ق. بيشىمبايەۆتىڭ اكەسى: ۇلىمىزدا سالتاناتتى ءولتىرۋ پيعىلى بولعان جوق

ايەلىن ءولتىردى دەگەن كۇدىككە ىلىنگەن ەكس-مينيستر قۋاندىق بيشىمبايەۆتىڭ اكەسى ءۋاليحان بيشىمبايەۆ ۇلىنىڭ قاساقانا ادام ءولتىرۋ نيەتى بولماعانىن ايتۋدا، دەپ حابارلايدى Kazinform.

«اتا-انا رەتىندە ۇلىمىزدا سالتاناتتى (نۇكەنوۆا - رەد.) ءولتىرۋ پيعىلى بولماعانىنا سەنەمىز. ول ونىمەن وتباسىن قۇرعىسى كەلدى، ەكەۋى دە بىرگە ءومىر ءسۇرۋدى جوسپارلادى، سالتاناتقا گاردەروبتى كەڭەيتۋ ءۇشىن ۇيىندە جوندەۋ جۇمىستارى ءجۇرىپ جاتتى. ەكەۋى دە بالا ءسۇيىپ، تولىققاندى وتباسىن قۇرۋدى قالادى. 9- قاراشا كۇنى نە بولعانىن ءوزىمىز دە بىلمەيمىز. ءبىراق ۇلىمىزدىڭ قاساقانا ادام ءولتىرۋ پيعىلى بولماعانىن تاعى دا اتاپ وتكىم كەلەدى»، - دەدى ۋ. بيشىمبايەۆ Youtube جەلىسىندە «ەرتىسبايەۆ Live» ارناسىندا.

ءۋاليحان بيشىمبايەۆ كەي ادامداردىڭ وسى قايعىلى وقيعا ارقىلى وزدەرىن جارنامالاپ، ادىلەت ءۇشىن كۇرەسكەر رەتىندە كورىنگىسى كەلەتىنىن جوققا شىعارمادى.

«قۇرمەتتى جۋرناليستەر، قۇقىق قورعاۋشىلار، بلوگەرلەر جانە باسقا دا ب ا ق وكىلدەرى! قۇرمەتتى وتانداستار! سىزدەردەن زاڭ شەڭبەرىندە ۋاكىلەتتى ورگانداردان الىنعان سەنىمدى اقپاراتتى جاريالاۋدى سۇرايمىن. جۇرتشىلىقتان قوعامدىق پىكىرگە قىسىم جاساپ، تەرگەۋگە ىقپال ەتۋگە مۇددەلى كەيبىر ادامداردىڭ ايلا-شارعىسىنا بەرىلمەۋىن سۇرايمىن. تەرگەۋ ورگاندارىنان زاڭ اياسىندا ءىستى وبەكتيۆتى جانە تولىق جان-جاقتى تەرگەۋدى سۇرايمىن. مەن قازاقستاننىڭ ءادىل سوت تورەلىگىنە، وندا ءاربىر ازاماتتىڭ قۇقىعى بۇزىلمايتىنىنا سەنەمىن»، - دەدى ايىپتالۋشىنىڭ اكەسى.

بۇعان دەيىن ءۋاليحان بيشىمبايەۆ قوعامدىق پىكىرگە قىسىم جاسالىپ جاتقانىن، تەرگەۋ بارىسىندا بارلىق زاڭنامانىڭ ساقتالۋى قاجەتتىگىن ايتقان ەدى.