋى مۇمكىن دەگەن ساۋالعا جاۋاپ بەرگەن ەدى.
ەسكە سالا كەتەيىك، بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ازاماتتىق نەكەدەگى ايەلى سالتانات نۇكەنوۆانى ازاپتاپ ءولتىردى دەگەن ايىپپەن 24 جىلعا سوتتالدى.
اۆتور
داۋلەت ىزتىلەۋ
