نىسانا كوزدەۋدەن الەم كۋبوگىندا قازاقستاندىق سپورتشىلار كۇمىس جۇلدەگە يە بولدى

 باكۋ. KAZINFORM - ازەربايجان استاناسى باكۋدە ءوتىپ جاتقان نىسىنا كوزدەۋدەن الەم كۋبوگىندا قازاقستان قۇراماسى العاشقى جۇلدەگە قول جەتكىزدى.

سپورتتى دامىتۋ ديرەكتسياسىنىڭ مالىمەتىنشە، تاپانشامەن 10 مەتردەن وق اتۋدا قازاقستان-2 قۇراماسى فينالدا تۇركيالىق قارسىلاستارىنا ەسە جىبەردى. وسىلايشا، ەلدار يمانكۋلوۆ پەن ۆالەريا پوپەلوۆا الەم كۋبوگىندا ارالاس جۇپتىق سىندا العاش رەت كۇمىس جۇلدەگەر اتاندى. كەشە قوس سپورتشى جارىستىڭ العاشقى كۇنى ىرىكتەۋدە 578 ۇپاي جيناپ، ەكىنشى ورىنعا تابان تىرەدى.

ايتا كەتەيىك، بۇل كەزەڭ مىلتىق جانە تاپانشا ۇستاعان مەرگەندەر ءۇشىن ليتسەنزيالىق، ال ستەند اتۋ شەبەرلەرى ءۇشىن وليمپيادا رەيتينگىندە ۇپاي بەرىلمەيتىن جارىس سانالادى.

باكۋدە ەل نامىسىن بارلىعى 21 وتانداسىمىز قورعايدى. جالپى الەم كۋبوگىندا 84 ەلدەن كەلگەن 699 سپورتشى سىنعا ءتۇسىپ جاتىر.