قانات بوزىمبايەۆ ب ق و سۋ تاسقىنىنىڭ كەزەكتى تولقىنىنا دايىندىق بارىسىن تەكسەردى
ورال. KAZINFORM - ۆيتسە-پرەمەر، سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنىنىڭ سالدارىن جويۋ جونىندەگى رەسپۋبليكالىق شتاب مەڭگەرۋشىسىنىڭ ورىنباسارى قانات بوزىمبايەۆ ورال مەن جايىق وزەنىنىڭ ارناسىنىڭ رف شەكاراسىنا دەيىنگى ارالىعىن تىكۇشاقپەن قاراپ شىقتى.
13-ساۋىردە جايىق وزەنىندەگى ورال گيدرولوگيالىق بەكەتىندە سۋ دەڭگەيى 743 سانتيمەترگە دەيىن كوتەرىلدى، قاۋىپتى دەڭگەي 850 سانتيمەتردى قۇرادى. وبلىستىڭ ىشكى وزەندەرىنىڭ كوپشىلىگىندە سۋ تاسقىنى شارىقتاۋ شەگىنە جەتتى.
17-ساۋىردە يانۆارتسيەۆو اۋىلىنىڭ سۋ قويماسى ارقىلى رەسەي فەدەراتسياسىنان كەلەتىن سۋدىڭ سالدارىنان جايىق وزەنىندە سۋ تاسقىننىڭ شارىقتاۋ شەگى باستالادى دەپ كۇتىلەدى. 20-21-ساۋىردە ورالعا سۋ كەلەدى دەپ بولجانۋدا. وسىعان بايلانىستى، قانات بوزىمبايەۆ سۋ تاسقىنىنا دايىندالۋ ءۇشىن ب ق و- عا قوسىمشا 750 بىرلىك تەحنيكا تارتۋدى تاپسىردى، ونىڭ 100 ءى جايىق وزەنىنىڭ جوعارى اعىسى بويىنشا ەلدى مەكەندەر ءۇشىن، 500 ءى ورال ءۇشىن جانە 150 ءى وزەننىڭ تومەن اعىسى ءۇشىن. بۇدان باسقا، ەلدى مەكەندەردىڭ اينالاسىنداعى بوگەتتەر مەن بوگەت قۇرىلىستارىن نىعايتۋدى تاپسىردى.
قازىر قۇتقارۋ جۇمىستارىنا 6533 ادام جۇمىلدىرىلدى. 915 بىرلىك تەحنيكا، 21 سۋ ايداۋ قۇرالى، 32 ءجۇزۋ قۇرالى، 5 اۋە كەمەسى تارتىلدى
جۇمىس ساپارى بارىسىندا قانات بوزىمبايەۆ وزەن سۋى جايىلعان جەرگە ورنالاسقان جانە سۋ باسۋ قاۋپى بار ەلدى مەكەندەردە: يانۆارتسيەۆو، جارسۋات اۋىلدارى، ءبورلى اۋدانىندا قورعانىس قۇرىلىستارى مەن بوگەتتەر سالۋ جۇمىستارىن تەكسەردى.
سونداي-اق ۆيتسە-پرەمەر شتاب وتىرىستارىن وتكىزدى، تسدياوم، قازگيدرومەت، سۋ رەسۋرستارى جانە يرريگاتسيا مينيسترلىگى، ت ج م ماماندارىنىڭ جانە تاۋەلسىز ساراپشىلاردىڭ ەسەپتەرى مەن بولجامدارىن تىڭدادى.
