نيۋ-يوركتە وق جاۋدىرعان ادامنىڭ پسيحيكاسىندا اقاۋ بولعان
استانا. KAZINFORM - نيۋ-يورك مەرى مەن پوليتسياسى مانحەتتەندەگى ءزاۋلىم عيماراتتا اتىس كەزىندە ءتورت ادامنىڭ، ونىڭ ىشىندە پوليتسيا قىزمەتكەرىنىڭ قازا تاپقانىن راستادى. تاعى ءبىر ادام اۋىر جاراقات الدى، دەپ حابارلايدى BBC.
اتقىش ءوز-وزىنە قول جۇمسادى، ونىڭ سەبەپتەرى بەلگىسىز. بيلىك مالىمەتىنشە، ونىڭ پسيحيكالىق دەنساۋلىعىندا پروبلەمالار بولعان.
بۇعان دەيىن نيۋ-يورك مەرى ەريك ادامس باسپا ءسوز ءماسليحاتىندا ب ا ق-تا بەس ادامنىڭ قازا تابۋى، ونىڭ ىشىندە وق اتقان ادام دا بار دەگەن اقپاراتتى راستادى.
نيۋ-يورك پوليتسياسىنىڭ كوميسسارى دجەسسيكا تيشتىڭ بايانداۋىنشا، لاس-ۆەگاستىڭ 27 جاستاعى تۇرعىنى شەين تامۋرا دەپ تانىلعان ەر ادام قولىنا M4 اۆتوماتىمەن عيماراتقا كىرىپ، بىردەن وق جاۋدىرىپ، پوليتسيا قىزمەتكەرى مەن تاعى ەكى ەر ادامدى ولتىرگەن.
سودان كەيىن ول ليفتپەن Ruden Building Management فيرماسى ورنالاسقان قاباتقا كوتەرىلىپ، سول جەردە وق جاۋدىرعان. كەيىنىرەك سول جەردە ايەلدىڭ دەنەسى انىقتالدى. سودان كەيىن تامۋرا فويەگە ءتۇسىپ، ءوزىن اتىپ تاستادى.
كوميسسار تيشتىڭ ايتۋىنشا، تامۋرا ءۇش كۇن بويى بۇكىل ەل بويىنشا ساياحاتتاپ، اتىسقا بارار الدىندا نيۋ-يورك قالاسىنا كەلگەن.
نيۋ-يورك پوليتسياسى لاس-ۆەگاس بيلىگىنەن العان اقپاراتقا سايكەس، تامۋرانىڭ پسيحيكالىق دەنساۋلىعىندا ماسەلەلەر بولعان.
- ونىڭ قىلمىسقا بارۋ سەبەپتەرى تەرگەلۋ ۇستىندە جانە ءبىز ونىڭ نەلىكتەن ءدال وسى ورىندى تاڭداعانىن ءتۇسىنۋ ءۇشىن جۇمىس ىستەپ جاتىرمىز، - دەدى تيش.
بۇعان دەيىن نيۋ-يورك قالاسىنىڭ مانحەتتەن ورتالىعىنداعى ءزاۋلىم عيماراتتا بەلگىسىز ادام اۆتومات قارۋىنان وق جاۋدىرعانىن جازعان بولاتىنبىز.
