نۇرلان سماعۇلوۆ بەيجىڭدە Great Wall Motor نەگىزىن قالاعان سەرىكتەسىمەن نە تۋرالى كەلىستى؟
ستانا. KAZINFORM - «استانا موتورس» نەگىزىن قالاعان نۇرلان سماعۇلوۆ ق ح ر Great Wall Motor ءىرى جەكە اۆتوموبيل جاساۋ كومپانياسىنىڭ نەگىزىن قالاۋشى ۆەي جيانجۋن (Wei Jianjun) مىرزامەن كەزدەستى. قازاقستاندىق كاسىپكەر قىتاي استاناسىنا بەيجىڭدەگى Auto China اۆتوسالونىنا بارۋ ءۇشىن، سونداي-اق حالىقارالىق بيزنەس-سەرىكتەستەرمەن ودان ءارى دامۋ جوسپارلارىن تالقىلاۋ ءۇشىن كەلدى.
«اسپان استى ەلىنىڭ وندىرۋشىلەرىنە قازاقستان نارىعى وتە قىزىقتى. ءبىز بۇل ىنتىماقتاستىقتى دامىتاتىن بولامىز. بۇگىن Great Wall Motor نەگىزىن قالاۋشى ۆەي مىرزامەن كەزدەسۋ ءوتتى. بۇل كومپانيا قازاقستاندا Haval اۆتوموبيلدەرىن، GWM پيكاپتارىن، جول تالعامايتىن TANK كولىكتەرىن ۇسىنادى. Great Wall Motor ديەۆەلوپەرلىك بيزنەستى، اۆتوموبيلدەردى، تەحنولوگيالاردى، سونىڭ ىشىندە «جاسىل» تەحنولوگيانى بەلسەندى تۇردە دامىتۋدا، وعان GWM ەنشىلەس كاسىپورنى، SVOLT برەندىمەن جاڭا ەنەرگيا كوزدەرىن قولداناتىن اۆتوموبيلدەرگە ارنالعان تارتقىش باتارەيا شىعاراتىن زاۋىتقا بارعاندا كوز جەتكىزدىك. ءبىز قازىر الماتىدا سالىنىپ جاتقان جاڭا مۋلتيبرەند زاۋىتىندا TANK 300 مودەلىن شىعارۋ جوسپارى اياسىندا ىنتىماقتاستىقتى نىعايتامىز دەپ كەلىستىك»، - دەدى نۇرلان سماعۇلوۆ جۋرناليستەرگە.
بيزنەسمەن سونداي- اق، قازاقستاندا Great Wall Motor قۇرامىنا كىرەتىن برەندتەردىڭ مودەلدىك جەلىسى جاڭارعانى تۋرالى حابارلادى. اتاپ ايتقاندا، بيىل برەندتىڭ جاڭا فلاگمانى - Tank 700 ساتىلىمعا شىعادى.
«بۇل قازاقستانداعى جول تالعامايتىن ەڭ ءىرى كولىكتەردىڭ ءبىرى بولادى. كەشە ءبىز پوليگوندا Tank 700 كولىگىن ايداپ كوردىك. اۆتوكولىك قارقىنى ساعاتىنا 200 شاقىرىم جىلدامدىققا دەيىن جەتتى، بۇل وتە اسەرلى»، - دەدى سماعۇلوۆ.
قازاقستاندىق كاسىپكەر بەيجىڭ اۆتوسالونىنان العان اسەرگە قاتىستى بۇل وزىق جاڭالىقتاردى بۇكىل الەمگە پاش ەتەتىن ءىرى حالىقارالىق وقيعا ەكەنىنە نازار اۋداردى.
«قىتاي قازىرگى ۋاقىتتا اۆتوونەركاسىپ سالاسىنداعى الەمدىك كوشباسشىلاردىڭ بىرىنە اينالىپ قانا قويماي، وزىنە ۇلكەن نازار اۋدارۋدا، جانە بۇل جەردە قىتايلىق برەندتەر عانا ۇسىنىلماعان. ءبىرىنشى كۇنى موتورشوۋعا 100 مىڭنان استام ادام كەلدى. مۇندا تانىستىرىلاتىن جاڭا ونىمدەر تەك قىتاي نارىعىنا عانا ەمەس، الەمدىك نارىققا، ونىڭ ىشىندە قازاقستانعا دا ارنالعان. ياعني، ءبىز بۇكىل الەممەن ءبىر مەزگىلدە اۆتوموبيل ونىمدەرىنىڭ سوڭعى جاڭالىقتارىمەن تانىسا الامىز»، - دەدى سماعۇلوۆ.
ايتا كەتەيىك، قازاقستاندا Great Wall Motor 2021 -جىلدىڭ ءساۋىر ايىنان باستاپ تانىس. رەسمي ديستريبيۋتورى «استانا موتورس» قۇرامىنا كىرەتىن Haval Motor Kazakhstan كومپانياسى. Haval, Tank, GWM برەندىنىڭ ديلەرلىك جەلىسىنە قازاقستاننىڭ 20 قالاسى، سونداي- اق ونلاين- ديلەرلەر كىرەدى.
