نەسيەنىڭ جىلدىق پايىزى قازىرگى 56 پايىزدان تومەن ءتۇسۋى مۇمكىن
استانا. KAZINFORM - قازاقستاندا نەسيەنىڭ جىلدىق تيىمدىلىك سىياقىسىنىڭ مولشەرلەمەسى قازىرگى 56 پايىزدان 40-42 پايىزعا دەيىن تومەندەۋى مۇمكىن. ءماجىلىس دەپۋتاتى بەرىك بەيسەنعاليەۆ سەنات قاراپ جاتقان زاڭ جوباسىنىڭ وسىنداي جاڭاشىلدىعى بار ەكەنىن ايتادى.
بۇعان دەيىن ءماجىلىس قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندەگى تاۋەكەلدەردى ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن قابىلداپ، سەناتقا جولداعان بولاتىن.
«زاڭ جوباسى جىلدىق تيىمدىلىك سىياقىسىنىڭ مولشەرلەمەسى ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگىنىڭ بىرلەسكەن شەشىمىمەن بەكىتىلۋىن كوزدەيدى. قازىر قازاقستاندا بۇل كورسەتكىش 56 پايىز دەڭگەيىندە بەكىتىلگەن. زاڭدى سەنات ماقۇلداسا، ەكىنشى دەڭگەيلى بانكتەردىڭ جىلدىق تيىمدىلىك سىياقى مولشەرلەمەسى 40-42 پايىزعا دەيىن، شاعىن نەسيە ۇيىمدارىنىڭ جىلدىق تيىمدىلىك سىياقى 50 پايىزعا دەيىن تۇسەدى»، - دەدى دەپۋتات Kazinform. تىلشىسىنە بەرگەن سۇحباتىندا.
جىلدىق تيىمدىلىك سىياقى مولشەرلەمەسى - قاراپايىم تىلمەن تۇسىندىرسەك، قارىز الۋشىنىڭ نەسيەگە العان سوما ۇستىنەن جىل بويى تولەيتىن ارتىق اقشا مولشەرى دەگەن ءسوز.
ياعني، ونىڭ ىشىنە بانكتىڭ پايىزدىق مولشەرلەمەسى مەن قىزمەت كورسەتۋ الىمدارى قوسا كىرەدى.
