قاجەت بولسا حالىقارالىق سپورت تريبۋنالىنا دەيىن بارامىز - ۇ و ك ازياداداعى كەلەڭسىزدىكتەر تۋرالى
ق ر ۇلتتىق وليمپيادا كوميتەتى قىتايدىڭ حاڭجوۋ قالاسىندا وتكەن جازعى ازيا ويىندارى جونىندە باسپا ءسوز كونفەرەنتسياسىندا ايتۋلى سپورت شاراسىندا بولعان كەلەڭسىزدىكتەرگە قاتىستى پىكىر ءبىلدىردى، دەپ حابارلايدى قازاقپارات.
ق ر ۇ و ك باس حاتشىسى اندرەي كريۋكوۆ قازاقستان ۇلتتىق قۇراما كومانداسىنىڭ مۇشەلەرى - بوكسشىلار اسلانبەك شىمبەرگەنوۆ پەن كارينا يبراگيموۆاعا قاتىستى ىستەر تۋرالى اقپارات بەردى.
«وكىنىشكە وراي، حاڭجوۋدا قازاقستاندىق بوكسشىلاردىڭ قۇقىقتارىنىڭ بۇزىلۋى مۇمكىن جاعدايلار ورىن الدى. ق ر ۇلتتىق وليمپيادالىق كوميتەتى تۋريزم جانە سپورت مينيسترلىگىمەن، سونداي-اق، قازاقستان بوكس فەدەراتسياسىمەن بىرلەسىپ، اتالعان جاعدايدا بايلانىستى قاجەتتى شارالاردى قابىلدادى. سپورتشىلاردىڭ وزدەرىنەن، جاتتىقتىرۋشىلارىنان سۇراۋ الىندى، فەدەراتسيا ماماندارىمەن جانە تاۋەلسىز ساراپشىلارمەن، زاڭگەرلەرمەن اسلانبەك شىمبەرگەنوۆتىڭ جەكپە-جەگىنەن كەيىن بىردەن كەڭەس جۇرگىزىلدى. بۇل جارىستاردا جەكپە-جەكتەردى رەسمي قايتا قاراۋ ءراسىمى بولماعاندىقتان، ءبىزدىڭ ويىمىزشا، سپورتشىلار تورەشىلەردىڭ شەشىمدەرىنە رەسمي تۇردە شاعىمدانۋ قۇقىعىنان ايىرىلعان، بۇل ازيا وليمپيادا كەڭەسىنىڭ ەرەجەلەرى مەن وليمپيادا حارتياسىندا جازىلعان. اپەللياتسيالىق تەحنيكالىق قازىلار القاسى قۇرىلماعان، ءراسىم PBU ەرەجەلەرىندە قاراستىرىلماعان (ح و ك-تىڭ پاريج-2024 بوكستاعى جۇمىس توبى). ءبىز حالىقارالىق وليمپيادالىق كوميتەت پەن ازيا وليمپيادا كەڭەسىنە ءتيىستى شاعىمداردى جولدادىق، ولار قازىرگى ۋاقىتتا قارالىپ جاتىر. مۇندا بوكستىڭ تەحنيكالىق ماسەلەلەرى عانا ەمەس، قۇقىقتىق ءتارتىپ پەن سپورتشىلار قۇقىقتارىن بۇزۋ ماسەلەلەرى دە قوزعالعاندىقتان، ءبىزدىڭ تالاپتارىمىزعا جاۋاپ دايىنداۋ تەتىگى زاڭدى تۇرعىدان كۇردەلى جانە ءبىرشاما ۋاقىتتى قاجەت ەتەدى. ح و ك پەن ازيا كەڭەسىنەن الىنعان شەشىمدەردىڭ ناتيجەلەرى بويىنشا ءبىز قاجەت بولعان جاعدايدا ءارى قارايعى حالىقارالىق سپورت تريبۋنالىنا جۇگىنۋ تۋرالى شەشىم قابىلدايمىز»، - دەدى اندرەي كريۋكوۆ.
ق ر ۇ و ك تورەشىلەردىڭ سۋبەكتيۆتىلىگى، بوكس ستيلدەرىنىڭ قاقتىعىسى تۋرالى اڭگىمەلەر، جەكە جاناشىرلىق جەكپە-جەكتىڭ سوڭعى ەسەبىنە اسەر ەتپەۋى كەرەكتىگىن ايتۋدا. ح و ك ۇمتىلاتىن باستى قاعيدا - تازا بوكس بولۋى كەرەك، قازاقستان مۇنداي ءتاسىلدى تولىعىمەن قولدايدى.
