پەنتاگون بيولوگيالىق قاۋىپتەردەن قورعايتىن جاڭا سۋپەركومپيۋتەردى تانىستىردى

  استانا. KAZINFORM – ا ق ش ۆەدومستۆولارىنىڭ حابارلاۋىنشا، سۋپەركومپيۋتەر مەن جاڭا جەدەل ارەكەت ەتۋ زەرتحاناسى جاڭا ءدارى- دارمەكتەر مەن ۆاكسينالاردى جىلدام جاساۋعا جانە سىناقتان وتكىزۋگە مۇمكىندىك بەرەدى، دەپ حابارلايدى امەريكا داۋىسى.

ا ق ش قورعانىس مينيسترلىگى مەن ۇلتتىق يادرولىق قاۋىپسىزدىك باسقارماسى بيولوگيالىق قاۋىپتەردەن قورعاۋعا ارنالعان جاڭا سۋپەركومپيۋتەردى تانىستىردى.

بۇل باستاما -دەنساۋلىق ساقتاۋ جولىندا پايدا بولاتىن قاۋىپتەرمەن كۇرەسۋ ءۇشىن وزىق تەحنولوگيالاردى قولدانۋداعى ماڭىزدى قادام.

كەشەن ا ق ش ەنەرگەتيكا مينيسترلىگىنىڭ قۇرىلىمى اياسىندا قىزمەت ەتىپ جۇرگەن كاليفورنياداعى زەرتتەۋ كەشەنى - لوۋرەنس اتىنداعى ليۆەرمور ۇلتتىق زەرتحاناسىندا ورنالاسادى.

پەنتاگون سايتىندا حابارلانعانداي، سۋپەركومپيۋتەر الەمدەگى ەڭ قۋاتتى سۋپەركومپيۋتەر El Capitan دى ازىرلەۋ ءۇشىن قولدانىلعان الدىڭعى قاتارلى تەحنولوگيالاردى پايدالانا وتىرىپ جاسالعان.

ۆەدومستۆولار كومپيۋتەردىڭ تەحنيكالىق بولىكتەرىن اتامادى، ونىڭ جۇمىسى ءۇشىن AMD كومپانياسى شىعارعان MI300A پروتسەسسورى پايدالانىلاتىنى عانا بەلگىلى.

پەنتاگون مەن ۇلتتىق يادرولىق قاۋىپسىزدىك باسقارماسىنىڭ اتاپ وتۋىنشە، بۇل جۇيە ا ق ش- تىڭ ۇلتتىق قاۋىپسىزدىگىن قولداپ قانا قويماي، حالىقارالىق سەرىكتەستەر مەن زەرتتەۋشىلەر ءۇشىن دە پايدالى بولادى. ۇلكەن ەسەپتەۋ مۇمكىندىكتەرى مەملەكەتتىك ۆەدومستۆولارعا، اكادەميالىق ينستيتۋتتار جانە ونەركاسىپتىك كاسىپورىندارعا قولجەتىمدى بولادى.