قاجىلىققا بايلانىستى الاياقتىق: تۋرفيرما باسشىسى يمام بولىپ جۇمىس ىستەگەن بە

الماتى. KAZINFORM - الماتىدا قاجىلىققا بايلانىستى 180 ادامدى الداعان كۇدىكتىگە بايلانىستى تەرگەۋ ءجۇرىپ جاتىر.

Сауд Арабиясында қажылық кезінде 1,3 мың адам қайтыс болды
Фото: pexels.com

بىرنەشە كۇن بۇرىن الماتى قالاسىنىڭ پوليتسياسى الاياقتىق ىسىنە بايلانىستى الماتى وبلىسىنىڭ تۇرعىنى ۇستالعانىن حابارلادى. دەپارتامەنت مالىمەتىنشە، كۇدىكتى ءوزىن «Jazera travel» تۋريستىك فيرماسىنىڭ باسشىسى رەتىندە تانىستىرىپ، قاجىلىققا جونەلتۋ بويىنشا قىزمەت كورسەتەتىن جالعان كەلىسىمشارتتار جاساعان.

- الدىن الا مالىمەت بويىنشا، كۇدىكتىگە كەمىندە ءتورت ادام كومەكتەسكەن. ولاردىڭ ءارقايسىسىنىڭ ارەكەتىنە قۇقىقتىق باعا بەرىلەتىن بولادى. كۇدىكتى قاماۋعا الىندى. قىلمىستىق ءىس الاياقتىق دەرەگى بويىنشا تەرگەلىپ جاتىر، - حابارلادى قالالىق پ د باسپا ءسوز قىزمەتى.

بۇل جاعدايعا بايلانىستى قازاقستان مۇسىلماندارى ءدىني باسقارماسى رەسمي مالىمدەمە جاسادى. ق م د ب مالىمەتىنشە، «Jazera travel» كومپانياسىنىڭ باسشىسى مەيىرجان ىرىسكەلدى ەشقانداي ءدىني قىزمەت اتقارماعان جانە مەشىتتە نايب يمام بولىپ جۇمىس ىستەمەيدى.

- الماتى وبلىسىنىڭ ىلە اۋدانىنداعى «سابدەن ۇلى وتەگەن باتىر» مەشىتىنىڭ نايب يمامى مارسەل تاماشبەكوۆكە «Jazera travel» كومپانياسىنىڭ باسشىسى مەيىرجان باۋىر ۇلى ۇمرا ساپارىنا نيەت ەتكەن جاندارعا ءدارىس ءوتىپ بەرۋ جونىندە ءوتىنىش جاساعان. نايب يمام ءدىني قۇلشىلىقتى ءتۇسىندىرۋ ماقساتىندا وتىنىشتەرىن قابىل الىپ، ەكى رەت ساباق وتكىزگەن. ءدارىس سوڭى سۇراق-جاۋاپ نەگىزىندە جالعاسىپ، نايب يمام «Jazera travel» كومپانياسىنىڭ قىزمەتى جايلى بىلگەن اقپاراتتارىمەن دە بولىسكەن. «Jazera travel» كومپانياسىنا قاتىستى داۋلى ماسەلە قۇقىق قورعاۋ ورگاندارى تاراپىنان تەكسەرىلىپ جاتىر. نايب يمامنىڭ اتالمىش ماسەلەگە قاتىسى بار-جوعى انىقتالۋ ۇستىندە، - دەلىنگەن ق م ب د مالىمدەمەسىندە.

سونداي-اق قازاقستان مۇسىلماندارى ءدىني باسقارماسى ۇمراعا اپارۋشى تۋرفيرمالاردىڭ قىزمەتىن قاداعالاۋعا ءدىني باسقارمانىڭ زاڭدى قۇزىرەتى جوق ەكەنىن حابارلادى. باسقارما جاۋابىنا سايكەس، ۇمراعا باراتىن ازاماتتارعا قىزمەت كورسەتۋ، ولاردىڭ قاۋىپسىزدىگىن قامتاماسىز ەتۋ اتالمىش تۋرفيرمالار جاۋاپكەرشىلىگىندە.

- ق ر سىرتقى تۋريزمدى رەتتەيتىن ءتيىستى زاڭناماسىنا ساي ۇمرا ساپارىن توپپەن ۇيىمداستىرۋ ءۇشىن مىندەتتى تۇردە مەملەكەتتىك ليتسەنزياسى بولۋى ءتيىس جانە ءار ۇمرا جاساۋشىعا تۋروپەراتور تاراپىنان تۋركود بەرىلۋى قاجەت. مۇنداي تالاپتار ورىندالماعان جاعدايدا ۇمرانى توپپەن ۇيىمداستىرۋ ق ر زاڭدارىنا قايشى. وسى رەتتە ۇمراعا اپارۋشى تۋرفيرمالاردىڭ قىزمەتىن قاداعالاۋعا ءدىني باسقارمانىڭ زاڭدى قۇزىرەتى جوق ەكەنىن جەتكىزەمىز. سونىمەن قاتار وتانداستارىمىزدى رەسمي تۋروپەراتورلىق ليتسەنزياسى جوق تۋركومپانيالارمەن ۇمرا ساپارىنا بارماۋعا شاقىرامىز، - دەپ مالىمدەدى ق م د ب.

سوڭعى جاڭالىقتار