نۇربەك ورالباي: وليمپياداعا التىن مەدال ءۇشىن كەلدىك

پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا جارتىلاي فينالعا جولداما العان بوكسشى نۇربەك ورالباي جەكپە-جەكتەن كەيىنگى اسەرىمەن ءبولىستى.

«بۇگىنگى جەكپە-جەگىم ءبارى ويداعىداي ءوتتى. نەگىزى وسىندا التىن مەدال ءۇشىن كەلگەنبىز. باسقا بالالاردىڭ بارلىعى مەنىڭ ويىمشا قارسىلاستارىنان ەمەس، تورەشىلەردىڭ قاتەلىگىنەن ۇتىلىپ جاتىر دەپ ەسەپتەيمىن. ءبىراق، ءبىز بۇعان بولا بوساپ قالمايمىز، كەرىسىنشە ءبىزدى جىگەرلەندىرە تۇسەدى. كەلەسى قارسىلاسىمنىڭ كىم ەكەنى بەلگىلى. ونىمەن ءبىرىنشى رەت شارشى الاڭدا جولىققالى وتىرمىن. ەندى كەلەسى ايقاسىما دايىندالامىن»، - دەدى بوكسشى.

سونداي-اق، كەشە ءوزىنىڭ ەگىزى ايبەك تۋرالى دا ءوز ويىن ايتا كەتتى.

«ايبەك 15 جىلىن وسى سپورتقا ارنادى. جارىس بولعاننان كەيىن جەڭىس تە، جەڭىلىس تە قاتار جۇرەدى عوي. ەر ازامات قوي، نە بولسا دا كوتەرەدى عوي. وكىنىشكە قاراي ۇتىلىپ قالدى»، - دەدى نۇربەك ورالباي.

80 كەلى سالماقتا ەل نامىسىن قورعاپ جاتقان نۇربەك ورالباي بۇگىن قازاق بوكسشىلارى اراسىندا ءبىرىنشى بولىپ جارتىلاي فينالعا شىقتى.

ەندى استانا ۋاقىتىمەن 23:30-دا ايەلدەر اراسىندا كارينا يبراگيموۆا شيرەك فينالعا شىعۋ ءۇشىن پۋەرتو-ريكولىق اشلەين موتتا لوزادامەن بوكستاسادى. سونىمەن قاتار، 3-تامىزعا اۋعان ءتۇنى، 00:20-دا ەرلەر اراسىندا قازاقستاندىق ساكەن بيبوسىنوۆ پەن وزبەك حاسانبوي دۋسماتوۆ اراسىنداعى شيرەك فينال جەكپە-جەگى وتەدى.

بيبوسىنوۆ پەن دۋسماتوۆ بىلتىر ازيا ويىندارىنىڭ ەكىنشى اينالىمىندا بوكستاسىپ، دۋسماتوۆ جەڭىسكە جەتكەن ەدى. دۋسماتوۆ - ريو وليمپياداسىنىڭ چەمپيونى، ال بيبوسىنوۆ - توكيو وليمپياداسىنىڭ قولا جۇلدەگەرى.

بۇگىن قازاقستاندىق سپورتشىلار سپورتتىڭ 8 تۇرىنەن - ستەندتىك اتۋ، اكادەميالىق ەسۋ، دزيۋدو، جەڭىل اتلەتيكا، ءجۇزۋ، سەمسەرلەسۋ، بوكس جانە باتۋت گيمناستيكاسىنان باق سىناپ جاتىر.

اۆتور
كۇنسۇلتان وتارباي