جەكپە-جەكتى باعالاۋ كريتەريلەرى PBU بوكس ەرەجەلەرىندە ناقتى كورسەتىلگەن. ەگەر ەرەجەلەردىڭ شىنىمەن بۇزىلۋىنا جول بەرىلسە، اپەللياتسيالىق القابيلەر ءتيىستى شەشىم قابىلداۋى كەرەك.
«وكىنىشكە وراي، حاڭجوۋداعى بارلىق جاعدايدى ەگجەي-تەگجەيلى تالداي وتىرىپ، كوپتەگەن قاراما- قايشى ساتتەردى تابۋعا بولادى. جەرەبە تاستاۋ كەزىندە ناقتى ىرىكتەۋ پروتسەدۋراسى قولدانىلمادى، بۇل ءوز كەزەگىندە ەڭ مىقتى بوكسشىلاردىڭ الدىن-الا جەكپە-جەكتە كەزدەسۋىنە، ايەلدەر بوكسىنا قاتىسۋشىلاردى گەندەرلىك سايكەستەندىرۋدىڭ ناقتى ەرەجەلەرىنىڭ بولماۋىنا، تورەشىلەردىڭ كوپشىلىگىن ءبىر «بلوكتان» ناقتى جەكپە-جەككە تاعايىنداۋ جانە باسقا دا قايشىلىقتارعا مۇمكىندىك اشتى. بۇل فاكتىلەردىڭ بارلىعى بوكس ساراپشىلارى قاۋىمداستىعىندا وبەكتيۆتى كۇمان تۋدىرادى»، - دەپ اتاپ ءوتتى اندرەي كريۋكوۆ.
كارينا يبراگيموۆانىڭ سوڭعى فينالدىق جەكپە-جەگىنەن ءبىر كۇن بۇرىن ق ر ۇ و ك تالابىمەن ازيا وليمپيادالىق كەڭەسىنىڭ مەديتسينالىق كوميسسياسى شۇعىل شاقىرىلدى. كوميسسيا ناقتى دالەلدەر الۋ ءۇشىن قاجەتتى ءىس-شارالاردى جەدەل ۇيىمداستىردى. مۇنداي پروتسەدۋرالاردىڭ ناتيجەلەرىن الۋعا، مەديتسينالىق ۇيىمداردىڭ دەرەكتەرىن وڭدەۋگە ءبىرشاما ۋاقىت كەتەدى. كوميسسيا جۇمىسىنىڭ ناتيجەسى دايىن بولعاندا شەشىم قابىلدانادى، سونىڭ نەگىزىندە قازاقستاندىق تاراپ ءارى قاراي حالىقارالىق سپورت تريبۋنالعا جۇگىنۋ ماسەلەسىن شەشپەك.
«تۋريزم جانە سپورت مينيسترلىگىمەن جانە قازاقستان بوكس فەدەراتسياسىمەن بىرلەسىپ، قولدانىستاعى رەگلامەنتكە سايكەس بۇل جۇمىستى قۇقىقتىق زاڭ اياسىندا جالعاستىرامىز. سپورتشىلاردىڭ دەنساۋلىعى مەن قۇقىقتارىن قورعاۋ - ۇ و ك جۇمىسىنىڭ باستى باسىمدىعى»، - دەدى ۇ و ك باس حاتشىسى اندرەي كريۋكوۆ.
ەسكە سالا كەتەيىك، 2023 -جىلدىڭ 3-قازانىندا بوكستان ازيا ويىندارىنىڭ جارتىلاي فينالىندا قازاقستاندىق اسلانبەك شىمبەرگەنوۆ پەن جاپوندىق سەۆون وكادزاۆانىڭ كەزدەسۋىندە - تورەشىلەردىڭ شەشىمىمەن جەڭىس جاپون بوكسشىسىنا بەرىلدى. بۇل ساراپشىلار قاۋىمداستىعى مەن جانكۇيەرلەردىڭ ارالاس رەاكتسياسىن تۋدىردى.
ال 2023 -جىلدىڭ 5-قازانىندا كارينا يبراگيموۆا فينالدا قىتايلىق تايپەي بوكسشىسى لين يۋ تينگكە قارسى شىقتى، ونىڭ گەندەرلىك سيپاتتا 2022 جانە 2023 -جىلدارى بىرنەشە پرەتسەدەنت بولعان.
