نۇرلان بايبازاروۆ ەلىمىزگە 190 ميلليارد يەن نە سەبەپتى تارتىلاتىنىن ءتۇسىندىردى
استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ قازاقستان ازيا دامۋ بانكىنەن، ازيا ينفراقۇرىلىمدىق بانكىنەن، سونداي-اق حالىقارالىق قايتا قۇرۋ جانە دامۋ بانكىنەن جالپى سوماسى 200 ميلليارد يەنگە جۋىق قاراجاتتى نە سەبەپتى تارتىپ جاتقانىن ءتۇسىندىردى.
«مۇنىڭ ءبارى ينۆەستيتسيالار، ياعني وڭىرلەردى دامىتۋعا جانە ينۆەستيتسيالىق جوبالاردى قارجىلاندىرۋعا ارنالعان. بۇل ينۆەستيتسيالار ەكونوميكانىڭ الەۋەتىن وسىرۋگە اسەر ەتەدى. ەكونوميكانىڭ ءوسىمىن قامتاماسىز ەتسەك، بيۋجەتتىڭ كىرىستەرى ارتاتىنى تۇسىنىكتى. ارينە، ەگەر مەملەكەتتىك قارىز بولسا، ول مەملەكەت ەسەبىنەن وتەلەدى. جاقىندا حالىقارالىق كرەديت اگەنتتىكتەرى ءبىزدىڭ رەيتينگتەردى راستادى، ولاردىڭ كەيبىرى ەلىمىزدىڭ دەڭگەيىن كوتەردى. سوندىقتان قازاقستان جالپى حالىقارالىق ينۆەستورلاردىڭ الدىندا سەنىمدى سەرىكتەس رەتىندە تانىلدى. ءبىز ينۆەستيتسيا تارتۋعا مۇددەلىمىز. اتاپ ايتقاندا، وسى ماسەلە بويىنشا ەشقانداي قاۋىپتى كورىپ تۇرعانىم جوق. قاراجات دەر كەزىندە قايتارىلادى»، - دەدى ن. بايبازاروۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
سونىمەن قاتار، ول 200 ميلليارد يەنگە جۋىق قاراجات نە سەبەپتى يەن ۆاليۋتاسىندا الىناتىنىنا تۇسىنىك بەردى.
«قازىر يەن ەڭ ارزان ۆاليۋتالاردىڭ ءبىرى جانە ونى الۋ شارتتارى ءتيىمدى، ياعني تومەن پايىزبەن ۇزاق مەرزىمگە الۋعا بولادى»، - دەدى مينيستر.
بۇدان بولەك، ۆەدومستۆو باسشىسى يسلام دامۋ بانكى قازاقستاننىڭ سۋ سالاسىنا $1,15 ميلليارد ينۆەستيتسيا سالاتىنىن ەسكە سالدى.
ەسكە سالساق، جاقىندا پارلامەنت ءماجىلىسىنىڭ قاراۋىنا ءۇش زاڭ جوباسى كەلىپ ءتۇستى.
بۇل رەتتە قازاقستان حالىقارالىق قايتا قۇرۋ جانە دامۋ بانكىنەن 84,9 ميلليارد يەن تارتادى.
مۇنىمەن قوسا، قازاقستان ازيا دامۋ بانكىنەن جانە ازيا ينفراقۇرىلىمدىق ينۆەستيتسيالار بانكىنەن جالپى 105 ميلليارد يەن الادى.
بيىل قاراشا ايىندا Fitch قازاقستاننىڭ تاۋەلسىز كرەديتتىك رەيتينگىن راستادى.
