نەتانياحۋ: يزرايل گازا سەكتورىن تولىق باقىلاۋىنا الادى
استانا. KAZINFORM - يزرايل پرەمەر-ءمينيسترى بينيامين نەتانياحۋ يزرايل گازا سەكتورىنىڭ بۇكىل اۋماعىن باقىلاۋعا الۋعا نيەتتى ەكەنىن مالىمدەدى. بۇل تۋرالى ول 19-مامىر، دۇيسەنبى كۇنى ءوزىنىڭ Telegram-ارناسىندا جاريالاعان ۆيدەوۇندەۋىندە ايتتى، دەپ جازادى DW.
- قارقىندى ۇرىستار ءجۇرىپ جاتىر، ءبىز العا جىلجىپ كەلەمىز. ءبىز بۇكىل سەكتوردى باقىلاۋعا الامىز. ءبىراق بۇل ءۇشىن ءبىزدى ەشتەڭە توقتاتا المايتىنداي ارەكەت ەتۋىمىز كەرەك، - دەدى نەتانياحۋ.
ونىڭ ايتۋىنشا، اسكەر ايماقتا ءتارتىپتى قامتاماسىز ەتىپ، گۋمانيتارلىق كومەكتىڭ تونالۋىنا جول بەرمەۋى ءتيىس.
گازا سەكتورىنا گۋمانيتارلىق كومەك
يزرايل ۇكىمەتى 19-مامىردان باستاپ گازا سەكتورىنا گۋمانيتارلىق كومەك جەتكىزۋگە قايتا رۇقسات بەردى. ب ۇ ۇ مەن باسقا دا باقىلاۋشى ۇيىمدار بۇعان دەيىن بىرنەشە رەت ەسكەرتىپ، كومەك بولماسا پالەستين حالقى اشتىققا ۇشىرايتىنىن مالىمدەگەن ەدى. كومەك دۇنيەجۇزىلىك ازىق-تۇلىك باعدارلاماسى (WFP) مەن World Central Kitchen ۇيىمى ارقىلى جەتكىزىلەدى. يزرايل اسكەرى مەن قاۋىپسىزدىك كۇشتەرى ولاردىڭ ايماققا كىرۋىن باقىلايدى.
يزرايل بيلىگى ناۋرىز ايىنىڭ باسىندا گۋمانيتارلىق كومەكتى وتكىزۋگە تىيىم سالعان. ۇكىمەتتىڭ مالىمدەۋىنشە، ايماقتا ارەكەت ەتەتىن حاماس لاڭكەستىك ۇيىمىنىڭ سودىرلارى كومەكتى يەمدەنىپ، قايتا ساتىپ، قارۋ-جاراق ءۇشىن قارجى تاۋىپ جاتىر.
گازا سەكتورىنداعى جاڭا شابۋىل
يزرايل قورعانىس ارمياسىنىڭ (س ا ح ا ل) جاڭا اۋقىمدى شابۋىلى 17-مامىردا باستالدى. يزرايل كۇشتەرى ايماقتىڭ سولتۇستىگىندە، ونىڭ ىشىندە گازا قالاسى ماڭىندا وپەراتسيالارىن كەڭەيتتى. ۇرىستىڭ ماقساتى - راديكالدى يسلاميستىك حاماس توبىن جويۋ جانە 2023 -جىلعى 7-قازاندا حاماس ۇرلاپ اكەتكەن تۇتقىنداردى بوساتۋ.
س ا ح ا ل كۇن سايىن گازا سەكتورىنداعى نىساندارعا سوققى بەرىپ جاتىر. پالەستينالىق WAFA اگەنتتىگىنىڭ حابارلاۋىنشا، 19-مامىر كۇنى تۇندە يزرايل حان-يۋنيس قالاسىنا جاپپاي اۋە شابۋىلىن جاساعان. سالدارىنان 17 ادام قازا تاپتى. اگەنتتىك ولاردىڭ حاماس سودىرلارى ما، الدە بەيبىت تۇرعىندار ما ناقتىلاماعان.
تاياۋ شىعىستاعى جاعدايدىڭ ۋشىعۋى
2023 -جىلعى 7-قازاندا حاماس قوزعالىسى يزرايلگە جاپپاي شابۋىل جاساپ، تاياۋ شىعىستاعى جاعداي كۇرت ۋشىعىپ كەتتى. ەۋروپالىق وداق پەن ا ق ش-تا لاڭكەستىك ۇيىم دەپ تانىلعان حاماس يزرايلگە زىمىرانمەن سوققى بەرىپ، ەل اۋماعىنا باسىپ كىرىپ، يزرايل تاريحىنداعى بەيبىت تۇرعىندارعا قارسى ەڭ جاپپاي قىرعىن جاسادى - شامامەن 1200 ادام قازا تاپتى. سونىمەن قاتار 250 دەن استام ادام تۇتقىنعا الىنىپ، گازا سەكتورىنا اكەتىلدى. ولاردىڭ ءبىر بولىگى ايىرباستالدى نەمەسە بوساتىلدى، قالعاندارى قازا تاپقان.
جاۋاپ رەتىندە يزرايل حاماس-قا سوعىس جاريالادى. حاماس باقىلاۋىنداعى دەنساۋلىق ساقتاۋ مينيسترلىگىنىڭ دەرەگىنشە، گازا سەكتورىنداعى قۇرلىق وپەراتسيالارى مەن بومبالاۋ كەزىندە 53 مىڭنان استام پالەستينالىق قازا تاپتى، تاعى 120 مىڭنان استامى جارالاندى. الايدا بۇل ستاتيستيكادا قانشا سودىردىڭ كوز جۇمعانى ناقتى كورسەتىلمەگەن.
ايتا كەتەيىك، بۇعان دەيىن گازا سەكتورىنا جۋىردا جاسالعان سوققىلاردا ءتورت جۋرناليست مەرت بولعان.
اۆتور
جاراسقان نۇرىبايەۆ
