قانداستار 4,2 ميلليون تەڭگەلىك باسپانا سەرتيفيكاتىن قالاي راسىمدەيدى
استانا. KAZINFORM - ەڭبەك جانە حالىقتى الەۋمەتتىك قورعاۋ مينيسترلىگى قانداستار مەن ءبىر وڭىردەن ەڭبەك كۇشى تاپشى وڭىرلەرگە قونىس اۋدارعانداردى قابىلداۋدىڭ ەرەجەسىنە وزگەرىس ەنگىزدى.
بۇيرىقتا جەرگىلىكتى جۇمىسپەن قامتۋ مەكەمەلەرى ءار جىلدىڭ 15-جەلتوقسانىنا دەيىن قانداستار مەن ىشكى ميگرانتتاردى ەرىكتى تۇردە قونىستاندىرۋعا جاتاتىن ەلدى مەكەندەردىڭ تىزبەسىن ۇسىنىپ وتىرۋ كەرەكتىگى ايتىلعان.
«سەرپىن» جانە «جارقىن بولاشاق» تۇلەكتەرى مەن قانداستار قازاقستاننىڭ ىشىندە ەڭبەك كۇشى تاپشى وڭىرلەرگە بۇعان دەيىن تۇرعان وڭىرىنە قاراماستان كوشە الاتىنى، كوشىپ بارعان اۋدانىندا مەملەكەتتىك قولداۋ الاتىنى دا ايتىلعان.
ول مەملەكەتتىك قولداۋدى الۋعا بۇيرىق كۇشىنە ەنگەنگە دەيىنگى 6 ايدىڭ كولەمىندە ەڭبەك كۇشى تاپشى وڭىرلەرگە قونىس اۋدارعان ادامدار ءوتىنىش بەرە الادى. ەڭبەك موبيلدىلىگى ورتالىقتارى سول ءوتىنىش نەگىزىندە جۇمىس بەرۋشىنىڭ شوتىنا الەۋمەتتىك كەلىسىمشارت جاسالعاننان كەيىنگى 3 كۇننىڭ ىشىندە اقشالاي تولەم اۋدارادى.
ەكونوميكالىق ۇتقىرلىق سەرتيفيكاتى باسپانا ساتىپ الۋعا جانە سالۋعا، يپوتەكا راسىمدەگەن جاعدايدا العاشقى جارنا رەتىندە ماتەريالدىق كومەك بەرۋدى كوزدەيدى. بۇل سەرتيفيكات تۇتاس وتباسىعا نەمەسە اجىراسقانىنا كەمىندە 3 جىل بولعان ازاماتتارعا بەرىلەدى. ونىڭ كولەمى ساتىپ الىناتىن باسپانا باعاسىنىڭ %50 ىنان اسپاۋى كەرەك. ءبىراق بۇل سوما 1160 ايلىق ەسەپتىك كورسەتكىشتەن (4282720 تەڭگە - رەد) كوپ بولماۋى كەرەك.
بۇل سەرتيفيكاتتى قونىس اۋدارۋشى جاقىن تۋىستارىنان باسپانا ساتىپ الۋعا پايدالانا المايدى. ال جاقىن تۋىستارعا اتا- انا، بالا، اسىراپ الۋشى، اسىراپ الىنعاندار، اتا- اناسى ءبىر جانە اتا- اناسى بولەك اعالى- ىنىلەر مەن اپالى- سىڭلىلەر (اعا- قارىنداستار) اتا، اجە، نەمەرەلەر جاتاتىنى ايتىلعان.
وسىنداي سەرتيفيكات ارقىلى ساتىپ الىنعان ءۇيدى قونىس اۋدارۋشى 5 جىل كولەمىندە ساتىپ كەتە المايدى.
5 جىلدىڭ ىشىندە قونىس اۋدارۋشى باسقا وڭىرگە كوشىپ كەتسە، سەرتيفيكات اياسىندا العان ماتەريالدىق كومەكتى مەملەكەتكە قايتارادى. ەڭبەك موبيلدىلىگى ورتالىقتارى جىبەرگەن ەسكەرتۋگە قونىس اۋدارۋشى 15 كۇننىڭ ىشىندە جاۋاپ قاتپاسا، ءىس سوتقا جولدانادى.
بۇل بۇيرىق 14-ماۋسىمدا كۇشىنە ەنەدى.
