قاشاعان توڭىرەگىندەگى داۋ: ءىستى قاراستىرۋ قاي ساتىدا ءوتىپ جاتىر

استانا. KAZINFORM – ق ر ەنەرگەتيكا ءمينيسترى الماسادام ساتقاليەۆ قازاقستاننىڭ قاشاعان كەن ورنىن يگەرۋشى الپاۋىت كومپانيالارعا قويعان تالاپ-ارىزىنا قاتىستى تۇسىنىك بەردى.

بۇعان دەيىن وسى ماسەلەگە قاتىستى تولىق اقپارات بيىلعى كۇزدە جاريالاناتىنى ايتىلعان.

الايدا مينيستر بۇل باعىتتاعى پروتسەسس جالعاسىپ جاتقانىن اتاپ ءوتتى.

«بەلگىلى ءبىر پروتسەدۋرالار بار. وسىعان دەيىن ءتيىستى تىڭداۋلار ءجۇرىپ جاتقانىن، حالىقارالىق تريبۋنال تاراپتاردىڭ ۇستانىمدارىن قاراستىرىپ جاتقانىن ايتتىم. مۇنىڭ ءبارى بيىلعى كۇزدىڭ ەكىنشى جارتىسىندا اياقتالىپ، ءبىراز اقپارات جاريالانادى دەپ جوسپارلاعان ەدىك. وكىنىشكە قاراي، اتالعان تىڭداۋلار ءالى جالعاسىپ جاتىر. وسى راسىمدەر ناقتى قاشان اياقتالاتىنى بەلگىسىز. بۇل ماسەلە حالىقارالىق سوتتاردىڭ قۇزىرەتىندە»، - دەدى الماسادام ساتقاليەۆ پارلامەنت ماجىلىستەگى ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.

ەسكە سالساق، بيىل جازدا قازاقستان تاراپى قاشاعان كەن ورنىن يگەرۋشى الپاۋىت كومپانيالارعا قويعان تالاپ سوماسىن 150 ميلليارد دوللاردان 160 ميلليارد دوللارعا دەيىن ۇلعايتقانى بەلگىلى بولعان ەدى.