نيۋ-يوركتە «Kazakhstan Finance Day» فورۋمى ءوتتى
استانا. KAZINFORM - قازاقستان رەسپۋبليكاسىنىڭ ۇلتتىق بانكى، ا ق ش-تاعى ەلشىلىگى جانە باس كونسۋلدىعى ۇيىمداستىرۋىمەن، Citigroup ،Mastercard ،Visa ،Solidcore Resources جانە ا ق ش ساۋدا پالاتاسىمەن سەرىكتەستىكتە نيۋ-يوركتە «Kazakhstan Finance Day» فورۋمى ءوتتى.
ءىس-شارا Citigroup كورپوراتسياسىنىڭ نيۋ-يوركتىڭ ىسكەرلىك ورتالىعىنداعى شتاب-پاتەرىندە ءوتىپ، ەكى ەلدىڭ قارجى-ەكونوميكالىق سەكتورىنان 450-دەن استام وكىلدى جينادى. قاتىسۋشىلاردىڭ اراسىندا Blackstone ،Ashmore ،JP Morgan ،Cerberus, ،Apollo Global Management ،KKR ،Bloomberg سەكىلدى ۋولل ءستريتتىڭ ءىرى ينۆەستورلارىن بىرىكتىردى.
قازاقستان دەلەگاتسياسى ق ر ۇلتتىق بانكىنىڭ، قارجى نارىعىن رەتتەۋ جانە دامىتۋ اگەنتتىگىنىڭ، ا ح ق و-نىڭ، قازاقستاننىڭ دامۋ بانكىنىڭ، قازاقستان قور بيرجاسىنىڭ، Kaspi.kz ،Halyk Bank ،Freedom Holding كومپانيالارىنىڭ باسشىلارى جانە «بايتەرەك» ۇلتتىق باسقارۋشى حولدينگى، «دامۋ» كاسىپكەرلىكتى دامىتۋ قورى سياقتى دامۋ ينستيتۋتتارىنىڭ وكىلدەرى دەڭگەيىندە ۇسىنىلدى.
الەمنىڭ باستى قارجى ورتالىقتارىنىڭ بىرىندە مۇنداي ءبىرىنشى فورۋمدى وتكىزۋ ەكونوميكالىق بايلانىستاردى نىعايتۋعا جانە قازاقستانعا
ەكونوميكالىق تارتىمدى ينۆەستيتسيالىق باعىت رەتىندە جاڭا ينۆەستيسيالار تارتۋعا باعىتتالعان.
«Kazakhstan Finance Day» الاڭى الەمدىك قارجى نارىعىنىڭ نەگىزگى ويىنشىلارىنا، ينۆەستورلار مەن ىسكەر سەرىكتەستەرگە قازاقستان ەكونوميكاسىنىڭ دامۋ سەرپىنى، ونىڭ الەۋەتى مەن اعىمداعى ينۆەستيتسيالىق جوبالارىمەن تانىسۋعا مۇمكىندىك بەردى.
ءىس- شارا بارىسىندا قاتىسۋشىلارعا قازاقستان رەسپۋبليكاسى ەكونوميكاسىنىڭ ماكروشولۋى، ەلدىڭ قارجى نارىعىنداعى دامۋ تەندەنتسيالارى تۋرالى وزەكتى اقپارات، تسيفرلاندىرۋ سالاسىنداعى جەتىستىكتەر جانە تسيفرلاندىرۋ سالاسىنداعى تەحنولوگيالار، قاۋىپسىزدىك پەن ۇلتتىق قارجىلىق ينفراقۇرىلىم تيىمدىلىگىن ارتتىرۋ بويىنشا الداعى جوسپارلار ۇسىنىلدى.
ينۆەستورلار مەن نارىقتىڭ كاسىبي قاتىسۋشىلارى ءۇشىن تىكەلەي جانە پورتفەلدىك ينۆەستيتسيالار بويىنشا جەكە سەسسيالار مەن پرەزەنتاتسيالار وتكىزىلدى.
نەگىزگى بايانداماشىلاردىڭ، قارجى سەكتورى مەن سالالىق كومپانيالاردىڭ جەتەكشىلەرىنىڭ سوزدەرى امەريكالىق ينۆەستورلارعا قازاقستاندا بيزنەس جۇرگىزۋدى جەڭىلدەتۋگە جانە بانك زاڭناماسىن ىرىقتاندىرۋعا ارنالعان ءتۇرلى قارجى قۇرالدارىمەن تانىسۋعا مۇمكىندىك بەردى.
فورۋمعا قاتىسۋشىلار جۇرگىزىلىپ جاتقان ەكونوميكالىق رەفورمالاردى جوعارى باعالاپ، ولاردىڭ پىكىرىنشە، بۇل ەلدىڭ دە، جالپى ايماقتىڭ دا دامۋىنىڭ جاڭا ۆەكتورىن بەلگىلەپ، ونىڭ امەريكالىق بيزنەس ءۇشىن تارتىمدىلىعىن ارتتىرادى. دەلەگاتتار تۇراقتى ماكروەكونوميكالىق ساياساتتى جانە قازاقستاننىڭ ورتالىق ازيا نارىعىنا شىعۋدى قالايتىن ينۆەستورلار ءۇشىن ستراتەگيالىق ورتالىق ءرولىن اتاپ ءوتتى.
ءىس- شارا اياسىندا ەكى ەلدىڭ بيزنەس وكىلدەرى اراسىندا جەكە ەكىجاقتى كەزدەسۋلەر، سونداي- اق جاڭا ىسكەرلىك بايلانىستاردى ورناتۋ جانە ينۆەستيتسيالىق ىنتىماقتاستىقتى نىعايتۋ ماقساتىندا نەتۆوركينگ سەسسيالارى ءوتتى.
